ଆଦିବାସୀ ଇଲାକାରେ ସଡକ ସୁରକ୍ଷା ବାର୍ତ୍ତା ଦେଲେ ଯମରାଜ

ସଡକ ଦୁର୍ଘଟଣାକୁ ଏଡାଇବା ସହ ନିରାପଦ ଯାତ୍ରା ପାଇଁ ଜନସାଧାରଣଙ୍କୁ ସଚେତନ କରାଇବା ଉଦ୍ଦେଶ୍ୟରେ ରାୟଗଡାରେ ବୁଲିଛନ୍ତି ଯମରାଜ ।

ରାୟଗଡା: ସଡକ ଦୁର୍ଘଟଣାକୁ ଏଡାଇବା ସହ ନିରାପଦ ଯାତ୍ରା ପାଇଁ ଜନସାଧାରଣଙ୍କୁ ସଚେତନ କରାଇବା ଉଦ୍ଦେଶ୍ୟରେ ରାୟଗଡାରେ ବୁଲିଛନ୍ତି ଯମରାଜ । ରାୟଗଡା ଆଞ୍ଚଳିକ ପରିବହନ ବିଭାଗ ପକ୍ଷରୁ 31ତମ ସଡକ ସୁରକ୍ଷା ସପ୍ତାହ ପାଳନ ଅବସରରେ ଆଦିବାସୀ ଅଧ୍ୟୁସିତ ଅଞ୍ଚଳରେ ଏଭଳି ଅଭିନବ ପ୍ରୟାସ କରାଯାଇଛି ।

ସୋମବାର ସ୍ଥାନୀୟ ଗଜପତି ଛକଠାରେ ଆୟୋଜିତ ଏହି ସଚେତନତା କାର୍ଯ୍ୟକ୍ରମରେ ଅନୁସୂଚିତ ଜାତି ଓ ଜନଜାତି ଉନ୍ନୟନ ବିଭାଗ ମନ୍ତ୍ରୀ ଜଗନ୍ନାଥ ସାରକା, କୋରାପୁଟ ଲୋକସଭା ସାଂସଦ ତଥା ପାର୍ଲିଆମେଣ୍ଟ୍ରି ସଡକ ସୁରକ୍ଷା କମିଟି ଅଧ୍ୟକ୍ଷ ସପ୍ତଗିରି ଉଲାକା ଅତିଥି ଭାବେ ଯୋଗ ଦେଇ ଉଦଘାଟନ କରିଥିଲେ । ଏହି ଅବସରରେ ଏକ ସୁରକ୍ଷା ସଚେତନତା ରଥର ଶୁଭାରମ୍ଭ କରାଯାଇଥିଲା ।

ଏଥିସହ କାର୍ଯ୍ୟକ୍ରମରେ ମନ୍ତ୍ରୀ ଓ ସାଂସଦଙ୍କ ସମେତ କଳାକାରମାନେ ଯମରାଜ ବେଶ ସାଜି ଲୋକଙ୍କୁ ସଚେତେନା କରିଥିଲେ । ଯେଉଁମାନଙ୍କୁ ସହଯୋଗର ହାତ ବଢାଇଥିଲେ ଜିଲ୍ଲାର କିନ୍ନରମାନେ। ଏହି କାର୍ଯ୍ୟକ୍ରମ ଜରିଆରେ ସଭିଏଁ ରାସ୍ତାରେ ଯାଉଥିବା ଗାଡି ଚାଳକମାନଙ୍କୁ ଚକୋଲେଟ ଦେଇ ସଚେତନ କରାଇଥିଲେ ।

ରାୟଗଡାରୁ ରଞ୍ଜନ ରଥ, ଇଟିଭି ଭାରତ