ସମ୍ବଲପୁର: ରେଳଷ୍ଟେସନ ଗୁଡିକର ଏବେ ଚାଲିଛି ଆଧୁନିକରଣ ପ୍ରକ୍ରିୟା । ମୁଖ୍ୟତଃ ଟ୍ରେନ ଯାତ୍ରୀଙ୍କ ସୁରକ୍ଷା ପାଇଁ ମାନବ ସମ୍ବଳ ଓ ସୁରକ୍ଷା ଦୃଷ୍ଟିକୋଣରୁ ଭିତ୍ତିଭୂମିର ବିକାଶ ଉପରେ କେନ୍ଦ୍ର ସରକାର ବିଶେଷ ଗୁରୁତ୍ବ ଦେଉଛନ୍ତି । ତେବେ ଏହି ଆଧୁନିକରଣ ପ୍ରକ୍ରିୟାରେ ସାମିଲ ହୋଇଛି ସମ୍ବଲପୁର ରେଳଷ୍ଟେସନ । ଜିଲ୍ଲାର କ୍ଷେତ୍ରରାଜପୁର ଷ୍ଟେସନରେ ସିସିଟିଭି କ୍ୟାମେରା ଲଗାଯାଇ ସାରିଥିବା ବେଳେ ଆଗକୁ ଅନ୍ୟ ପ୍ରମୁଖ ଷ୍ଟେସନ ଗୁଡିକରେ ମଧ୍ୟ ସିସିଟିଭି ଲଗାଯିବାର ଯୋଜନା ଚାଲିଛି ।
ତେବେ ଏହି ଷ୍ଟେସନର ପ୍ରମୁଖ 16ଟି ସ୍ଥାନରେ ସିସିଟିଭିର ପଇଁତରା ରହିଛି । ପଶ୍ଚିମ ଓଡ଼ିଶାରେ ଏହା ଏକ ପ୍ରମୁଖ ରେଳ ଜଙ୍ଗସନ୍ ହୋଇଥିବାରୁ ଅପରାଧୀ କାର୍ଯ୍ୟକଳାପ ଉପରେ ନଜର ରଖିବାକୁ ଏପରି ପଦକ୍ଷେପ ନିଆଯାଇଛି । ସିସିଟିଭି କଣ୍ଟ୍ରୋଲ ରୁମରୁ ଏକା ସାଙ୍ଗରେ ସମଗ୍ର ଷ୍ଟେସନର ଗତିବିଧି ଉପରେ ନଜର ରଖାଯାଉଛି । ଏହା ଦ୍ବାରା ଅପରାଧୀଙ୍କୁ ସହଜରେ ଟ୍ରାକ କରାଯାଇ ପାରିବ ବୋଲି କୁହାଯାଉଛି ।
କେନ୍ଦ୍ର ସରକାରଙ୍କ ମହିଳା ଓ ଶିଶୁ କଲ୍ୟାଣ ବିଭାଗରର ନିର୍ଭୟା ପାଣ୍ଠିର ତଦାରଖରେ ସବୁ ପ୍ରମୁଖ ଷ୍ଟେସନ ଗୁଡିକରର ସିସିଟିଭି ଲଗାଯାଉଛି । ରେଳବାଇର ପିଏସୟୁ କମ୍ପାନୀ ଏହାର ଟେଣ୍ଡର ନେଇଛି । ତେବେ ଆସନ୍ତା ଏକ ବର୍ଷ ମଧ୍ୟରେ ଜିଲ୍ଲାର ବହୁ ପ୍ରମୂଖ ଷ୍ଟେସନରେ ସିସିଟିଭି ଲାଗିଯିବ ବୋଲି ଆରପିଏଫ ଆଇଜି ସୂଚନା ଦେଇଛନ୍ତି ।
ସମ୍ବାଲପୁରରୁ ବାଦଶାହ ଜୁସମନ ରଣା, ଇଟିଭି ଭାରତ
