ସମ୍ବଲପୁର: ଦେଶର ଉନ୍ନତି ନିମନ୍ତେ କୋଇଲା ଖଣିର ଅବଶ୍ୟକତା ରହିଛି । ଏଥିପାଇଁ ସରକାର କୋଇଲା ଖଣି ଆବଣ୍ଟନ କରିଛନ୍ତି । ଏହି କ୍ରମରେ ସମ୍ବଲପୁର ଖିଣ୍ଡା ସ୍ଥିତ ତଲାବିରା ଅଞ୍ଚଳରେ 2 ଓ 3 ocp ମାଇନ୍ସକୁ ଏନଏଲସି କମ୍ପାନୀକୁ ଲିଜ ଦେଇଛି । ହେଲେ ଏହି କୋଇଲା ଖଣି ଅଞ୍ଚଳରେ କୋଇଲା ଉତ୍ତୋଳନ ଆରମ୍ଭ ପାଇଁ କେବଳ ସମ୍ବଲପୁରରେ 17, 700 ଗଛ କଟାଯିବା ନେଇ ନିଷ୍ପତ୍ତି ନିଆଯାଇଛି । ତେବେ ଏହି ପ୍ରୋଜେକ୍ଟ ପୂର୍ବରୁ ବନୀକରଣ ନକରି ଏତେ ସଂଖ୍ୟକ ଗଛ କଟାଯାଉଥିବାରୁ ସ୍ଥାନୀୟ ଲୋକ ଏହାକୁ ବିରୋଧ କରିଛନ୍ତି ।
ସମ୍ବଲପୁର ଓ ଝରାଡୁଗୁଡା ସୀମାରେ ଥିବା ତଲାବିରାରେ ଏନଏଲସି କମ୍ପାନୀର ମାଇନିଂ ଲିଜ ଏରିଆ ହେଉଛି 1914 ହେକ୍ଟର ଜମି । ଏଥିରୁ ସମ୍ବଲପୁରରେ ରହିଛି 601 ହେକ୍ଟର ଜମି । ଏହି 601 ହେକ୍ଟର ଜମିରେ ରହିଛି 192 ହେକ୍ଟର ଜଙ୍ଗଲ ଜମି ଓ 409 ହେକ୍ଟର ନନ ଫରେଷ୍ଟ, ସରକାରୀ ଓ ପ୍ରାଇଭେଟ ଜମି । ଆଉ ବର୍ତ୍ତମାନ ଏହି ଅଞ୍ଚଳରେ NLC କମ୍ପାନୀ ନିଜର କୋଇଲା ଉତ୍ତୋଳନ ଆରମ୍ଭ କରିବାକୁ ଯାଉଛି । ଏଥିପାଇଁ ପ୍ରଥମ ପର୍ଯ୍ୟାୟରେ ଏହି ଅଞ୍ଚଳର 17700 ଗଛ କାଟିବାକୁ ଚିହ୍ନଟ କରାଯାଇଥିବାବେଳେ 2700ଗଛକୁ ନକାଟି ସ୍ଥାନାନ୍ତର ପାଇଁ ନିର୍ଦ୍ଦେଶ ଦେଇଥିବା ନିଜେ ଡିଏଫଓ କହିଛନ୍ତି । ଜଙ୍ଗଲ ଜମିରେ 13000 ଓ ଅଣ ଜଙ୍ଗଲ ଜମିରେ 4000 ଗଛ କାଟିବା ପ୍ରକ୍ରିୟା ଆରମ୍ଭ ହୋଇଗଲାଣି । ପୋଲିସର ସୁରକ୍ଷା ଘେରରେ ଏହି ଗଛ କଟା ଚାଲିଛି । ସ୍ଥାନୀୟ ଜନସାଧାରଣ ଏହା ଦ୍ଵାରା ପରିବେଶର ବହୁ କ୍ଷତି ସାଧନ ହେବ ବୋଲି କହୁଛନ୍ତି । ଏଥିପାଇଁ ସେମାନେ ସରକାରଙ୍କୁ ଦାୟୀ କରିଛନ୍ତି।
ତେବେ ସମ୍ପୃକ୍ତ କମ୍ପାନୀ 13 ଲକ୍ଷ ଗଛ ଲଗାଇବାକୁ ବନ ବିଭାଗକୁ ଟଙ୍କା ଦେଇସାରିଛି । ଏହି ଗଛ ସବୁ ସମ୍ବଲପୁର ଜିଲ୍ଲାର ରେଙ୍ଗାଲୀ, ସଦର ରେଞ୍ଜ ସହ ବଲାଙ୍ଗୀର ଓ ସୋନପୁର ଜିଲ୍ଲାରେ ଲଗାହେବ ବୋଲି ଡିଏଫଓ ସୂଚନା ଦେଇଛନ୍ତି । ଏହାସହ 35 ବର୍ଷ ପରେ ଲିଜ ଅବଧି ସରିବା ପରେ ଆଉ 12 ଲକ୍ଷ ଗଛ ଲଗାଇବାକୁ କମ୍ପାନୀକୁ ନିର୍ଦ୍ଦେଶ ରହିଛି ବୋଲି ଡିଏଫଓ କହିଛନ୍ତି । ଆଉ ବର୍ତ୍ତମାନ ବନ ବିଭାଗର ତତ୍ତ୍ବାବଧାନରେ ସବୁ ଗଛ କଟାଯାଉଛି ଓ ଏଥିରୁ ମିଳିବାକୁ ଥିବା ରାଜସ୍ବ ରାଜ୍ୟ ସରକାରଙ୍କ ରାଜକୋଷକୁ ଯିବ ବୋଲି କୁହାଯାଇଛି।
ମିଳିଥିବା ସୂଚନା ଅନୁସାରେ ସମ୍ବଲପୁର ଓ ଝାରସୁଗୁଡା ଜିଲ୍ଲାରେ ମୋଟ 40 ହଜାରରୁ ଊର୍ଦ୍ଧ୍ବ ଗଛ କଟାଯିବ । ତେବେ ଏତେ ଗଛ କାଟିଲେ କ'ଣ ପରିବେଶ ସନ୍ତୁଳନ ବିଗିଡିବ ନାହିଁ ? ଆଉ ଯଦି ବିଗିଡିବ ତାହେଲେ ଆଗୁଆ କାହିଁକି ବନୀକରଣ କରାଗଲାନି ବୋଲି ସ୍ଥାନୀୟ ଲୋକେ ପ୍ରଶ୍ନ କରିଛନ୍ତି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
