ସମ୍ବଲପୁର: ବାମରାରେ ଟ୍ରେନ ରହଣି ଦାବିରେ ରେଳ ରୋକ (RAIL ROKO PROTEST IN BAMRA) । ବାମରା ରେଳ ଷ୍ଟେସନରେ ୧୦ଗୋଟି ଟ୍ରେନ ରହଣି ଦାବିରେ ସ୍ଥାନୀୟ ବାସିନ୍ଦାଙ୍କ ସହ ରେଳ କ୍ରିୟାନୁଷ୍ଠାନ କମିଟି ପକ୍ଷରୁ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ରେଳ ରୋକ କରାଯିବା ସହ ବାମରା ବନ୍ଦ ଡାକରା ଦିଆଯାଇଛି । ଏହି ଆନ୍ଦୋଳନ ଦ୍ୱାରା ହାୱାଡା-ମୁମ୍ବାଇ ରେଳପଥ ପ୍ରଭାବିତ ହୋଇଛି ।
ସୂଚନାଅନୁଯାୟୀ, ସମ୍ବଲପୁର ଜିଲ୍ଲାର ବାମରା ଠାରେ ଉତ୍କଳ ଏକ୍ସପ୍ରେସ, ଇସ୍ପାତ ଏକ୍ସପ୍ରେସ, ଧାନବାଦ ଏଲିପି ଏକ୍ସପ୍ରେସ, ଟାଟା ଏର୍ଣ୍ଣକୂଲମ ଏକ୍ସପ୍ରେସ, ସମ୍ବଲପୁର ଜମ୍ବୁ ତାବି ଏକ୍ସପ୍ରେସ ଆଦି ମୋଟ ୧୦ ଗୋଟି ଟ୍ରେନର ରହଣି ଦାବୀରେ ଏହି ରେଳ ରୋକ କରାଯାଇଛି । ଆଜି ସକାଳୁ ରେଳ ଧାରଣା ଉପରେ ଶତାଧିକ ଆନ୍ଦୋଳନକାରୀ ବସି ରହି ପ୍ରତିବାଦ ଜାରି ରଖିଛନ୍ତି ।
ବାମରା ରେଳ କ୍ରିୟାନୁଷ୍ଟାନ କମିଟି ଡାକରା ଦେଇଥିବା ଏହି ଆନ୍ଦୋଳନରେ ବିଭିନ୍ନ ସ୍ବେଚ୍ଛାସେବୀ ସଙ୍ଗଠନ, ବ୍ୟବସାୟୀ ସଂଘ, ଡ୍ରାଇଭର ସଙ୍ଘ, ସ୍ୱୟଂ ସହାୟକ ଗୋଷ୍ଠୀର ମହିଳା, ବୁଦ୍ଧିଜୀବୀ ସହ ବିଭିନ୍ନ ରାଜନୈତିକ ଦଳ ମଧ୍ୟ ସାମିଲ ହୋଇଛନ୍ତି । ଆନ୍ଦୋଳନକାରୀ ରେଳ ଧାରଣାକୁ ଆନ୍ଦୋଳନ କରିବାକୁ ଆସୁଥିବା ବେଳେ ପୋଲିସ ଓ ଆନ୍ଦୋଳନ କାରୀ ମୁହାଁମୁହିଁ ହୋଇଛନ୍ତି । ଘଟଣାସ୍ଥଳରେ ଉତ୍ତେଜନା ଦେଖାଦେଇଛି । ପୋଲିସ ଏବଂ ଆନ୍ଦୋଳନକାରୀ ଧସ୍ତାଧସ୍ତି ହୋଇଛନ୍ତି l
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
