ସମ୍ବଲପୁର: ଆରମ୍ଭ ହୋଇଛି ସମ୍ବଲପୁର ଲୋକ ମହୋତ୍ସବ 2020। ଆସନ୍ତା 6 ତାରିଖ ପର୍ଯ୍ୟନ୍ତ 3 ଦିନ ଧରି ସମ୍ବଲପୁର ଅଇଁଠାପାଲି ସ୍ଥିତ ପିଏଚଡି(ବିର୍ସା ମୁଣ୍ଡା) ପଡ଼ିଆରେ ଅନୁଷ୍ଠିତ ହେବ ଏହି କାର୍ଯ୍ୟକ୍ରମ। ଏହି ସାଂସ୍କୃତିକ ମହାକୁମ୍ଭରେ ରାଜ୍ୟ ତଥା ରାଜ୍ୟ ବାହାରର ବହୁ କଳାକାର ନିଜ ନିଜର କଳା ପରିବେଷଣ କରିବେ।
ଏହି ପ୍ରରିପ୍ରେକ୍ଷୀରେ ଶନିବାର ସମ୍ବଲପୁର ବାଲିବନ୍ଧା ଛକରୁ ଲୋକ ମହୋତ୍ସବର ଏକ ବିଶାଳ ସାଂସ୍କୃତିକ ଶୋଭାଯାତ୍ର ବାହାରି ସହର ପରିକ୍ରମା କରିବା ସହ ବିର୍ସା ମୈଦାନ ପର୍ଯ୍ୟନ୍ତ ଯାଇଥିଲା। ଏଥିରେ ରାଜ୍ୟ ବାହାରର 4ଟି ଦଳ ସହ ରାଜ୍ୟର ବିଭିନ୍ନ ଜିଲ୍ଲାରୁ ଆସିଥିବା ସାଂସ୍କୃତିକ ଦଳ ସାମିଲ ହୋଇଥିଲେ। ଚଳିତ ବର୍ଷ ଏହି ମହୋତ୍ସବରେ ପ୍ରଥମ ଥର ପାଇଁ ପୁଷ୍ପ ପ୍ରଦର୍ଶନୀ ଆୟୋଜିତ ହେଉଛି। ଏହା ସହ ପ୍ରତ୍ୟେକ ଦିନ ଲୋକକଳା ଓ ନୃତ୍ୟ ଉପରେ ସେମିନାର ଓ ବକ୍ତୃତା କାର୍ଯ୍ୟକ୍ରମ ଆୟୋଜିତ ହେବ।
ଶନିବାର ଲୋକ ମହୋତ୍ସବର ଏହି ସାଂସ୍କୃତିକ ଶୋଭାଯାତ୍ରରେ ସମ୍ବଲପୁର ଜିଲ୍ଲାପାଳ, ପିଡ଼ି ଡିଆରଡିଏ, ପୂର୍ବତନ ବିଧାୟିକା ରାସେଶ୍ବରୀ ପାଣିଗ୍ରାହୀ, ପଦ୍ମଶ୍ରୀ ଜିତେନ୍ଦ୍ରୀୟ ହରିପାଲ ଓ ରଙ୍ଗବତୀ ଗୀତର କଳାକାର ପ୍ରମୁଖ ଉପସ୍ଥିତ ରହିଥିଲେ। ବିଭିନ୍ନ କଳାକାର ଦଳର ନାଚ ଗୀତର ତାଳେ ତାଳେ ଶୋଭାଯାତ୍ର ସହର ପରିକ୍ରମା କରିଥିଲା। ଏହି ସାଂସ୍କୃତିକ ମହାକୁମ୍ଭର ଅଂଶ ବିଶେଷ ହୋଇ କଳାକାର ବେଶ ଖୁସିଥିବା କହିଛନ୍ତି।
ପ୍ରଥମ ସନ୍ଧ୍ୟାରେ ସମ୍ବଲପୁର ଜିଲ୍ଲାର 4 ଜଣ ବିଧାୟକଙ୍କ ସହ ପଦ୍ମଶ୍ରୀ ଜିତେନ୍ଦ୍ରୀୟ ହରିପାଲ, ହଳଧର ନାଗ ଯୋଗ ଦେବାକୁ ଥିବା ବେଳେ ରାଜସ୍ଥାନର କାଲବେଲିଆ ନାଚ ଓ ଉତ୍ତର ପ୍ରଦେଶ ମଥୁରାର ମୟୁର ଲୋକ ନୃତ୍ୟ ମୁଖ୍ୟ ଆକର୍ଷଣ ହେବ।
ସମ୍ବଲପୁରରୁ ବାଦଶାହ ଜୁସମନ ରଣା, ଇଟିଭି ଭାରତ
