ରାୟଗଡ଼ା: ଜିଲ୍ଲାକୁ ପୁଣି ଫେରିଛି ମଦ ବିଭୀଷିକା । କଲ୍ୟାଣସିଂହପୁର ବ୍ଲକରେ ଘଟିଛି ଏପରି ଅଘଟଣ। ବ୍ଲକର ଦୁଇଟି ପୃଥକ ସ୍ଥାନରେ ମଦଜନିତ ଖବର ଆସିଛି । ଧାମୁଣି ପଙ୍ଗା ପଞ୍ଚାୟତ ଅନ୍ତର୍ଗତ କୁଲୁମୁଇ ଗାଁର ଗୋଟିଏ ପରିବାରର ଦୁଇଭାଇ ବିଶ୍ବନାଥ ୱାନ୍ଦାଲାକା ଏବଂ ବଳରାମ ୱାନ୍ଦାଲାକା ବିଶାକ୍ତ ମଦ ପିଇ ଗୁରୁତର ହୋଇଯାଇଥିଲେ । ତାଙ୍କୁ ପ୍ରଥମେ କଲ୍ୟାଣସିଂହପୁର ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ର ପରେ ରାୟଗଡ଼ା ଜିଲ୍ଲା ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ।
ସୂଚନା ମୁତାବକ ଦୁଇ ଭାଇ ଗାଇ ଚରାଇବାକୁ କତାଗୁଡ଼ା ଗାଁକୁ ଯାଇଥିବା ବେଳେ ସେଠାରୁ ଦେଶିରନ୍ଧା ମଦ ଆଣି ପିଇଥିଲେ । ଏହି ମଦ ପିଇବାର କିଛି ସମୟ ପରେ ଉଭୟଙ୍କୁ ଜ୍ବର, ପେଟ ବ୍ୟଥା ସାଙ୍ଗକୁ ତରଳ ଝାଡ଼ା ହୋଇଥିଲା । ଫଳରେ ପରିବାର ଲୋକେ ଉଭୟଙ୍କୁ ଆମ୍ବୁଲାନସ ଯୋଗେ କଲ୍ୟାଣସିଂହପୁର ଗୋଷ୍ଠି ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରିଥିଲେ । ସେଠାରେ ଗୁରୁତର ହେବାରୁ ପୁଣି ଏକ ଆମ୍ବୁଲାନ୍ସ ଯୋଗେ ରାୟଗଡ଼ାକୁ ସ୍ଥାନାନ୍ତର କରାଯାଇଛି ।
ସେହିପରି ନାରାୟଣପୁର ପଞ୍ଚାୟତ ଅନ୍ତର୍ଗତ ସିରିପୁର ଗାଁରେ ମଧ୍ୟ ୪ ଜଣ ଦେଶୀ ମଦ ପିଇ ଅସୁସ୍ଥ ଥିବା ଖବର ମିଳିଛି । ସେମାନେ ହେଲେ ସମା ନିଶିକା , କାଡ଼୍ରାକା କିତ୍ରୀ , କାଡ଼୍ରାକା ଅର୍ଜୁନ, ବିରା ନିଶିକା ଏବଂ ରାମୁ ନିଶିକା । ସିରିପୁରର ଅସୁସ୍ଥଙ୍କୁ ଚିକିତ୍ସା ପାଇଁ ଡ଼ାକ୍ତର ଖାନା ନଆସି ଘରୋଇ ଚିକିତ୍ସା କରିଥିଲେ । ଏହି ଘଟଣାରେ ଜିଲ୍ଲାପାଳ ଜିଲ୍ଲା ଅବକାରୀ ଅଧିକ୍ଷକ ଏବଂ ସିଡ଼ିଏମଓଙ୍କ ଠାରୁ ରିପୋର୍ଟ ମାଗିଛନ୍ତି। ଏଭଳି ବିଶାକ୍ତ ମଦ ରାନ୍ଧୁଥିବା କିମ୍ବା ବିକୁଥିବା ଲୋକଙ୍କୁ ଚିହ୍ନଟକରି ତୁରନ୍ତ ଆଇନଗତ ପଦକ୍ଷେପ ନେବା ପାଇଁ ନିର୍ଦ୍ଧେଶ ଦେଇଛନ୍ତି ଏସପି ।
ରାୟଗଡ଼ାରୁ ରଞ୍ଚନ ରଥ, ଇଟିଭି ଭାରତ
