ରାୟଗଡା: ବିଭତ୍ସ ହତ୍ୟାକାଣ୍ଡ । ଲୁହା ବୋଝେଇ ଟ୍ରକ ଡ୍ରାଇଭରକୁ ଟ୍ରକ ଭିତରେ ହିଁ ଗଳାକାଟି ହତ୍ୟା କରାଯାଇଛି । ଏ ଭଳି ଅଭାବନୀୟ ଘଟଣା ଘଟିଛି ରାୟଗଡ ଜିଲ୍ଲା ଟିକିରିଥାନା ଅନ୍ତର୍ଗତ ନଟରାଜ ପେଟ୍ରୋଲ ପମ୍ପ ସମ୍ମୁଖରେ । ଘଟଣା ସ୍ଥଳରେ ପୋଲିସ ମୃତଦେହ ଜବତ କରିବା ସହ ତଦନ୍ତ ଆରମ୍ଭ କରିଛି ।
ସୂଚନା ଅନୁଯାୟୀ ମଙ୍ଗଳବାର ମଧ୍ୟାହ୍ନରେ ଟିକିରି ଥାନା ଅଞ୍ଚଳରେ ଏକ ଟ୍ରକ OR 07 W 0955 ରାଉରକେଲା ଠାରୁ ଟିକିରି ସ୍ଥିତ ଉତ୍କଳ ଆଲୁମିନା କମ୍ପାନୀକୁ ଲୁହା ବୋଝେଇ ନେଇ ଆସୁଥିଲା । ଟିକିରି ପହଞ୍ଚିବା ପରେ ନଟରାଜ ପେଟ୍ରୋଲ ପମ୍ପ ସମ୍ମୁଖରେ ଅଟକି ରହିଥିଲା । ତେବେ ଗତକାଲି ମଧ୍ୟାହ୍ନ ପର୍ଯ୍ୟନ୍ତ ଦୀର୍ଘ ସମୟ ଗାଡିଟି ଅଟକି ରହିଥିବାରୁ ସ୍ଥାନୀୟ ଲୋକେ ଟ୍ରକ ଡ୍ରାଇଭରର ରକ୍ତ ଜୁଡୁବୁଡୁ ମୃତଦେହ ଦେଖିବାକୁ ପାଇଥିଲେ ।
ଏନେଇ ପୋଲିସକୁ ଖବର ଦେବାପରେ ଘଟଣା ସ୍ଥଳରେ ପୋଲିସ,ସାଇଣ୍ଟିଫିକ ଟିମ,ଡଗ ସ୍କ୍ବାର୍ଡ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ପ୍ରାଥମିକ ତଦନ୍ତରୁ ଡ୍ରାଇଭର ଜଣକ ଆସ୍କାର ସୁରେନ୍ଦ୍ରନାଥ ପାତ୍ର ବୋଲି ଜଣାପଡିଥିବା ବେଳେ ବ୍ୟବହୃତ ଛୁରୀ ଜବତ ହୋଇଛି। ଏନେଇ ଡ୍ରାଇଭରଙ୍କ ପରିବାରକୁ ଖବର ଦିଆଯାଇଛି ।
ତେବେ ଟ୍ରକର ହେଲପର ଫେରାର ହୋଇଥିବାରୁ ହେଲପରକୁ ଧରିବାକୁ ପୋଲିସ ଉଦ୍ୟମ ଜାରି ରହିଥିବା ବେଳେ ବିଳମ୍ବିତ ରାତିରେ ହେଲପର ଆତ୍ମ ସମର୍ପଣ କରିଥିବା ଜଣାପଡ଼ିଛି । ଅନ୍ୟପଟେ ପରିବାର ବର୍ଗ ପହଞ୍ଚି ମୃତଦେହକୁ ଚିହ୍ନଟ କରିବାପରେ ବ୍ୟବଚ୍ଛେଦ କରାଯାଇଛି ।
ରାୟଗଡାରୁ ରଞ୍ଜନ କୁମାର ନାଥ, ଇଟିଭି ଭାରତ
