ରାୟଗଡା: କୋରୋନା ଯୋଗୁଁ ଅନାଥ ହୋଇଯାଇଥିବା ୪ ଶିଶୁଙ୍କ ପାଖରେ ପହଞ୍ଚିଛି ଜିଲ୍ଲା ପ୍ରଶାସନ । କୋରୋନା ମହାମାରୀ ଯୋଗୁଁ ବହୁ ଶିଶୁ ଅନାଥ ହୋଇଯାଇଥିବା ଖବର ଆସୁଥିବା ବେଳେ ରାୟଗଡା ଜିଲ୍ଲାରେ ମଧ୍ୟ ଘଟିଛି ଏଭଳି ଘଟଣା । ରାୟଗଡା ଜିଲ୍ଲା ଗୁଡାରୀ ବ୍ଲକ ଅନ୍ତର୍ଗତ ମଧୁବନ ଗ୍ରାମପଞ୍ଚାୟତର ଦୁର୍ଗମ ଆଞ୍ଚଲ ଗୁଞ୍ଜିଗୁଡା ଓ ସାନହୁମା ଗ୍ରାମପଞ୍ଚାୟତର ଲଣ୍ଡା ସିଂ ଲକ୍ଷ୍ମୀପୁର ଗ୍ରାମରେ ଦୁଇଟି ପରିବାର କୋରୋନା ଆକ୍ରାନ୍ତ ହୋଇ ମୃତ୍ୟୁବରଣ ଯୋଗୁଁ ଅନାଥ ହୋଇଯାଇଛନ୍ତି ଛୋଟ ଛୋଟ ଶିଶୁ । ଜିଲ୍ଲାପାଳ ସରୋଜ କୁମାର ମିଶ୍ରଙ୍କ ନିର୍ଦ୍ଦେଶକ୍ରମେ ଜିଲ୍ଲା ଶିଶୁ ସୁରକ୍ଷା ଅଧିକାରୀ ରମେଶ ଚନ୍ଦ୍ର ନାୟକ, ଗୁଡାରୀ ବ୍ଲକ ଶିଶୁ ବିକାଶ ଅଧିକାରୀ ପୁଷ୍ପାଞ୍ଜଳି ପଟ୍ଟନାୟକଙ୍କ ସମେତ ଜିଲ୍ଲା ସଂଯୋଜକ ରତ୍ନେଶ୍ୱର ସାହୁ ସ୍ଥାନୀୟ ସୁପରଭାଇଜର ଓ ଅଙ୍ଗନବାଡି କର୍ମୀ ପ୍ରମୁଖ ମିଳିତ ଭାବେ ଅନାଥ ହୋଇଥିବା ଶିଶୁଙ୍କ ନିକଟରେ ପହଞ୍ଚି ସରକାରଙ୍କ ଘୋଷିତ ସହାୟତା ଯୋଗାଇ ଦେଇଥିଲେ ।
ଗୁଞ୍ଜିଗୁଡା ଗ୍ରାମର ୩ ଜଣ ଅନାଥ ବାଳକ ଓ ଲଣ୍ଡା ସିଂ ଲକ୍ଷ୍ମୀପୁର ଗ୍ରାମର ଅନାଥ ହୋଇଥିବା ଜଣେ ବାଳକ ପାଖରେ ପ୍ରାଥମିକ ପଦକ୍ଷେପସ୍ୱରୁପ ଅତ୍ୟାବଶ୍ୟକୀୟ ଖାଦ୍ୟ ସାମଗ୍ରୀ ଦେବା ସହ ଶିଶୁ ମାନଙ୍କୁ ସରକାରଙ୍କ ତରଫରୁ ବିଭିନ୍ନ ସାମାଜିକ ସୁରକ୍ଷା ଯୋଜନାରେ ସାମିଲ ପାଇଁ ତଥ୍ୟ ସଂଗ୍ରହ କରିଥିଲେ । ତେବେ ଶିଶୁ ମାନେ ଯେପରି ଉତ୍ତମ ଶିକ୍ଷାଲାଭ କରିପାରିବେ ସେନେଇ ବ୍ୟବସ୍ଥା କରାଯିବ ବୋଲି ପ୍ରଶାସନ ତରଫରୁ ଗ୍ରାମବାସୀ ମାନଙ୍କୁ ଅଧିକାରୀ ମାନେ ଆଶ୍ଵସନା ଦେଇଛନ୍ତି ।
ରାୟଗଡାରୁ ରଞ୍ଜନ କୁମାର ରଥ, ଇଟିଭି ଭାରତ
