ରାୟଗଡା: ପ୍ରେମ ଆଗରେ ତୁଚ୍ଛ ହୋଇଗଲା ସାଙ୍ଗ । ପ୍ରେମିକାକୁ ନିଜର କରିବା ପାଇଁ ସାଙ୍ଗ ନେଇଛି ସାଙ୍ଗର ଜୀବନ । ମଦ ପିଆଇ ବେହୋସ କରିବା ପରେ ତଣ୍ଟି ଚିପି ହତ୍ୟା କରି ନଦୀ ବାଲିରେ ପୋତି ଦେବା ଭଳି ଅଭାବନୀୟ ଘଟଣା ଘଟିଛି ରାୟଗଡ଼ାରେ ।
ହତ୍ୟାର ଶିକାର ହୋଇଥିବା ଯୁବକ ବଲାଙ୍ଗୀର ଜିଲ୍ଲା ଟିଟିଲାଗଡ଼ ସହରର। ନିଖୋଜ ମାମଲା ଆଧାରରେ ଟିଟିଲାଗଡ଼ ପୁଲିସ୍ ହତ୍ୟା ଘଟଣା ଉପରୁ ପରଦା ଉଠାଇବା ସହ ହତ୍ୟାକାଣ୍ଡରେ ସଂପୃକ୍ତ ୩ ଅଭିଯୁକ୍ତଙ୍କୁ ରାୟଗଡ଼ାରୁ ଉଠାଇଛି ପୁଲିସ୍ । ବଲାଙ୍ଗିର ଜିଲ୍ଲା ଟିଟିଲାଗଡ ଗାଁର ମୃତ ଉମାକାନ୍ତ ସେହି ଗାଁର ଜଣେ ଯୁବତୀକୁ ପ୍ରେମ କରୁଥିଲେ । ଉମାକାନ୍ତଙ୍କ ସାଙ୍ଗ ରୁମାନ ବଗର୍ତ୍ତୀ ମଧ୍ୟ ଉମାକାନ୍ତଙ୍କ ପ୍ରେମିକାକୁ ଏକତରଫା ଭଲପାଇ ବସିଲେ । କିନ୍ତୁ ଉମାକାନ୍ତ ପ୍ରେମ ଅତି ନିବିଡ଼କୁ ଦେଖି ସହି ପାରୁ ନଥିଲା ରୂମାନ । ଏଣୁ ଉମାକାନ୍ତକୁ ଶେଷ କରି ନିଜ ପ୍ରେମକୁ ସୁଦୃଢ କରିବାକ ଚାହୁଁ ଥିଲା ଅଭିଯୁକ୍ତ ।
ଏଣୁ ରୁମାନ ଉମାକାନ୍ତକୁ ହତ୍ୟା କରିବା ପାଇଁ ଏକ ଯୋଜନା କରିଥିଲା । ରାୟଗଡ଼ା ଜିଲ୍ଲା ଥେରୁବାଲି ଗାଁରେ ରୁମାନର ସମ୍ପର୍କୀୟ ରହୁଛନ୍ତି ଏଣୁ ତାଙ୍କରି ଘରକୁ ବୁଲିଯିବା କହି ଉମାକାନ୍ତଙ୍କୁ ଗତ ୩ ତାରିଖରେ ରାୟଗଡ଼ା ଆଣିଥିଲା ସେ । ତା ପରଦିନ ଅର୍ଥାତ୍ ୪ ତାରିଖ ରାତିରେ ଦୁଇ ଜଣ ସମ୍ପର୍କୀୟଙ୍କ ସହିତ ଯୋଜନାବଦ୍ଧ ଭାବେ ପାଙ୍ଗେଲୁ ନିକଟ ଆଡ଼ିବନ୍ଧ ନିକଟରେ ଭୋଜି କରିଥିଲେ ।
ମଧ୍ୟାାହ୍ନ ଭୋଜନ ପୂର୍ବରୁ ପୂର୍ବରୁ ସଭିଁଏ ମଦ୍ୟ ପାନ କରିଥିଲେ । କିଛି ସମୟ ମଧ୍ୟରେ ଦୁଇ ବନ୍ଧୁଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା । ଫଳରେ ହତ୍ୟାକାଣ୍ଡ ରଚିଥିବା ବନ୍ଧୁ ଉତ୍ତ୍ୟକ୍ତ ହୋଇ ନିଜ ବନ୍ଧୁକୁ ତଣ୍ଟି ଚିପି ହତ୍ୟା କରିଥିଲା । ହତ୍ୟା ପରେ ନଦୀବାଲିରେ ମୃତଦେହକୁ ପୋତି ଦେଇ ଚାଲି ଯାଇଥିଲେ । ହତ୍ୟାର ଶିକାର ଯୁବକ ନିଜ ଘରକୁ ନ ଫେରିବା ପରେ ପରିବାର ଲୋକ ମେ ୧୧ ତାରିଖରେ ଏ ନେଇ ଟିଟିଲାଗଡ଼ ଥାନାରେ ନିଖୋଜ ଏତଲା ଦେଇଥିଲେ ।
ପୁଲିସ୍ ମୃତ ଯୁବକଙ୍କ ମୋବାଇଲ ନମ୍ବରକୁ ଟ୍ରାକିଂ କରିବା ପରେ ଶେଷ ଲୋକେସନ୍ ରାୟଗଡ଼ା ଜିଲ୍ଲାର ଥେରୁବାଲି ଅଞ୍ଚଳରେ ଦେଖିବାକୁ ମିଳିଥିଲା । ପୁଲିସ୍ ମୋବାଇଲ ଟ୍ରାକିଂ ଆଧାରରେ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତକୁ ଟିଟିଲାଗଡ଼ରୁ ଉଠାଇବା ପରେ ଥେରୁବାଲି ଅଞ୍ଚଳରୁ ଅନ୍ୟ ଦୁଇ ଅଭିଯୁକ୍ତକୁ ଉଠାଇଛି । ଆଜି ଅଭିଯୁକ୍ତ ରୁମାନ ବଗର୍ତ୍ତୀକୁ ଘଟଣାସ୍ଥଳକୁ ନେଇ ହତ୍ୟା ପରେ ପୋତା ଯାଇଥିବା ଉମାକାନ୍ତଙ୍କ ମୃତଦେହକୁ ଉଦ୍ଧାର କରି ବ୍ୟବଛେଦ ପରେ ପରିବାରକୁ ହସ୍ତାନ୍ତର କରାଯାଇଛି । କଲ୍ୟାଣସିଂହପୁର ଥାନା ପୁଲିସର ଏକ ଟିମ୍ ଏହି ହତ୍ୟାକାଣ୍ଡର ତଦନ୍ତ ଆରମ୍ଭ କରିଛି ।
ରାୟଗଡାରୁ ରଞ୍ଜନ କୁମାର ରଥ, ଇଟିଭି ଭାରତ
