ସମ୍ବଲପୁର: କୋଭିଡ 19 ପାଇଁ ହେଉଥିବା ଲକଡାଉନ 11 ତମ ଦିନରେ ପହଞ୍ଚିଛି। ଲକଡାଉନ ଯୋଗୁଁ ସମ୍ବଲପୁରରେ ଦୋକାନ ,ବଜାର,ହୋଟେଲ ସବୁ ବନ୍ଦ ରହିଛି। ଏଭଳି ପରିସ୍ଥିତି ଲକଡାଉନ ପ୍ରଭାବ ଗରିବ ଲୋକଙ୍କ ସହ ବୁଲା ପଶୁ ଗାଈ ଗୋରୁ ଓ କୁକୁର ମାନଙ୍କ ଉପରେ ପଡ଼ିଛି। ମୁଖ୍ୟତଃ ଏହି ବୁଲା ପଶୁ ଗୁଡିକ ଖାଇବାକୁ ପାଉନାହାନ୍ତି। ଏଭଳି ପରିସ୍ଥିତିରେ ଏହି ପଶୁଙ୍କ ପାଇଁ ଦେବଦୂତ ସାଜିଛନ୍ତି ସମ୍ବଲପୁରର ଅଞ୍ଚଳର ଦୁଇ ବନ୍ଧୁ ନିଷିକାନ୍ତ ବିଶ୍ଵାଳ ଓ କେଶବ ମିଶ୍ର। ଏମାନେ ଏହି ପଶୁ ମାନଙ୍କ ପାଇଁ ନିଜ ଖର୍ଚ୍ଚରୁ ଖାଦ୍ୟପେୟର ବ୍ୟବସ୍ଥା କରୁଛନ୍ତି ।
ସମ୍ବଲପୁରର ନିଷିକାନ୍ତ ବିଶ୍ବାଳ ତାଙ୍କର କୌଣସି ସ୍ବେଚ୍ଛାସେବୀ ସଂଗଠନ ନାହିଁ। ତେବେ ବିଭିନ୍ନ ସମୟରେ ସମାଜ ସେବା କରିବା ପାଇଁ ଆଗଭର ହୋଇ ବାହାରନ୍ତି। ଏହି ଲକଡାଉନ ସମୟରେ ସମସ୍ତେ ଗରିବ ଖଟିଖିଆ ଓ ମଜୁରିଆ ମାନଙ୍କୁ ଖାଦ୍ୟ ଯୋଗାଉଛନ୍ତି ତେବେ ପଶୁଙ୍କ କଥା ପଚାରେ କିଏ। ତେଣୁ ନିଷିକାନ୍ତ ନିଜର ପ୍ରିୟ ବନ୍ଧୁ କେଶବ ମିଶ୍ରଙ୍କୁ ବୁଲା ପଶୁଙ୍କ ଦୁଃଖର କଥା ଜଣାଇଥିଲେ । ଏହାପରେ ଦୁହେଁ ଲକଡାଉନ ଆରମ୍ଭ ହେଲା ଦିନଠାରୁ ବୁଲା ଗାଈ ଗୋରୁ ଓ କୁକୁର ମାନଙ୍କୁ ଖାଦ୍ୟ ଯୋଗାଉଛନ୍ତି।
ସେମାନେ କୌଣସି ସରକରୀ ସହାୟତା ପାଇଁ ହାତ ପକାଇ ନାହାନ୍ତି। ସେମାନେ ନିଜ ଅନ୍ୟ କିଛି ସାଙ୍ଗଙ୍କ ସହ ମିଶି ଏକ ଅଟୋରେ ଗୋଖାଦ୍ୟ ଧରି ସହରର ଗଳି କନ୍ଧି ଓ ଛକକୁ ଯାଇ ଗାଈ ଗୋରୁ ଓ କୁକୁର ମାନଙ୍କୁ ଖାଦ୍ୟ ଦେଉଛନ୍ତି। ଗାଈ ଗୋରୁଙ୍କ ପାଇଁ ଗୋଖାଦ୍ୟ ଦାନା, ଘାସ ଓ କୁକୁର ମାନଙ୍କ ପାଇଁ ଭାତ ଓ ମାଂସ ଖାଇବାକୁ ଦେଉଛନ୍ତି।ଗୋଟିଏ ଦିନରେ ଏମାନେ 100 ଗାଈ ଗୋରୁ ଓ 400 ରୁ 500 କୁକୁର ଙ୍କୁ ଖାଦ୍ୟ ପ୍ରସ୍ତୁତ କରି ଦେଉଛନ୍ତି।ଏହା ସବୁ ନିଜ ଖର୍ଚ୍ଚରୁ କରୁଛନ୍ତି। ଦିନ 12 ଟାରୁ ଅପରାହ୍ନ 4 ଟା ପର୍ଯ୍ୟନ୍ତ ସହର ସାରା ବୁଲି ଏହି ଦୁଇ ବନ୍ଧୁ ବୁଲା ପଶୁଙ୍କୁ ଖାଦ୍ୟ ବାଣ୍ଟୁଛନ୍ତି।
ସମ୍ବଲପୁରରୁ ବାଦଶାହା ଜୁସ୍ମନ ରାଣା, ଇଟିଭି ଭାରତ
