ରାୟଗଡା: କୋରୋନା ମହାମାରୀ ସମୟରେ ପିଲାଙ୍କ ପାଠପଢାରେ ଡୋରି ବନ୍ଧା ହେଲାଣି । ସ୍କୁଲ ପାଠପଢା ଛାଡି ଏବେ ଅନଲାଇନରେ ପଢିବା ଭରସା ସାଜିଛି । ହେଲେ ସମସ୍ତଙ୍କ ଭାଗ୍ୟରେ ଜୁଟୁନି ଅନଲାଇନ ପାଠପଢା । ବାଧକ ସାଜିଛି ମୋବାଇଲ । ଫଳରେ ମୋବାଇଲ ଟିଏ ପାଇଁ ପିଲାଙ୍କୁ ଶେଷରେ ମାଣ୍ଡିଆ ବିଲରେ କାମ କରିବାକୁ ପଡୁଛି । ଏପରି ଏକ ଘଟଣା ଦେଖିବାକୁ ମିଳିଛି ରାୟଗଡା ଜିଲ୍ଲା ହଲୁଆ ପଞ୍ଚାୟତର ଜାମୁଲିମା ଗାଁରେ ।
ମନରେ ପାଠ ପଢିବାର ଆଶା । ହେଲେ ଦାଉ ସାଜୁଛି ଦରିଦ୍ର ଜୀବନ । ଅନଲାଇନ କାଳରେ ମୋବାଇଲ ବିନା ଶିଖିବାର ଆଶା, ଆଶାରେ ହିଁ ରହିଯାଉଛି । ଯାହାକୁ ପୂରଣ କରିବାକୁ ନିଜେ ଅଣ୍ଟା ଭିଡିଛନ୍ତି ଜାମୁଲିମା ଗାଁର ରୋହିତ ବିଡିକା ଓ ମୋନିକା ବିଡିକା।
ରୋହିତ ସପ୍ତମ ଶ୍ରେଣୀରେ ପଢୁଥିବାବେଳେ ମୋନିକା ଷଷ୍ଠ ଶ୍ରେଣୀରେ ପଢୁଛନ୍ତି । ହେଲେ କୋରୋନା ପାଇଁ ସବୁକିଛି ଅନଲାଇନରେ ଚାଲୁଥିବାରୁ ଏମାନଙ୍କ ପାଠପଢାରେ ଡୋରି ଲାଗିଯାଇଛି । ଯାହାର ଭରଣା ପାଇଁ ମାଣ୍ଡିଆ ବିଲ, ଧାନବିଲ ଠୁ ଆରମ୍ଭ କରି କପା ବିଲରେ କାମ କରି ମୋବାଇଲ କିଣିବାକୁ ଇଚ୍ଛା ରଖିଛନ୍ତି । ସେହି ମୋବାଇଲରେ ପାଠ ପଢି ଆଗକୁ ଯିବାର ସ୍ବପ୍ନ ବି ଦେଖୁଛନ୍ତି ।
ମୋନିକାଙ୍କ ପରିବାର କହିଲେ ବାପା ଆନନ୍ଦ ବିଡିକାଙ୍କ ସହିତ 8 ପ୍ରାଣୀ କୁଟୁମ୍ବ । ଯାହାଙ୍କୁ ପୋଷିବା କାଠିକର ପାଠ ହେଉଥିବାବେଳେ ମୋବାଇଲ ଆଣି କିପରି ପିଲାଙ୍କୁ ପଢାଇବେ ସେହି ଚିନ୍ତାରେ ଆନନ୍ଦ ରହୁଛନ୍ତି । ଏହାକୁ ଦେଖି ଦୁଇ ପିଲା ନିଜେ ନିଜ ପାଇଁ ବାଟ ଖୋଜି ଏପରି ଉପାୟ ପାଇଛନ୍ତି । ପର ଜମିରେ ମୁଲଲାଗି ମୋବାଇଲଟିଏ କିଣିବାକୁ ଇଚ୍ଛା ରଖିଥିବାବେଳେ ଲକଡାଉନ କାଳରୁ ପାଠ ପଢା ବନ୍ଦ ହୋଇଯାଇଛି । ଖାଲି ଏହି ଦୁଇ ପିଲା ନୁହଁନ୍ତି ଏପରି ଅନେକ ପିଲା ଆର୍ଥିକ ଅନଟନ କାରଣରୁ ମୋବାଇଲ କିଣି ନପାରି ପାଠପଢା ଛାଡିଛନ୍ତି । ଯାହା ସରକାରଙ୍କ ଅନଲାଇନ ଶିକ୍ଷାର ଅସଲ ଚିତ୍ରକୁ ପଦାରେ ପକାଇଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
