ସମ୍ବଲପୁର: ସମ୍ବଲପୁର ବୁର୍ଲା ଭୀମସାର ମେଡ଼ିକାଲର ଡାକ୍ତର ତଥା ସମାଜସେବୀ ଶଙ୍କର ରାମଚନ୍ଦାନୀଙ୍କୁ କିଏ ବା ନଜାଣେ । ଭୀମସାର ମେଡ଼ିକାଲରେ ଯଦି କୌଣସି ଅସୁବିଧା ହୁଏ ତାହେଲେ ଡାକ୍ତର ରାମଚନ୍ଦାନୀଙ୍କୁ ଖୋଜାଯାଏ । ଯେ କୌଣସି ପ୍ରକାରେ ସେ ସମସ୍ତ ବର୍ଗର ଲୋକଙ୍କୁ ସହାୟତା ପ୍ରଦାନ କରନ୍ତି । ଦୁଇ ବର୍ଷ ତଳେ ସେ ବୁର୍ଲା ସ୍ଥିତ ନିଜ ଭଡା ଘରେ ଟଙ୍କିଆ କ୍ଲିନିକ ଖୋଲିଥିଲେ । ଏହି କ୍ଲିନିକ ରେ ଡାକ୍ତରଙ୍କ ଫିସ ମାତ୍ର 1 ଟଙ୍କା । ରୋଗୀ ଙ୍କୁ ଔଷଧ ମଧ୍ୟ ମାଗଣା ଦିଆଯାଏ। କିଛି ଦିନ ତଳେ ସେ କେନ୍ଦ୍ରାପଡା ଠାରେ ମଧ୍ୟ ଏକ ଟଙ୍କିଆ କ୍ଲିନିକ ଖୋଲିଛନ୍ତି।
ଏଥିରେ ତାଙ୍କୁ ତାଙ୍କର ସହଯୋଗୀ ଡାକ୍ତର ମାନେ ମଧ୍ୟ ସହଯୋଗ କରୁଛନ୍ତି । ତେବେ ବର୍ତ୍ତମାନ ମୁଖ୍ୟତଃ ଗରିବ ଶ୍ରେଣୀର ଲୋକଙ୍କ ଯିବା ଆସିବା ପାଇଁ ସେ ନିଜର କାର କୁ ଉତ୍ସର୍ଗ କରିଛନ୍ତି । ସେଥିପାଇଁ ସେ ନିଜ କାର ରେ ଲେଖିଛନ୍ତି ଯେ ମୁଁ ଜଣେ ଡାକ୍ତର, ଆବଶ୍ୟକ ପଡ଼ିଲେ ମୋତେ ଅଟକାଇ ପାରିବେ। କାର୍ଯ୍ୟରେ ତାଙ୍କୁ ସହଯୋଗ କରୁଛନ୍ତି କିଛି ସହପାଠୀ ଡାକ୍ତର। ଡାକ୍ତରଙ୍କ ଏହି ପଦକ୍ଷେପ ପାଇଁ ଏବେ ତାଙ୍କ ପାଖକୁ ପ୍ରଶଂସା ର ସୁଅ ଛୁଟୁଛି ।
ଇଟିଭି ଭାରତ, ସମ୍ବଲପୁର
