ସମ୍ବଲପୁର:ଜିଲ୍ଲା ସ୍ଥିତ ଲକ୍ଷ୍ମୀ ଟକିଜ୍ ଛକ ନିକଟରେ ଏକ ସଡକ ଦୁର୍ଘଟଣା ଘଟିଛି । ଏଥିରେ ଜଣେ 7 ବର୍ଷ ବାଳକଙ୍କ ମୃତ୍ୟୁ ହୋଇଥିବାରୁ ଘଟଣାକୁ ନେଇ ସ୍ଥାନୀୟ ସମ୍ବଲପୁର ଟାଉନ ଥାନା ଘେରାଉ କରାଯାଇଛି । ଡ୍ରାଇଭରଙ୍କୁ ଗିରଫ କରାଯିବା ସହ କ୍ଷତିପୂରଣ ଦାବି କରିଛନ୍ତି ଆନ୍ଦୋଳନକାରୀ ।
ସଡକ ଦୁର୍ଘଟଣାରେ ବାଳକ ମୃତ୍ୟୁକୁ ନେଇ ସମ୍ବଲପୁର ଟାଉନ ଥାନା ଘେରାଉ
ସୂଚନା ଅନୁଯାୟୀ, ଆଜି(ଶନିବାର) 11ଟା ସମୟରେ ଲକ୍ଷ୍ମୀ ଟକିଜ ଛକ ନିକଟରେ ଏକ ଜିପ୍ ଧକ୍କାରେ ଜଣେ 7 ବର୍ଷର ବାଳକଙ୍କର ପ୍ରାଣହାନୀ ଘଟିଛି । ମୃତ ବାଳକ ଜଣକ ସାହୁ କଲୋନୀର ମଙ୍ଗଳ ସିଂହଙ୍କ ପୁଅ ସାହିଲ ସିଂହ । ତେବେ ଦୁର୍ଘଟଣାକୁ ନେଇ ସ୍ଥାନୀୟ ଲୋକଙ୍କ ପକ୍ଷରୁ ଉତ୍ତେଜନା ଦେଖାଦେଇଛି । ଉତ୍ୟକ୍ତ ଲୋକେ ସମ୍ବଲପୁର ଟାଉନ ଥାନା ଘେରାଉ କରିଛନ୍ତି । ଡ୍ରାଇଭରଙ୍କୁ ତୁରନ୍ତ ଗିରଫ କରିବା ସହ କ୍ଷତିପୂରଣ ବାବଦକୁ 15 ଲକ୍ଷ ଟଙ୍କା ଦେବାକୁ ଦାବି କରାଯାଇଛି । ଅନ୍ୟପଟେ ଉତ୍ତେଜନାକୁ ଦୃଷ୍ଟିରେ ରଖି ଟାଉନ ଥାନା ସମ୍ମୁଖରେ ବ୍ୟାପକ ପୋଲିସ ମୁତୟନ କରାଯାଇଛି ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
