ସମ୍ବଲପୁର: ରେଢ଼ାଖୋଲରେ ହାତୀ ଆତଙ୍କ । ଏକ ହାତୀ ଖାଦ୍ୟ ଅନ୍ବେଷଣରେ ସମ୍ବଲପୁର ଜିଲ୍ଲା ରେଢ଼ାଖୋଲ ରେଞ୍ଜ ଅନ୍ତର୍ଗତ ବଡ଼ମାଲ କୁଂସିପାଣି ଗ୍ରାମକୁ ଚାଲି ଆସିଥିଲା ।
ହାତୀଟି ଗାଁର ଲକ୍ଷପତି ବଗର୍ତ୍ତୀଙ୍କ ଘର ଭିତରକୁ ପଶି ଧାନ ଖାଇବା ପାଇଁ ଚେଷ୍ଟା କରିଥିଲା । ଏହି ସମୟରେ ଘରର କାନ୍ଥ ଭାଙ୍ଗିଯିବା ଫଳରେ କାନ୍ଥ ତଳେ ଲକ୍ଷପତିଙ୍କ ସମେତ ତାଙ୍କ ସ୍ତ୍ରୀ ସବିତା ଏବଂ 2 ବର୍ଷର ଶିଶୁପୁତ୍ର ଚାପି ହୋଇଯାଇଥିଲେ । ଘଟଣା ଘଟିବାର 30 ମିନିଟ ପର୍ଯ୍ୟନ୍ତ ଏହି ପରିବାରର ସମସ୍ତ ସଦସ୍ୟ କାନ୍ଥ ତଳେ ଚାପି ହୋଇ ରହିଯାଇଥିଲେ ।
ହାତୀ ଗଲା ପରେ ଗ୍ରାମବାସୀ 3 ଜଣ ଗୁରୁତରଙ୍କୁ ଉଦ୍ଧାର କରି ରେଢ଼ାଖୋଲ ହସ୍ପିଟାଲରେ ଭର୍ତ୍ତି କରିଛନ୍ତି । ଲକ୍ଷପତିଙ୍କ ଗୋଟିଏ ଗୋଡ଼ ଭାଙ୍ଗିଥିବା ବେଳେ ତାଙ୍କ ସ୍ତ୍ରୀଙ୍କର ହାତ ଗୋଡ଼ ଭାଙ୍ଗିଛି । ଦୀର୍ଘ ଦିନ ହେଲା ରେଢ଼ାଖୋଲ ଅଞ୍ଚଳରେ ହାତୀ ଆତଙ୍କ ଲାଗିରହିଛି । ଏଥିପାଇଁ ବନ ବିଭାଗର ତ୍ରୁଟିପୂର୍ଣ୍ଣ ପରିଚାଳନାକୁ ଦାୟୀ କରିଛନ୍ତି ଗ୍ରାମବାସୀ ।
ସମ୍ବଲପୁରରୁ ବାଦଶାହ ଯୁଶ୍ମନ ରଣା, ଇଟିଭି ଭାରତ
