ରାୟଗଡା : ଘାଟି ଉପରେ ଓଲଟିଲା ଟ୍ରକ । ଟ୍ରକ ଡାଲାରେ ରଶି ଲଗେଇ ଆତ୍ମହତ୍ୟା କଲା ଗାଡି ଚାଳକ । ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ରାୟଗଡା ଜିଲ୍ଲା ଚାନ୍ଦିଲି ଥାନା ଅନ୍ତର୍ଗତ ମୁକୁନ୍ଦପୁର ଗାଁ ନିକଟରେ ଥିବା ଭାଗୁଡି ଘାଟିରେ ।
ସୂଚନାଯୋଗ୍ୟ, ବିଳମ୍ବିତ ରାତିରେ ଏକ ମାଲ ବୋଝେଇ ଟ୍ରକଟି ଥେରୁବାଲିସ୍ଥିତ ଏକ କାରଖାନାରୁ ମାଲ ବୋଝେଇ କରି ଭୁବନେଶ୍ବର ଅଭିମୁଖେ ଯାଉଥିବା ସମୟରେ ଭାରସାମ୍ୟ ହରାଇ ଭାଗୁଡି ଘାଟିରେ ଓଲଟି ପଡ଼ିଥିଲା। ଏ ଦୁର୍ଘଟଣାରେ ଟ୍ରକଟିର ଚେଚିସ ଠାରୁ ଡାଲା ଅଲଗା ହୋଇ ଯାଇଥିଲା। ତେବେ ଏଭଳି ପରିସ୍ଥିତିରେ ଚାଳକ ଜଣକ ଉପାୟ ଶୂନ୍ୟ ହୋଇ ଦୁର୍ଘଟଣା ଗ୍ରସ୍ତ ଟ୍ରକର ଡାଲା ଉପରେ ରଶି ଲଗାଇ ଆତ୍ମହତ୍ୟା କରିଥିବା ପ୍ରାଥମିକ ତଦନ୍ତରୁ ଜଣାପଡିଛି।
ଘଟଣା ସମ୍ପର୍କରେ ଖବର ପାଇ ରାୟଗଡା ଏସଡିପିଓ ଦିବ୍ୟଜ୍ୟାେତି ଦାସଙ୍କ ସହ ଚାନ୍ଦିଲି ଥାନା ଅଧିକାରୀ ସୀମା ପ୍ରଧାନ ଓ ମୁକୁନ୍ଦପୁର ଫାଣ୍ଡି ଅଧିକାରୀ ସନ୍ତୋଷ ସିରିକା ପ୍ରମୁଖ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ତେବେ ମୃତ ବ୍ୟକ୍ତି ଜଣକ ବସନ୍ତ ନାହାକ (୨୬) । ସେ ଗଞ୍ଜାମ ଜିଲ୍ଲାର ବୋଲି ସୂଚନା ମିଳିଛି। ପୋଲିସ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠେଇଥିବା ଜଣାପଡିଛି।
ଇଟିଭି ଭାରତ, ରାୟଗଡା
