ସମ୍ବଲପୁର: ପ୍ରଥମେ ପ୍ରେମ ବିବାହ ଓ ପରେ ପ୍ରତାରଣା । ବିବାହର ୭ ବର୍ଷ ପରେ ମହିଳାଙ୍କୁ ଛାଡି ପଳାଇଛନ୍ତି ସ୍ବାମୀ । ଏନେଇ ପୀଡିତା ସମ୍ବଲପୁର ଏସପିଙ୍କ ନିକଟରେ ଅଭିଯୋଗ କରିବା ପରେ ରେଢାଖୋଲ ଏସଡିପିଓ(SDPO) ମାମଲାର ତଦନ୍ତ ଆରମ୍ଭ କରିଛନ୍ତି । ଗତ 14 ତାରିଖରେ ପୀଡିତା ଜଣକ ଏସପିଙ୍କୁ ଭେଟି ଅଭିଯୋଗ କରିଥିଲେ ।
ଅଭିଯୋଗ ଅନୁସାରେ, 2014 ମସିହାରେ ପୀଡିତା ଯୁଜୁମୁରା ଥାନା ଅଞ୍ଚଳର ସୂର୍ଯ୍ୟ ନାରାୟଣ ପ୍ରଧାନ ନାମକ ଜଣେ ଯୁବକଙ୍କୁ ଅନୁଗୁଳ ସ୍ଥିତ ବୁଢ଼ୀ ଠାକୁରାଣୀ ମନ୍ଦିରରେ ପ୍ରେମ ବିବାହ କରିଥିଲେ । ଏହାପରେ ସେମାନେ ଏକାଠି ରହି ଆସୁଥିଲେ । ତେବେ କିଛି ଦିନ ତଳେ ମହିଳା ଜଣକ ଗର୍ଭବତୀ ଥିବାର ତାଙ୍କ ସ୍ୱାମୀ ଜାଣିବା ପରେ ସେ ମେଡ଼ିସିନ ଖୁଆଇ ତାଙ୍କର ଗର୍ଭପାତ କରିଥିଲେ । ଏହାପରେ ଅଭିଯୁକ୍ତ ସ୍ବାମୀ ତାଙ୍କୁ ଆଉ ଗ୍ରହଣ କରୁନଥିବା ଯୁବତୀ ଗତ 14 ତାରିଖରେ ଏସପିଙ୍କ ନିକଟରେ ଅଭିଯୋଗ କରିଥିଲେ । ଅଭିଯୋଗ ପରେ ସମ୍ବଲପୁର ଏସପି ଘଟଣାର ତଦନ୍ତ ନିର୍ଦ୍ଦେଶ ଦେଇଥିଲେ ।
ଆଜି ରେଢ଼ାଖୋଲ SDPO ଏହି ଘଟଣାର ତଦନ୍ତ ପାଇଁ ଯୁବତୀଙ୍କ ଗାଁକୁ ଯାଇ ଛାନଭିନ୍ କରିଛନ୍ତି । ପୀଡିତାଙ୍କ ବୟାନ ରେକର୍ଡ କରାଯିବ ସହ ତାଙ୍କୁ ଡ଼ାକ୍ତରୀ ମାଇନା ଲାଗି ସମ୍ବଲପୁର ମୁଖ୍ୟ ଚିକିତ୍ସାଳୟକୁ ପଠାଯାଇଛି ।
ସମ୍ବଲପୁରରୁ ବାଦଶାହ ଜୁସ୍ମନ ରାଣା, ଇଟିଭି ଭାରତ
