ସମ୍ବଲପୁର: ଦଶହରା ପୂର୍ବରୁ 9 କୁଖ୍ୟାତ ଡକାୟତକୁ ଗିରଫ କରିଛି ସମ୍ବଲପୁର ପୋଲିସ । ଏହି 9 ଡକାୟତ ସମେତ ମୋଟ 12 ଅସାମାଜିକ ଯୁବକଙ୍କୁ ସମ୍ବଲପୁର ପୋଲିସ ଗିରଫ କରି କୋର୍ଟ ଚାଲାଣ କରିଛି । ଦଶହରା ପୂର୍ବରୁ ସମ୍ବଲପୁର ଟାଉନ ଥାନା, ଅଇଁଠାପାଲି ଥାନା, କ୍ଷେତରାଜପୁର ଥାନା ଓ ଧନୁପାଲି ଥାନା ମିଳିତ ଚଢାଉ କରି ବିଭିନ୍ନ ସ୍ଥାନରେ ଏହି 12 ଜଣକୁ ଗିରଫ କରିଛି । ତେବେ 7 ଜଣ ଅସାମାଜିକ ଯୁବକ ଫେରାର ହେବାରେ ସଫଳ ହୋଇଛନ୍ତି ।
ଆଗକୁ ଦଶହରା ଆସୁଛି । ଦଶହରା ସମୟରେ ଅପରାଧିକ କାର୍ଯ୍ୟକଳାପ ଉପରେ ରୋକ ଲଗାଇବା ପାଇଁ ସମ୍ବଲପୁର ପୋଲିସ ଆରମ୍ଭ କରିଛି ବିଶେଷ ଅଭିଯାନ । ଏହି ଅଭିଯାନରେ ସମ୍ବଲପୁର ସହରର 4 ଟି ଥାନା ଅଧିକାରୀ ଓ ଏକ ସ୍ବତନ୍ତ୍ର ସ୍ବାର୍ଡ ଗଠନ କରାଯାଇଛି । ବିଗତ କିଛି ଦିନ ମଧ୍ୟରେ ସମ୍ବଲପୁରର ବିଭିନ୍ନ ଥାନା ଅଞ୍ଚଳରେ ଏହି ବିଶେଷ ଅଭିଯାନ ଚାଲିଥିବା ସମୟରେ ମୋଟ 12 ଜଣ ଅସାମାଜିକ ଯୁବକ ଗିରଫ ହୋଇଛନ୍ତି । ଏମାନଙ୍କ ମଧ୍ୟରେ 9 ଜଣ କୁଖ୍ୟାତ ଡ଼କାୟତ ଅଛନ୍ତି । ଗିରଫ ହୋଇଥିବା ଅଭିଯୁକ୍ତ ମାନେ ହେଲେ ଶିବ ପ୍ରଧାନ, ଟିଙ୍କୁ ଗଣ୍ଡ, ମହମ୍ମଦ ଜୁମନ, ନିଖିଳ ମୁଣ୍ଡା, ମହାଦେବ ମୁଣ୍ଡା, ରଞ୍ଜନ ପାତ୍ର, ନିଶାନ୍ତ ସିଂ, ମହମ୍ମଦ ସମୀର, ମହମ୍ମଦ କାଲୋ, ମହମ୍ମଦ ଚାନ୍ଦ ।
ଏହି ଅଭିଯୁକ୍ତ ମାନଙ୍କ ମଧ୍ୟରୁ କେତେକ ଡ଼କାୟତି କରିବାକୁ ଉଦ୍ୟମ କରୁଥିବା ବେଳେ ତାଙ୍କୁ ଗିରଫ କରାଯାଇଛି । ଗିରଫ ଅଭିଯୁକ୍ତ ମାନଙ୍କ ଠାରୁ ଦେଶୀ ବନ୍ଧୁକ, ଖେଳଣା ବନ୍ଧୁକ, ଛେଣି, ଛୁରୀ, ଲାଇଟ, ଗ୍ଲୋବସ, ଲଙ୍କା ପାଉଡର, ଲୁହା ରଡ଼ ପରି ଜିନିଷ ଜବତ କରାଯାଇଛି । ଆଗକୁ ପୋଲିସର ବିଶେଷ ଅଭିଯାନ ଜାରି ରହିବ ବୋଲି ଏସପି କନୱର ବିଶାଲ ସିଂହ ସୂଚନା ଦେଇଛନ୍ତି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
