ସମ୍ବଲପୁର: ପୁଣି ଚର୍ଚ୍ଚାରେ ବୁର୍ଲା ଭୀମସାର ମେଡିକାଲ । ଜଣେ ଏଡସ ରୋଗୀର ଅସ୍ତ୍ରୋପଚାର କରି ଏବେ ଚର୍ଚ୍ଚାର ପରିସରକୁ ଆସିଛନ୍ତି ବୁର୍ଲା ଡାକ୍ତର । ଡାକ୍ତରଙ୍କ କହିବା କଥା ହେଲା ରୋଗୀଟି ଏଡସ ଆକ୍ରାନ୍ତ ବୋଲି ଜାଣି ମଧ୍ୟ ରୋଗୀର ଜୀବନ ବଞ୍ଚାଇବାକୁ ଯାଇ ନିଜ ଜୀବନକୁ ବିପଦରେ ପକାଇ ସେ ଅସ୍ତ୍ରୋପଚାର କରିଥିଲେ । ମାତ୍ର ତାଙ୍କୁ ଫସାଇବାକୁ ଚେଷ୍ଟା କରାଯାଉଛି। ଏହି ଘଟଣାରେ କୌଣସି ପକ୍ଷ ଡାକ୍ତରଙ୍କ ବିରୁଦ୍ଧରେ ଅଭିଯୋଗ କରିନଥିଲେ ମଧ୍ୟ କିଛି ଲୋକ ଏମିତି ବିବାଦ ସୃଷ୍ଟି କରି ତାଙ୍କୁ ଫସାଇବାକୁ ଚେଷ୍ଟା କରୁଥିବାର ଅଭିଯୋଗ କରିଛନ୍ତି ଡାକ୍ତର।
ସମ୍ବଲପୁର ବୁର୍ଲା ଭୀମସାରର ଦନ୍ତ ବିଭାଗର ଡାକ୍ତର ପ୍ରଶାନ୍ତ କୁମାର ସ୍ବାଇଁଙ୍କୁ ଫସାଇ ଦେବାକୁ ଚେଷ୍ଟା କରାଯାଉଥିବା ସେ ଅଭିଯୋଗ କରିଛନ୍ତି। ବର୍ତ୍ତମାନ ସେ ଜଣେ ଏଡସ ରୋଗୀର ଅସ୍ତ୍ରୋପଚାର କରି ଚର୍ଚ୍ଚାରେ ଅଛନ୍ତି। ତେବେ କିଛି ଲୋକ ତାଙ୍କୁ ଏହି ଘଟଣାକୁ ନେଇ ମିଥ୍ୟା ଅପପ୍ରଚାର କରି ଫସାଇବାକୁ ଚେଷ୍ଟା କରୁଥିବାର ଡାକ୍ତର କହିଛନ୍ତି।
ଘଟଣା ଥିଲା କିଛି ଏମିତି; ଗତ 13 ତାରିଖରେ ଅନୁଗୋଳର ଜଣେ ରୋଗୀ ଦୁର୍ଘଟଣା ଗ୍ରସ୍ତ ହୋଇ ବୁର୍ଲା ମେଡିକାଲର ସର୍ଜରୀ ୱାର୍ଡରେ ଭର୍ତ୍ତି ହୋଇଥିଲେ। ସେତେବେଳେ ପ୍ରୋଟୋକଲ ଅନୁସାରେ ରୋଗୀର ଏଚଆଇଭି, ହେପାଟାଇଟସ-ବି ଓ ହେପାଟାଇଟସ-ସି ରୋଗ ଅଛି ନାଁ ନାହିଁ ତାର ପରୀକ୍ଷା କରାଯିବା କଥା ଯାହା ହୋଇନଥିଲା । ଏହା ପରେ ଗତ 27 ତାରିଖରେ ରୋଗୀର ଚେତା ଫେରିବା ପରେ ଡାକ୍ତର ସ୍ବାଇଁ ରୋଗୀକୁ 28 ତାରିଖ ଦିନ 10 ଟାରେ ଅସ୍ତ୍ରୋପଚାର କରିବା ପାଇଁ କହିଥିଲେ ।
ମାତ୍ର ଅପରେସନ ସମୟରେ ରୋଗୀର ରିପୋର୍ଟ ଦେଖିବା ବେଳକୁ ଏଚଆଇଭି, ହେପାଟାଇଟସ-ବି ଓ ହେପାଟାଇଟସ-ସି ବିଷୟରେ ଉଲ୍ଲେଖ ନଥିଲା । ଏହାପରେ ରୋଗୀର ସମ୍ପର୍କୀୟଙ୍କୁ ସେହି ରିପୋର୍ଟ ସର୍ଜରୀ ବିଭାଗରୁ ଆଣିବା ପାଇଁ କୁହାଗଲା। ଆଉ ରିପୋର୍ଟ ଆସିବା ପରେ ଜଣାପଡିଲା ଯେ ସେ ଜଣେ ଏଡସ ରୋଗୀ।
କିନ୍ତୁ ଏଭଳି ପରିସ୍ଥିରେ ରୋଗୀର ଅସ୍ତ୍ରୋପଚାର ନକରି ଛାଡ଼ିଦେବା ମେଡିକାଲ ଏଥିକ୍ସର ବିରୁଦ୍ଧାଚରଣ କରୁଥିବାରୁ ଡକ୍ଟର ସ୍ବାଇଁ ସମସ୍ତ ପ୍ରତିଷେଧକ ବ୍ୟବସ୍ଥା ଅବଲମ୍ବନ କରି ନିଜ ଜୀବନକୁ ବିପଦରେ ପକାଇ ଅସ୍ତ୍ରୋପଚାର କରିଥିଲେ। କେବଳ ଏତିକି ନୁହେଁ ଏହି ଅସ୍ତ୍ରୋପଚାର ପରେ ସେ ଓ ତାଙ୍କ ଟିମ ଅନ୍ୟ ଏକ କ୍ୟାବିନରେ 2 ରୋଗୀଙ୍କ ଦାନ୍ତ ମଧ୍ୟ ଓପାଡି ଥିଲେ।
ତେବେ ତାଙ୍କର ଏହି କାର୍ଯ୍ୟ ପାଇଁ କିଛି ଲୋକ ତାଙ୍କ ବିରୁଦ୍ଧରେ ବିବାଦୀୟ ଅପପ୍ରଚାର କରୁଥିବା ତଥା ଅନ୍ୟ ରୋଗୀଙ୍କ ଜୀବନ ବିପଦରେ ପକାଇଥିବାର କହି ଅପପ୍ରଚାର କରୁଥିବାର ସେ ଅଭିଯୋଗ କରିଛନ୍ତି । ତାଙ୍କ କହିବା କଥା ହେଲା ଏଡସ ରୋଗୀ କିମ୍ବା ତା ପରବର୍ତ୍ତୀ ସମୟରେ ଅସ୍ତ୍ରୋପଚାର କରାଇଥିବା ରୋଗୀ କୌଣସି ଅଭିଯୋଗ କରିନଥିଲେ ମଧ୍ୟ ତାଙ୍କୁ ଫସାଇବାକୁ ଚେଷ୍ଟା କରାଯାଉଛି ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
