ସମ୍ବଲପୁର: ଯୁବ ଇଞ୍ଜିନିଅରଙ୍କ ନୂଆ ଆବିଷ୍କାର । ଏଣିକି ଉଦ୍ଧାର କାର୍ଯ୍ୟରେ ହେବନି ସମସ୍ୟା । ସ୍ବଳ୍ପ ଖର୍ଚ୍ଚରେ ତିଆରି କରିଲେ ଭିକ୍ଟିମ ଡିଟେକ୍ସନ କ୍ୟାମେରା । ଏଣିକି 50 ଫୁଟ ଗଭୀରତାରେ ରେକର୍ଡ ହୋଇପାରିବ ଅଡିଓ ଏବଂ ଭିଡିଓ । ଏଣିକି ରେସ୍ୟୁରେ ହେବନି ସମସ୍ୟା କି ଯିବନି ଜୀବନ ! ନିଜ ଉଦ୍ୟମରେ ଅତି କମ ଖର୍ଚ୍ଚରେ ଭିକ୍ଟିମ ଡିଟେକ୍ସନ କ୍ୟାମେରା ତିଆରି କଲେ ସମ୍ବଲପୁର ଜିଲ୍ଲାର ରମ୍ପେଲା ଗାଁର ଯୁବ ଇଞ୍ଜିନିୟର ଆଶିଷ ମାହାଣା । ଗତ ମଙ୍ଗଳବାର ଦିନ ରେଙ୍ଗାଲି ଥାନା ଲାରିପାଲି ଠାରେ ବୋରଓ୍ବେଲରୁ ନବଜାତକକୁ ଉଦ୍ଧାର ପାଇଁ ଭିକ୍ଟିମ ଡିଟେକ୍ସନ କ୍ୟାମେରାର ଗୁରୁତ୍ବପୂର୍ଣ୍ଣ ଭୂମିକା ରହିଥିବା ବେଳେ ଏବେ ଏହାକୁ ସ୍ବଳ୍ପ ଖର୍ଚ୍ଚରେ ତିଆରି କରି ଚର୍ଚ୍ଚାକୁ ଆସିଛନ୍ତି ଆଶିଷ ମାହାଣା ।
ମାତ୍ର 10 ହଜାର ଟଙ୍କାରେ ଭିକ୍ଟିମ ଡିଟେକ୍ସନ କ୍ୟାମେରା: ବୋରଓ୍ବେଲରୁ ନବଜାତକକୁ ଉଦ୍ଧାର ପାଇଁ ଭୁବନେଶ୍ବରରୁ ଭିକ୍ଟିମ ଡିଟେକ୍ସନ କ୍ୟାମେରା ଅଣାଯାଇଥିବା ବେଳେ ଗୁରୁତ୍ବକୁ ଦୃଷ୍ଟିରେ ରଖି ମାତ୍ର 2 ଦିନରେ ଏହି କ୍ୟାମେରା ତିଆରି କରିବା କଥା କହିଛନ୍ତି ଆଶିଷ । ମାତ୍ର 10 ହଜାର ଟଙ୍କାରେ ଏହି କ୍ୟାମେରାକୁ ତିଆରି କରିଛନ୍ତି ଯୁବ ବୈଜ୍ଞାନିକ ।
50 ଫୁଟ ଗଭୀରତାରେ ରେକର୍ଡ ହୋଇପାରିବ ଅଡିଓ ଏବଂ ଭିଡିଓ: ଏହି କ୍ୟାମେରାରେ ଗୋଟିଏ ଛୋଟ ମନିଟର, 5 ମେଗାଫିକସେଲ କ୍ୟାମେରା,12 ଭୋଲଟ ରିଚାର୍ଜେବୁଲ ବ୍ୟାଟେରୀ, ମାଇକ୍ରୋଫୋନ, ବ୍ଲ୍ୟୁ ଟୁଥ, କେବୁଲ, ଚାର୍ଜର ଇତ୍ୟାଦି ବ୍ୟବହାର ହୋଇଛି । 