ପ୍ରାଣୀଜଗତ ପାଇଁ ବରଦାନ ସୁବ୍ରତ, ଘର ଚଟିଆର ସଂରକ୍ଷଣ ପାଇଁ ଘରକୁ କଲେ ପକ୍ଷୀ ଉଦ୍ୟାନ

ଘରର ଚଢେଇ ଘର ଚଟିଆ । କିଚିରି ମିଚିରି ଶବ୍ଦ ତାର ପରିଚୟ । କଂକ୍ରିଟ ଯୁଗରେ ଆଉ ଶୁଭିବାକୁ ମିଳୁନି ତାର ମଧୁର ରାବ । ହେଲେ ଏହି ପକ୍ଷୀ ବଂଶକୁ ବଞ୍ଚାଇବାକୁ ଆଗେଇ ଆସିଛନ୍ତି ସମ୍ବଲପୁର SRIT କଲୋନୀର ଅଧିବାସୀ ତଥା ପକ୍ଷୀପ୍ରେମୀ ସୁବ୍ରତ ନାଥ । ଦେଖନ୍ତୁ ଏହି ରିପୋର୍ଟ

ସମ୍ବଲପୁର: ଆଉ ଶୁଭୁନାହିଁ କିଚିରି ମିଚିରି ଶବ୍ଦ । ଧୀରେ ଧୀରେ ବିଲୁପ୍ତ ପ୍ରାୟ ହେବାକୁ ବସିଲେଣି ଘରର ଚଢେଇ ଘର ଚଟିଆ । ପୂର୍ବରୁ ସେ ଘରର ଚାଳ ଛପର ହେଉ ଅବା କାନ୍ଥ, ଯେଉଁଠି ଦେଖିଲେ ଦିଶୁଥିଲା ଶୁଭ୍ର ମାଟିଆ ରଙ୍ଗରେ ଚଢେଇ । ଆଉ କିଚିରି ମିଚିରି ଶବ୍ଦରେ ପଲ୍ଲୀ ଜୀବନରେ ମଧୁରତା ଭରୁଥିଲା । ହେଲେ ସଭ୍ୟ, ସମାଜର ପରିବର୍ତ୍ତନ ସାଙ୍ଗକୁ ଲିଭିଗଲାଣି ଘର ଚଟିଆର ଚିହ୍ନବର୍ଣ୍ଣ । ହେଲେ ଏହି ବିଲୁପ୍ତ ପ୍ରାୟ ପକ୍ଷୀର ବଂଶ ରକ୍ଷା ପାଇଁ ଆଗେଇ ଆସିଛନ୍ତି ଜିଲ୍ଲାର SRIT କଲୋନୀର ଅଧିବାସୀ ସୁବ୍ରତ ନାଥ । ଚାକିରି ଜୀବନର ବ୍ୟସ୍ତତା ମଧ୍ୟରେ ଏହି ପକ୍ଷୀକୁ ବାସସ୍ଥାନ ଯୋଗାଇବାକୁ ସେ ନିଜ ଘରକୁ ପକ୍ଷୀ ଉଦ୍ୟାନରେ ପରିଣତ କରିଛନ୍ତି । ଆଉ ସେଠାରେ ଚଟିଆଙ୍କ ପାଇଁ ବସା ଗଢିଛନ୍ତି ।

ଯେଉଁ ପକ୍ଷୀର କିଚିରି ମିଚିରି ଶବ୍ଦ ସକାଳ ପାହିଲେ ଶୁଣିବାକୁ ମିଳୁଥିଲା ଏବେ ତାହା ଶୁଣିବାକୁ ମିଳୁନାହିଁ l ଗାଁ ଗହଳିରେ ତ ଏହି ପକ୍ଷୀ ବଞ୍ଚି ରହିଛନ୍ତି ତେବେ ସହରରେ ବ୍ୟାପକ ଗଛ କଟା ଓ କଂକ୍ରିଟ ଜଙ୍ଗଲ ଭିତରେ ଏହି ପକ୍ଷୀ ବଞ୍ଚିବାକୁ ସଂଘର୍ଷ କରୁଛି l ଏହିଭଳି ସ୍ଥିତିରେ ସମ୍ବଲପୁରର ଯୁବକ ସୁବ୍ରତ ନାଥ ଘର ଚଟିଆଙ୍କ ସୁରକ୍ଷା ପାଇଁ ଉଦ୍ୟମ ଆରମ୍ଭ କରିଛନ୍ତି l ସେ ନିଜ ଘରେ ଘର ଚଟିଆଙ୍କ ପାଇଁ ତିଆରି କରିଛନ୍ତି ବସା l ଏହା ସହ ଘର ଚଟିଆଙ୍କ ପାଇଁ ପ୍ରକୃତିକ ପରିବେଶ ମଧ୍ୟ ସୃଷ୍ଟି କରିଛନ୍ତି ସୁବ୍ରତ l କେତେକ ପ୍ରକାର ଫୁଲ ଗଛ ଲଗାଇଛନ୍ତି ଏହି ବସାଗୁଡିକ ପାଖରେ l ଆଉ ଘର ଚଟିଆଙ୍କ ପାଇଁ ସକାଳ ଆଉ ସଞ୍ଜ ସବୁ ସମୟ ପାଇଁ ସେ ଖାଦ୍ୟ ଓ ପାନୀୟ ଜଳର ବ୍ୟବସ୍ଥା କରିଛନ୍ତି l ସକାଳ ୮ଟାରେ ସେ ଚାକିରି କରିବାକୁ ବାହାରୁଥିବା ବେଳେ ରାତିରେ ୭ଟାରେ ଫେରନ୍ତି l ଏଥିପାଇଁ ସକାଳ ୫ଟାରୁ ଉଠି ଏହି ପକ୍ଷୀମାନଙ୍କ ସେ ଖାଦ୍ୟର ବ୍ୟବସ୍ଥା କରନ୍ତି l

