ସମ୍ବଲପୁର: ଗଙ୍ଗାଧର ମେହେର ବିଶ୍ବବିଦ୍ୟାଳୟର 75 ତମ ପ୍ରତିଷ୍ଠା ଦିବସ ବା ପ୍ଲାଟିନମ ଜୁବଲି ଉତ୍ସବ ସମ୍ବଲପୁର ତପସ୍ବନୀ ପ୍ରେକ୍ଷାଳୟରେ ଅନୁଷ୍ଠିତ ହୋଇଯାଇଛି । ଏହି କାର୍ଯ୍ୟକ୍ରମରେ ସ୍ବାସ୍ଥ୍ୟ ମନ୍ତ୍ରୀ ନବ କିଶୋର ଦାସ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ବହୁ ମାନ୍ୟ ଗନ୍ୟ ବ୍ୟକ୍ତି ଯୋଗ ଦେଇଥିଲେ ।
କାର୍ଯ୍ୟକ୍ରମରେ କୁଚିଣ୍ଡା ବିଧାୟକ କିଶୋର ଚନ୍ଦ୍ର ନାଏକ, ରେଢ଼ାଖୋଲ ବିଧାୟକ ରୋହିତ ପୂଜାରୀ, ରାଜ୍ୟପାଳଙ୍କ ପ୍ରମୁଖ ସଚିବ ମଧୁସୂଦନ ପାଢ଼ୀ, ସମ୍ବଲପୁର ବିଶ୍ବ ବିଦ୍ୟାଳୟର କୁଳପତି ଦୀପକ କୁମାର ବେହେରାଙ୍କ ସହ ଜିଏମୟୁର କୁଳପତି ଅତନୁ ପତି ପ୍ରମୁଖ ଉପସ୍ଥିତି ଥିଲେ । ଏହି ଅବସରରେ ପ୍ଲାଟିନମ ଜୁବଲିର ଏକ ପୋଷ୍ଟର ରିଲିଜ କରାଯିବା ସହ ଜିଏମୟୁରେ ଭୀମ ବୋଇ ରିସର୍ଚ୍ଚ ଚେୟାର ଶୁଭାରମ୍ଭ କରଯାଇଛି ।
ଏହାସହ ନୂତନ ଭାବେ ଲାଇବ୍ରେରୀ ଆଣ୍ଡ ଇମ୍ଫର୍ମେସନ ସାଇନ୍ସ ବିଭାଗ, ବାୟୋ ଟେକ୍ନୋଲୋଜି, ସୋସିଓଲୋଜି ଓ ଆନ୍ଥରୋପୋଲୋଜି ବିଭାଗ ଶୁଭାରମ୍ଭ କରାଯାଇଛି । ଏହି ଅନୁଷ୍ଠାନର ପୁରାତନ ଛାତ୍ର ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସ ରାଜ୍ୟରେ ସ୍ବାସ୍ଥ୍ୟ ବିଭାଗ ନେଇ ବହୁ ଗୁରୁତ୍ବପୂର୍ଣ୍ଣ କଥା କହିଥିଲେ । ଆଗାମୀ ଦିନରେ ରାଜ୍ୟର ପୁରୀ, ତାଳଚେର ଓ ସୁନ୍ଦରଗଡ଼ରେ ନୂଆ ମେଡିକାଲ କଲେଜ ସ୍ଥାପନ ହେବ ବୋଲି ସ୍ବାସ୍ଥ୍ୟ ମନ୍ତ୍ରୀ କହିଛନ୍ତି ।
ଆଗାମୀ 2 ବର୍ଷ ମଧ୍ୟରେ ରାଜ୍ୟରେ ଡାକ୍ତର ଅଭାବର ସମସ୍ୟା ଦୂର ହେବ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି । ଏହା ସହ ବୁର୍ଲା ମେଡ଼ିକାଲର ସମସ୍ତ ସମସ୍ୟା ଧୀରେ ଧୀରେ ଦୂର କରାଯିବ ବୋଲି ସ୍ବାସ୍ଥ୍ୟ ମନ୍ତ୍ରୀ କହିଛନ୍ତି । ଏହି କାର୍ଯ୍ୟକ୍ରମରେ ସମ୍ବଲପୁର ଜିଏମ ବିଶ୍ବ ବିଦ୍ୟାଳୟର ପୂରାତନ ଛାତ୍ରଛାତ୍ରୀ ମାନେ ମଧ୍ୟ ଉପସ୍ଥିତ ଥିବା ବେଳେ କେତେକ ପୁରାତନ ଛାତ୍ରଙ୍କୁ ସମ୍ମାନିତ କରାଯାଇଥିଲା ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