50 ଫୁଟ ଗଭୀର ଅଥବା ଦୂରତାରୁ ଏହି କ୍ୟାମେରା ଭିଡିଓ ଉତ୍ତୋଳନ କରିବାର କ୍ଷମତା ରଖିଛି । ଆଶିଷଙ୍କ କହିବା ଅନୁସାରେ, ସେ ଗତ 11 ତାରିଖ ଏହି ଭିକ୍ଟିମ ଡିଟେକ୍ସନ କ୍ୟାମେରା ନିଜ ଶିଳ୍ପ ଅନୁଷ୍ଠାନର ବ୍ୟବହାର ପାଇଁ ନିଜେ ତିଆରି କରିଥିଲେ । ତେବେ ଲାରିପାଲିର ବୋରୱେଲ ଭିତରେ ନବଜାତକ ଶିଶୁକନ୍ୟା ପଡିବା ଘଟଣା ପରେ ଏହି କ୍ୟାମେରାର ଗୁରୁତ୍ୱ ଜାଣି ନିଜେ ତିଆରି କରିଥିବା କ୍ୟାମେରାର କ୍ଷମତା ବୃଦ୍ଧି କରିଥିଲେ ଆଶିଷ । ଏହି କ୍ୟାମେରାରେ 50 ଫୁଟ ଦୂରରୁ ଭିଡିଓ ଓ ଅଡିଓ ରେକର୍ଡ ହୋଇପାରିବ ।
ଏହା ମଧ୍ୟ ପଢନ୍ତୁ: Smart Helmet: ଖରା ବର୍ଷାରୁ ରକ୍ଷା କରିବ ସ୍ମାର୍ଟ ହେଲମେଟ, ମୁଣ୍ଡକୁ ରଖିବ କୁଲ୍
ପ୍ରଶାସନର ସହାୟତା ଲୋଡିଲେ ଆଶିଷ: ଗୁରୁତ୍ବ ବା ଆବଶ୍ୟକତାକୁ ଦୃଷ୍ଟିରେ ରଖି ଆଶିଷ ଏହି କ୍ୟାମେରାକୁ ତିଆରି କରିଥିବା ବେଳେ ଏହାକୁ କାର୍ଯ୍ୟରେ ବ୍ୟବହାର କରିବା ପାଇଁ ଜିଲ୍ଲା ପ୍ରଶାସନର ସହାୟତା ଲୋଡିଛନ୍ତି । ସାହାଯ୍ୟ ସହଯୋଗ ଦ୍ବାରା ଏହାକୁ କୌଣସି ଉଦ୍ଧାର କାର୍ଯ୍ୟରେ ବ୍ୟବହାର କରାଯାଇ ପାରିବ ଏବଂ ଏହାସହିତ ଆର୍ଥିକ ସହାୟତା ଦେଲେ ଏହାକୁ ଆହୁରି ଉଚ୍ଚ ଶକ୍ତି ସମ୍ପନ୍ନ କରାଯାଇ ପାରିବ ବୋଲି କହିଛନ୍ତି ଆଶିଷ । ତେବେ ବର୍ତ୍ତମାନ ପରିସ୍ଥିତିରେ କୌଣସି ଉଦ୍ଧାର କାର୍ଯ୍ୟ ପାଇଁ ଏହି କ୍ୟାମେରାର ଆବଶ୍ୟକତା ପଡିଲେ ବିନା ମୂଲ୍ୟରେ କ୍ୟାମେରା ଦେଇ ସାହାଯ୍ୟ କରିବେ ବୋଲି ସେ କହିଛନ୍ତି ।
ପେସାରେ ଆଶିଷ ଜଣେ ଇଞ୍ଜିନିୟର: ପେସାରେ ଇଞ୍ଜିନିଅର ହୋଇଥିବା ଆଶିଷଙ୍କର ନୂଆ ନୂଆ ବସ୍ତୁ ଉଦ୍ଭାବନ କରିବା ନିଶା ବୋଲି ସେ କହିଛନ୍ତି । ପୂର୍ବରୁ ସେ ଅଲ ୱେଦର ହେଲମେଟ, ରୋବୋଟିକ ନର୍ସ ପରି ଅନେକ ଉଦ୍ଭାବନ କରିଛନ୍ତି। ସେ ଇଲେକ୍ଟ୍ରୋନିକ୍ସ ଓ କମ୍ପ୍ୟୁଟର ହାର୍ଡୱେରରେ ଡିପ୍ଲୋମା କରିଥିବା ବେଳେ MBA ମଧ୍ୟ କରିଛନ୍ତି।
ଇଟିଭି ଭାରତ, ସମ୍ବଲପୁର