ଏହା ବି ପଢନ୍ତୁ- ସରଗଠୁ ସୁନ୍ଦର ବିହଙ୍ଗ ବଣ; ପଶୁ-ପକ୍ଷୀଙ୍କୁ ମିଳୁଛି ଖାଦ୍ୟ, ଆତ୍ମତୃପ୍ତି ଲଭନ୍ତି ବିଧାନ

କେମିତି ଥିଲା ଏହି ଯାତ୍ରା:- ଏଥିପାଇଁ ସୁବ୍ରତଙ୍କ ବହୁ ପରିଶ୍ରମ କରିବାକୁ ପଡିଥିଲା l ପ୍ରଥମେ ସେ ଯେତେବେଳେ ନିଜ ଘରେ ବସା ତିଆରି କଲେ ଗୋଟିଏ ମଧ୍ୟ ଚଟିଆ ଏଠାରେ ରହିବାକୁ ଆସିଲେ ନାହିଁ । ୩ ମାସ ପରେ ଗୋଟିଏ ଚଟିଆ ଆସିଲା ଓ ଧୀରେ ଧୀରେ ବର୍ତ୍ତମାନ ତାଙ୍କ ଘରେ ୧୦୦ଟି ଘର ଚଟିଆ ରହୁଛନ୍ତି l ଏହି ପକ୍ଷୀର ବଂଶ ହ୍ରାସ ସମ୍ପର୍କରେ ସୁବ୍ରତ କହିଛନ୍ତି, " ଗଛକଟା, କଂକ୍ରିଟକରଣ, ଚାଷ ଜମିରେ ଅତ୍ୟଧିକ କୀଟନାଶକର ବ୍ୟବହାର ଓ ମୋବାଇଲ ଟାୱାରର ରେଡ଼ିଏସନ ଯୋଗୁଁ ଘର ଚଟିଆଙ୍କ ବଂଶ ବିସ୍ତାର ହୋଇପାରୁନି । ଏଣୁ ଧୀରେ ଧୀରେ ଏହି ପକ୍ଷୀ ଦୃଶ୍ୟମାନ ବି ହେଉନାହାନ୍ତି ।"

ତେବେ ସୁବ୍ରତ ଯେ କେବଳ ଘର ଚଟିଆଙ୍କ ପାଇଁ କାମ କରୁଛନ୍ତି ତାହା ନୁହେଁ ସେ ପରିବେଶ ସୁରକ୍ଷା, ବୃକ୍ଷରୋପଣ ଆଦି କ୍ଷେତ୍ରରେ ବନ ବିଭାଗ ସହ ମିଶି କାମ କରୁଛନ୍ତି l ଏହା ସହ ସେ ମଧ୍ୟ ଜଣେ ୱାଇଲ୍ଡ ଲାଇଫ ଫଟୋଗ୍ରାଫର । ସୁବ୍ରତଙ୍କ ଏହି କାର୍ଯ୍ୟରେ ତାଙ୍କ ପିତାମାତାଙ୍କ ବହୁ ସହଯୋଗ ଥିବା ବେଳେ ଆମେରିକାରେ ରହୁଥିବା ତାଙ୍କ ଭଉଣୀ ପକ୍ଷୀ ସୁରକ୍ଷା ପାଇଁ କାର୍ଯ୍ୟ କରୁଛନ୍ତି l ଚାକିରି କରିବା ସହ ସତେ ଯେମିତି ଘର ଚଟିଆଙ୍କ ସୁରକ୍ଷାର ବ୍ରତ ନେଇଛନ୍ତି ସୁବ୍ରତ l ସେଥିପାଇଁ ତ ତାଙ୍କ ଘରେ ସକାଳେ ଓ ସନ୍ଧ୍ୟାରେ ଶହ ଶହ ଘର ଚଟିଆଙ୍କ କିଚିରି ମିଚିରି ଶବ୍ଦ ଶୁଭିଥାଏ l

ଇଟିଭି ଭାରତ, ସମ୍ବଲପୁର