ସମ୍ବଲପୁର: ସହରରେ ଦିନକୁ ଦିନ ବଢିବାରେ ଲାଗିଛି ଅପରାଧ ପ୍ରବଣତା । ବିଭିନ୍ନ ଢଙ୍ଗରେ ହେଉଛି ଅପରାଧ । ମୁଖ୍ୟତଃ ଯୁବପିଢି ବିଭିନ୍ନ ମାଦକ ଦ୍ରବ୍ୟର ଶିକାର ହୋଇ ଘଟାଉଛନ୍ତି ବିଭିନ୍ନ ପ୍ରକାରର ଅପରାଧିକ କାର୍ଯ୍ୟକଳାପ । ଆଉ ଖାସ ଏଥିପାଇଁ ସେମାନେ ବିଭିନ୍ନ ପ୍ରକାର ବାଇକ ଓ କାର ବ୍ୟବହାର କରୁଛନ୍ତି । ତେବେ ଏହି ଅପରାଧିକ କାର୍ଯ୍ୟକଳାପ ଉପରେ ନିୟନ୍ତ୍ରଣ ରଖିବାକୁ ସମ୍ବଲପୁର ପୋଲିସ ଏବେ ଫ୍ୟାସନେବୁଲ ଓ ଡିଜାଇନ ହୋଇ ଲେଖାଯାଇଥିବା ନମ୍ବର ପ୍ଲେଟ ଉପରେ ରୋକ ଲଗାଇଛି ।
ବର୍ତ୍ତମାନ ଯୁବପିଢିଙ୍କ ପସନ୍ଦ ହେଉଛି ବାଇକ ଓ ଫ୍ୟାନ୍ସି ଜିନିଷ । ଏଥିପାଇଁ ଯୁବପିଢି ଏବେ ନିଜ ବାଇକ ଓ କାରରେ ମଧ୍ୟ ବିଭିନ୍ନ ଡିଜାଇନର ଫ୍ୟାନ୍ସି ନମ୍ବର ପ୍ଲେଟ ଲଗାଉଛନ୍ତି । ଆଉ ଏହିପରି ନମ୍ବର ପ୍ଲେଟ ଯୋଗୁଁ ବିଭିନ୍ନ ସମୟରେ ଜଘନ୍ୟ ଅପରାଧ କରି ଫେରାର ହେଉଛନ୍ତି ଅପରାଧୀ । କେବଳ ଡିଜାଇନ ନମ୍ବର ପ୍ଲେଟ ଯୋଗୁଁ ଅପରାଧୀଙ୍କ କାର ଓ ବାଇକକୁ ଚିହ୍ନଟ କରିବାରେ ନାକେଦମ ହୋଇଥାଏ ପୋଲିସ । ସେଥିପାଇଁ ଏବେ ସମ୍ବଲପୁର ପୋଲିସ ବିଭିନ୍ନ ଛକରେ ଚେକିଂ କରି ଏହିଭଳି ନମ୍ବର ପ୍ଲେଟ ଗୁଡିକୁ ଜବତ କରୁଛି । କେବଳ ଆଇନ ଅନୁଯାୟୀ ଯେଉଁ ନମ୍ବର ପ୍ଲେଟ ରହିବା କଥା ତାହାକୁ ବ୍ୟବହାର କରିବାକୁ ସଚେତନ କରାଯାଉଛି ।
ସହରରେ ଅପରାଧକୁ କମାଇବା ପାଇଁ ଏବେ ପ୍ରମୁଖ ସ୍ଥାନରେ ସିସିଟିଭି ଲଗାଯାଇଥିବାବେଳେ ନମ୍ବର ପ୍ଲେଟ ନେଇ ସମ୍ବଲପୁର ପୋଲିସ ସ୍ବତନ୍ତ୍ର ଅଭିଯାନ ଆରମ୍ଭ କରିଛି । ବର୍ତ୍ତମାନ ସ୍ଥିତିରେ ଲୋକଙ୍କୁ ପ୍ରଥମେ ସଚେତନତା କରାଯାଉଛି । ପରବର୍ତ୍ତୀ ସମୟରେ ଡିଜାଇନ ନମ୍ବର ପ୍ଲେଟ ଲଗାଇଲେ ଫାଇନ କରାଯିବ ବୋଲି ସମ୍ବଲପୁର ଏସପି କହିଛନ୍ତି ।
କେବଳ ଏତିକି ନୁହେଁ ଆଗକୁ ସାଇଲେନ୍ସର ବିହୀନ ବାଇକ ଓ ଉଚ୍ଚ ଶଦ୍ଦରେ ହର୍ଣ୍ଣ ବଜାଉଥିବା ଗାଡି ଚାଳକଙ୍କ ପ୍ରତି କାର୍ଯ୍ୟାନୁଷ୍ଠାନ ନିଆଯିବ ବୋଲି ଏସପି କହିଛନ୍ତି । ଅନ୍ୟପଟେ ପୋଲିସ ପ୍ରଶାସନର ଏହି ପଦକ୍ଷେପକୁ ସମସ୍ତେ ସ୍ବାଗତ କରିଛନ୍ତି ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
