ସମ୍ବଲପୁର: ସୋମବାର ସମ୍ବଲପୁର ଜିଲ୍ଲାରେ 35 ଜଣ କୋରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଆକ୍ରାନ୍ତଙ୍କ ମଧ୍ୟରେ 4 ଜଣ କୋଭିଡ ଯୋଦ୍ଧା ଅଛନ୍ତି।
ଚିହ୍ନଟ ହୋଇଥିବା ଆକ୍ରାନ୍ତଙ୍କ ମଧ୍ୟରେ 4 ଜଣ ସ୍ଥାନୀୟ ସଂକ୍ରମିତ ଥିବାବେଳେ 31 ଜଣ ଆକ୍ଟିଭ ସର୍ଭିଲେନ୍ସ ଟିମ ଦ୍ୱାରା ଚିହ୍ନଟ ହୋଇଛନ୍ତି। ଆକ୍ରାନ୍ତମାନେ ସମ୍ବଲପୁର ମହାନଗର ନିଗମ, ରେଙ୍ଗାଲି, ଯୁଜୁମୁରା, ନକଟିଦେଉଲ ଓ ଜମନକିରା ଅଞ୍ଚଳର ହୋଇଥିବା ଜଣାପଡିଛି । ସମସ୍ତଙ୍କୁ କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଛି ।
ଅନ୍ୟପଟେ କୋଭିଡ ମୁକାବିଲା ପାଇଁ ସମ୍ବଲପୁର ଜିଲ୍ଲାରେ ଆରମ୍ଭ ହୋଇଛି ଗୋଷ୍ଠୀ ସହାୟକ କାର୍ଯ୍ୟକ୍ରମ। ସମ୍ବଲପୁର ଜିଲ୍ଲା ପ୍ରଶାସନ ଓ ଏସଏମସି ତରଫରୁ ଏହି ଅଭିନବ ପ୍ରୟାସ ଆରମ୍ଭ ହୋଇଛି। କୋଭିଡ19 ମହାମାରୀକୁ ପ୍ରତିହତ କରିବା ପାଇଁ ଆରମ୍ଭ ହୋଇଥିବା ଯୁଦ୍ଧରେ ଜିଲ୍ଲା ପ୍ରଶାସନ ଓ ଲୋକଙ୍କ ମଧ୍ୟରେ ସଂଯୋଗ ସ୍ଥାପନ କରିବା ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ।
ଏହି କାର୍ଯ୍ୟକ୍ରମ ମାଧ୍ୟମରେ ଅଧିକ ସଂକ୍ରମିତ ଅଞ୍ଚଳର ସ୍ବେଚ୍ଛାସେବୀ, ଆଶାକର୍ମୀ ଓ ଅଙ୍ଗନବାଡ଼ି କର୍ମୀଙ୍କ ପରି ସ୍ଵାସ୍ଥ୍ୟ କର୍ମୀମାନେ ସାମିଲ ହେବେ। କାର୍ଯ୍ୟକ୍ରମ ଅନୁଯାୟୀ କୋରୋନାକୁ ନେଇ ସୃଷ୍ଟି ହେଉଥିବା ବିଭିନ୍ନ ଗୁଜବ ଓ ପ୍ରକୃତ ସତ୍ୟତା ସମସ୍ତଙ୍କୁ ଅବଗତ କରାଇବାର ଦାୟିତ୍ୱ ଏହି କର୍ମୀ ଓ ସ୍ବେଚ୍ଛାସେବୀଙ୍କ ଉପରେ ରହିବ। ଏନେଇ ଏମାନଙ୍କୁ ତାଲିମ ଦିଆଯାଇଛି। ଆଉ ଏମାନଙ୍କୁ କୋରୋନା ସଚେତକ ଭାବେ ପରିଚୟ ପତ୍ର ମଧ୍ୟ ଜିଲ୍ଲା ପ୍ରଶାସନ ପକ୍ଷରୁ ପ୍ରଦାନ କରାଯାଇଛି।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
