ରାୟଗଡା: ଏକ ବଡ ଧରଣର ଚୋରି ମାମଲାର ପର୍ଦ୍ଦାଫାଶ କରିଛି ରାୟଗଡା ପୋଲିସ । ଜୁନ ୨୯ ତାରିଖ ଦିନ ରାୟଗଡା ବସଷ୍ଟାଣ୍ଡରୁ ଚୋରି ହୋଇଥିବା ସମସ୍ତ ଗହଣାକୁ ଜବତ କରିବା ସହ ଚୋରକୁ ମଧ୍ୟ ଗିରଫ କରିବାରେ ସଫଳ ହୋଇଛି ।
ସୂଚନାନୁଯାୟୀ, ୨୯ ତାରିଖ ରାତିରେ ପ୍ରଦୀପ ବେହେରା କୋରାପୁଟ ଜିଲ୍ଲା ଅନ୍ତର୍ଗତ କାକିରିଗୁମ୍ମା ଗ୍ରାମ ନିବାସୀ ଇନ୍ଦ୍ରାବତୀ-ଭଞ୍ଜନଗର ବସ ଯୋଗେ ଆସ୍କାଠାରୁ ଲକ୍ଷ୍ମୀପୁର ଅଭିମୁଖେ ବାହାରିଥିଲେ । ରାତି ୧୦.୪୦ ରେ ରାୟଗଡା ବସଷ୍ଟାଣ୍ଡରେ ବସ ପହଞ୍ଚିବା ପରେ ପ୍ରଦୀପ ବେହେରା ନିଜ ସ୍ତ୍ରୀକୁ ଗାଡି ଭିତରେ ବସିବା ପାଇଁ କହି ପାଣି ଆଣିବା ନିମନ୍ତେ ବାହାରକୁ ଯାଇଥିଲେ । ପାଣି ନେଇ ଫେରିବା ପରେ ଗାଡି ଭିତରେ ନିଜର ଏକ ଟ୍ରଲି ବ୍ୟାଗ ନଥିବା ଦେଖିବାକୁ ପାଇଥିଲେ । ବହୁ ସମୟ ଧରି ଖୋଜା ଖୋଜି କରିବା ପରେ ବ୍ୟାଗ୍ ନ ପାଇବାରୁ ଏନେଇ ରାୟଗଡା ଥାନାରେ ଏତଲା ଦେଇଥିଲେ ।
ଏତଲା ଅନୁଯାୟୀ ବ୍ୟାଗ ଭିତରେ ୧୬ ଗ୍ରାମ ସୁନା ସହ ୧ କେଜି ଓଜନର ରୂପା ଗହଣା ଥିବା ନେଇ ଲିଖିତ ଆକାରରେ ଜଣାଇଥିଲେ । ଏନେଇ ରାୟଗଡା ଥାନା ପକ୍ଷରୁ ଏକ ମାମଲା ରୁଜ୍ଜୁ କରାଯାଇ ତଦନ୍ତ ଆରମ୍ଭ କରାଯାଇଥିଲ। । ପୋଲିସ ତଦନ୍ତ କରି 3 ଦିନ ମଧ୍ୟରେ ଚୋରକୁ ଖୋଜି ବାହାର କରିବା ସହ ଚୋରି ହୋଇଥିବା ସମସ୍ତ ସୁନା ଏବଂ ରୂପା ଅଳଙ୍କାର ଜବତ କରିଛି । ଏନେଇ ରେଲି ସାହିରୁ ଜଣକୁ ଗିରଫ କରାଯାଇଛି ଏବଂ ବର୍ତମାନ ସୁଦ୍ଧା ୨ ଅଭିଯୁକ୍ତ ଫେରାର ଥିବା ରାୟଗଡା ଏସପି ଡଃ ଶ୍ରବଣା ବିବେକ ଏମ ସୂଚନା ଦେଇଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
