ରାୟଗଡ଼ା: ତତଲା କଡେଇରେ ଭାଜି ହେଉଛି ରାୟଗଡା । ଗ୍ରୀଷ୍ମ ପ୍ରଭାବରେ ଶୁଖି ଗଲେଣି ଜଳାଶୟ । ବୁନ୍ଦାଏ ପାଣି ପାଇଁ ଡହଳ ବିକଳ ଜୀବନ । ରାୟଗଡ଼ାର କାଲ୍ୟାଣପୁର ପଞ୍ଚାୟତର ଅଙ୍ଗୁରରେ ପାନୀୟ ଜଳର ଘୋର ଆଭାବ ଦେଖିବାକୁ ମିଳିଛି । ଯାହାକୁ ନେଇ ଗ୍ରାମବାସୀ ପାନୀୟ ଜଳ ସମସ୍ୟାର ସମାଧାନ କରିବାକୁ ଦାବି କରି କଲ୍ୟାଣସିଂହପୁର-ରାୟଗଡା ମୁଖ୍ୟ ରାସ୍ତା ଅବରୋଧ କରିଥିଲେ । ସୋମବାର କଲ୍ୟାଣସିଂହପୁର-ରାୟଗଡା ରାସ୍ତା ଅବରୋଧ ଯୋଗୁଁ ଉଭୟ ପାଶ୍ୱରେ ଶତାଧିକ ଯାନବାହାନ ଅଟକ ରହିଥିଲା ।
ସୂଚନା ମୁତାବକ ଅଙ୍ଗୁର ଗ୍ରାମରେ ପ୍ରାୟ ୭୦ ପରିବାର ଥିବା ବେଳେ ମାତ୍ର ଦୁଇଟି ନଳକୂପ ଅଛି ଯାହା ପ୍ରାୟ ସମୟରେ ଖରାପ ରହୁଥିବା ଗ୍ରାମବାସୀମାନେ ଅଭିଯୋଗ କରିଛନ୍ତି । ଏହାକୁ ନେଇ ଗ୍ରାମବାସୀମାନେ ବାରମ୍ବାର ଅଭିଯୋଗ କରିଥିଲେ ମଧ୍ୟ ଏହି ଗାଁରେ ପାଣି ସମସ୍ୟାର ଏଯାଏଁ ସମାଧାନ ହୋଇ ପାରିଲା ନାହିଁ । ଗ୍ରାମ୍ୟ ଜଳଯୋଗାଣ ବିଭାଗ ସର୍ବଦା ଅଣଦେଖା କରୁଥିବା ଅଭିଯୋଗ ହେଉଥିବା ବେଳେ ଗ୍ରାମବାସୀ ଏହି ପାଣି ସମସ୍ୟାର ସମାଧାନ ପାଇଁ ସୋଲାର ନଳକୂପ କରିବା ପାଇଁ ଦାବି କରୁଥିଲେ । ହେଲେ ନାଁ ଗାଁରେ ନଳକୂପ ଠିକ୍ କାରଯାଉଛି ନା ପ୍ରଶାସନ ସୋଲାର ନଳକୂପ ପାଇଁ କର୍ଣ୍ଣପାତ କରୁଛି । ଯାହାଫଳରେ ପାଣି ପାଇଁ 3ରୁ 4 କିମି ଚାଲିଚାଲି ଯାଉଛନ୍ତି ଗ୍ରାମବାସୀ ।
ଅଧିକ ପଢ଼ନ୍ତୁ: ଶୁଣିଲାନି ପ୍ରଶାସନ, ପାଣି ପାଇଁ ଗ୍ରାମବାସୀଙ୍କ ରାସ୍ତାରୋକ
ପରେ ରାୟଗଡ଼ା ବିଡ଼ିଓ ଲକ୍ଷ୍ମୀନାରାୟଣ ସାବତ ଓ ଚାନ୍ଦିଲି ଥାନା ଅଧିକାରୀ ଯଶବନ୍ତ ହିଆଲ ଘଟଣା ସ୍ଥଳକୁ ଯାଇ ଗ୍ରାମବାସୀଙ୍କୁ ବୁଝାସୁଝା କରିବାରୁ ପ୍ରାୟ ୪ ଘଣ୍ଟା ପରେ ରାସ୍ତାରୋକ ହଟିଥିଲା । ସବୁଠାରୁ ଆଶ୍ଚର୍ଯ୍ୟର କଥା ହେଉଛି ସରକାରଙ୍କ ପାନୀୟ ଜଳ ପାଇଁ ବସୁଧା, ମେଗା ୱାଟର ପ୍ରୋଜେକ୍ଟ ଭଳି ବିଭିନ୍ନ ଯୋଜନା କରୁଛନ୍ତି । ମାତ୍ର ଏଭଳି ଅନେକ ଗାଁର ଲୋକେ ବିଶୁଦ୍ଧ ପାନୀୟ ଜଳ ପାଇବାରୁ ବଞ୍ଚିତ ହେଉଛନ୍ତି । ରାୟଗଡ଼ା ଜିଲ୍ଲାରେ ଏଭଳି ଅନେକ ଗାଁ ଅଛି ଯେଉଁଠି ଲୋକମାନେ ସେମାନଙ୍କର ଦୈନଦିନ ଆବଶ୍ୟକତା ପାଇଁ ନାଳ ନଦୀର ପାଣି ଉପରେ ନିର୍ଭର କରୁଛନ୍ତି । କିନ୍ତୁ ବିଶୁଦ୍ଧ ପାନୀୟ ଜଳ ପାଇପାରିନଥିବାରୁ ନାଳ ନଦୀର ପାଣି ପିଇ ଅନେକ ଲୋକ ରୋଗାକ୍ରାନ୍ତ ହୋଇପଡ଼ଛନ୍ତି । ପ୍ରଶାସନ ଯଦି ଏଭଳି ସମସ୍ୟାର ସ୍ଥାୟୀ ସମାଧାନ ନକରେ ତାହେଲେ ଆଗକୁ ପାନୀୟ ଜଳ ପାଇଁ ବଡ଼ ଧରଣର ଜନଆନ୍ଦୋଳନ କରାଯିବ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ ।
ଇଟିଭି ଭାରତ, ରାୟଗଡା
