ରାୟଗଡା: ଜିଲ୍ଲାରେ ମେଡିକାଲ କଲେଜ ଦାବି କରି ଗତ ୯ ତାରିଖ ଠାରୁ ଅନଶନରେ ଯୁବ ବିକାଶ ପରିଷଦ ସଭାପତି ଶିବାଜି ଦାସ ବସିଥିବା ବେଳେ ଶନିବାର ମଧ୍ୟାହ୍ନରେ ଅନଶନକୁ ଶହେ ଘଣ୍ଟା ପୁରିଛି । ଯୁବ ବିକାଶ ପରିଷଦ ପକ୍ଷରୁ ମେଡିକାଲ କଲେଜ ଦାବିରେ ୧୦୦ ଘଣ୍ଟା ଆମରଣ ଅନଶନ ନିଷ୍ପତ୍ତି ନିଆଯାଇଥିଲା । ତେବେ ସବୁଠାରୁ ବଡ କଥା ଏହି ୧୦୦ ଘଣ୍ଟା ଅନଶନ ମଧ୍ୟରେ ପ୍ରଶାସନର ଜଣେ ମଧ୍ୟ ଅଧିକାରୀ ଅନଶନ ସ୍ଥଳରେ ପହଞ୍ଚି ଅନଶନକାରୀଙ୍କୁ ବୁଝାଇବାକୁ ପ୍ରୟାସ କରିନଥିବାକୁ ନେଇ ପ୍ରଶାସନର କାର୍ଯ୍ୟକାରିତା ଉପରେ ପ୍ରଶ୍ନ ଉଠାଇଛି ଯୁବ ବିକାଶ ପରିଷଦ ।
ତେବେ ଆଜି ଆନ୍ଦୋଳନରେ ସାମିଲ ଥିବା ସହକର୍ମୀଙ୍କ ହାତରୁ ପଇଡ ପାଣି ପିଇ ୧୦୦ ଘଣ୍ଟା ଆମରଣ ଅନଶନ ଭାଙ୍ଗିଥିଲେ ଯୁବ ବିକାଶ ପରିଷଦ ସଭାପତି ଶିବାଜି ଦାସ । ପରେ ଏକ ପଦଯାତ୍ରାରେ ବାହାରି ରାୟଗଡା ଜିଲ୍ଲାପାଳଙ୍କ କାର୍ଯ୍ୟଳୟକୁ ଯାଇ ଏକ ଦାବିପତ୍ର ପ୍ରଦାନ କରିଥିଲେ ।
ଏହି ଦାବିପତ୍ରରେ ଆଗାମୀ ଅପ୍ରେଲ 15 ତାରିଖ ସୁଧା ସେମାନଙ୍କ ଦାବି ପୂରଣ ନହେଲେ ଏକ ବଡଧରଣର ଆନ୍ଦୋଳନ ହେବା ସହିତ କୌଣସି ପ୍ରକାର ଅପ୍ରୀତିକର ପରିସ୍ଥିତି ସୃଷ୍ଟି ହେଲେ ଏଥିପାଇଁ ରାଜ୍ୟ ସରକାର ଓ ଜିଲ୍ଲା ପ୍ରଶାସନ ଦାୟୀ ରହିବ ବୋଲି ଯୁବ ବିକାଶ ପକ୍ଷରୁ ଚେତାବନୀ ଦେଇଛି ।
ରାୟଗଡା ଜିଲ୍ଲାରେ ମେଡିକାଲ କଲେଜ ପ୍ରତିଷ୍ଠା ଓ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସୁପର ସ୍ପେଶାଲିଷ୍ଟ ହସ୍ପିଟାଲ ମାନ୍ୟତା ଦାବିରେ ରାୟଗଡା ଯୁବ ବିକାଶ ପରିଷଦ ଗତ ଡିସେମ୍ବର ମାସରେ ୧୨ଘଣ୍ଟିଆ ଦାବି କରି ଅନଶନ କରିଥିଲେ । ତେବେ ଏହି ୧୦୦ ଘଣ୍ଟିଆ ଏହି ଆମରଣ ଅନଶନରେ ଜିଲ୍ଲାର ବିଭିନ୍ନ ଅନୁଷ୍ଠାନ, ବ୍ୟକ୍ତିବିଶେଷ, ରାଜନୈତିକ ଦଳ ଓ ସାମ୍ବାଦିକ ସଙ୍ଘ ନିଜର ସମର୍ଥନ ଜଣାଇବା ସହ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ପୋଷ୍ଟକାର୍ଡ କ୍ୟାମ୍ପେନ ମଧ୍ୟ କରାଯାଇଥିଲା । ମେଡିକାଲ କଲେଜ ଦାବିରେ ଚାଲିଥିବା ୧୦୦ ଘଣ୍ଟା ଆମରଣ ଅନଶନରୁ ଭାଙ୍ଗିଲା ଯୁବ ବିକାଶ ପରିଷଦ ।
ରାୟଗଡାରୁ ରଞ୍ଜନ କୁମାର ରଥ, ଇଟିଭି ଭାରତ
