ରାୟଗଡ଼ା: ଆକ୍ସନ ମୋଡରେ ଅବକାରୀ ବିଭାଗ । ୨ ଦିନରେ ପ୍ରାୟ ୫୦୦ ଲିଟର ଦେଶୀ ମଦ ଜବତ କରିବା ସହ ପ୍ରାୟ ୩୩୦୦ ଲିଟର ପୋଚ ନଷ୍ଟ କରିଛି ବିଭାଗ । ରାୟଗଡ଼ାର ପୂର୍ବତନ ଅବକାରୀ ଅଧିକ୍ଷକ ନିନା ବେଉରା ଭିଜିଲାନ୍ସ ଦ୍ବାରା ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଧରାପଡିବା ପରେ ବିଭାଗ ଉପରେ ଲାଗିଥିଲା କଳଙ୍କ । ତେବେ ଗତ ୩ ତାରିଖରେ ଏହି ପଦବୀରେ ଯୋଗ ଦେଇଛନ୍ତି ଅଭିରାମ ବେହେରା ।
ନୂତନ ଅଧିକାରୀ ଦାୟିତ୍ଵ ନେବାପରେ ରାୟଗଡା ଜିଲ୍ଲାରେ ଆରମ୍ଭ ହୋଇଛି ନକଲି ମଦଭାଟି ଭଙ୍ଗା ଅଭିଯାନ । ଅବକାରୀ ବିଭାଗ ଓ ମୋବାଇଲ ଟିମର ମିଳିତ ଚଢ଼ାଉରେ ଆଜି(ସୋମବାର) ସଦର ଅଞ୍ଚଳରେ ୨୬୪ ଲିଟର ବେଆଇନ ଦେଶୀ ମଦ ଜବତ କରିବା ସହ ୧୧୦୦ ଲିଟର ପୋଚ ନଷ୍ଟ କରାଯାଇଛି । ଏଥିରେ ସମ୍ପୃକ୍ତ ୪ ଜଣ ଅପରାଧୀଙ୍କୁ ଗିରଫ କରାଯାଇଛି । ସେହିପରି ଗତକାଲି(ରବିବାର) ଜିଲ୍ଲାର ଚାନ୍ଦିଲି, କଲ୍ୟାଣସିଂହପୁର, ଗୁଣୁପୁର ଓ ବିଷମକଟକ ଥାନା ଅଞ୍ଚଳରେ ବ୍ୟାପକ ଚଢ଼ାଉ କରି ୨୩୨ ଲିଟର ଦେଶୀ ମଦ ଜବତ କରିବା ସହ ୨୨୦୦ ଲିଟର ପୋଚ ନଷ୍ଟ କରାଯାଇଥିଲା ।
ଇଟିଭି ଭାରତ, ରାୟଗଡ଼ା
