ସମ୍ବଲପୁର: ବୁର୍ଲାଠାରେ ଥିବା ଏମସିଏଲ ବା ମହାନଦୀ କୋଲଫିଲଡ ଲିମିଟେଡର ରବିବାର ନୂଆ ଚେୟାରମ୍ୟାନ୍ ତଥା ପରିଚାଳନା ନିର୍ଦ୍ଦେଶକ ଭାବେ ପି କେ ସିହ୍ନା ଯୋଗ ଦେଇଛନ୍ତି । ଭବିଷ୍ୟତରେ କୋଇଲା ଉତ୍ତୋଳନ କ୍ଷେତ୍ରରେ ଏମସିଏଲର ଉଲ୍ଲେଖନୀୟ ଅବଦାନ ରହିବ ବୋଲି କହିଥିବା ଜଣାପଡିଛି ।
ମିଳିଥିବା ସୂଚନା ଅନୁସାରେ ପି କେ ସିହ୍ନା ରବିବାର ବୁର୍ଲାଠାରେ ଥିବା ଏମସିଏଲ ମୁଖ୍ୟାଳୟରେ ପହଞ୍ଚିଥିଲେ । ତେବେ ସେ କାର୍ଯ୍ୟରେ ଯୋଗ ଦେବା ପୂର୍ବରୁ ପଶ୍ଚିମ ଓଡିଶାର ଅଧିଷ୍ଠାତ୍ରୀ ଦେବୀ ମା ସମଲେଶ୍ବରୀଙ୍କ ମନ୍ଦିରକୁ ଦର୍ଶନ କରିବା ଲାଗି ଯାଇଥିଲେ । କୋରୋନା କଟକଣା ମନ୍ଦିରରେ ଲାଗୁ ହୋଇଥିବାରୁ ମନ୍ଦିରର ବାହାର ପାର୍ଶ୍ବରେ ସେ ପୂଜାର୍ଚ୍ଚନା କରିବା ସହ ମା'ଙ୍କ ଆଶୀର୍ବାଦ ନେଇଥିବା ଜଣାପଡିଛି ।
ମନ୍ଦିରକୁ ଦର୍ଶନ କରିବା ସମୟରେ ତାଙ୍କ ପତ୍ନୀ ଓ ଏମସିଏଲର ମୁଖ୍ୟ ମ୍ୟାନେଜର ରାଜେନ୍ଦ୍ର ପ୍ରସାଦ ନନ୍ଦ ସମେତ ଅନ୍ୟ ପ୍ରମୁଖ ଅଧିକାରୀମାନେ ଉପସ୍ଥିତ ଥିଲେ । ପି କେ ସିହ୍ନା ସିଏମଡି ବା ଚେୟାରମ୍ୟାନ ତଥା ପରିଚାଳନା ନିର୍ଦ୍ଦେଶକ ଭାବେ ଯୋଗ ଦେବା ପରେ କୋଇଲା ଉତ୍ତୋଳନ କ୍ଷେତ୍ରରେ ଭବିଷ୍ୟତରେ ଉନ୍ନତି ଆସିବା ସହ ଏମସିଏଲର ଉଲ୍ଲେଖନୀୟ ଅବଦାନ ରହିବ ବୋଲି ସେ କହିଛନ୍ତି ।
ପି କେ ସିହ୍ନା ଆଇଆଇଟି (ଆଇଏସ୍ଏମ୍) ଧାନବାଦରୁ ଏମ ଟେକ୍, ଏନଆଇଟି ରାୟପୁରରୁ ଜଣେ ଖଣି ଇଞ୍ଜିନିୟରିଂ ଭାବେ ସ୍ନାତକ ଡିଗ୍ରୀ ହାସଲ କରିଛନ୍ତି । କୋଇଲା ଖନନ ଏବଂ ଭୂତଳ ଖଣିରେ ସିହ୍ନାଙ୍କର 37 ବର୍ଷରୁ ଅଧିକ ସମୟର ବିବିଧ ଅଭିଜ୍ଞତା ରହିଛି । ସେ ପୂର୍ବରୁ ଅନେକ ଗୁରୁତ୍ବପୂର୍ଣ୍ଣ ପଦବୀରେ କାର୍ଯ୍ୟ କରିଛନ୍ତି । ସିଏମଡି ଭାବରେ ଏମସିଏଲରେ ଯୋଗଦେବା ପୂର୍ବରୁ ସିହ୍ନା ବିଳାସପୁର ଦକ୍ଷିଣ ପୂର୍ବାଞ୍ଚଳ କୋଲଫିଲ୍ଡ ଲିମିଟେଡ୍ (ଏସଇସିଏଲ)ରେ ନିର୍ଦ୍ଦେଶକ ଥିଲେ |
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
