ରାୟଗଡା: କୋଭିଡ ଆଶ୍ରୟ ସ୍ଥଳୀରେ ଅବ୍ୟବସ୍ଥା । ଖାଇବାକୁ ମିଳୁନି କି, ଯିବା ପାଇଁ ବ୍ୟବସ୍ଥା ନାହିଁ । ସେପଟେ ପ୍ରବାସୀ ଶ୍ରମିକ ଓଡିଶା ମାଟିରେ ଚାଲିକି ଯିବେନି କି ଭୋକରେ ରହିବେ ନାହିଁ ବୋଲି ରାଜ୍ୟ ସରକାର ଜଣାଇଥିଲେ । ହେଲେ ଏ ନିର୍ଦ୍ଦେଶକୁ ଖୁଲମ ଖୁଲାମ ଉଲ୍ଲଙ୍ଘନ ହେଉଛି ରାୟଗଡା ଜିଲ୍ଲାରେ ।
ପ୍ରତ୍ୟେକ ଦିନ ରାୟଗଡା ସହରକୁ ଶହଶହ ପ୍ରବାସୀ ଶ୍ରମିକ ରାଜ୍ୟ ବାହାରୁ ଚାଲି ଚାଲି ଆସୁଛନ୍ତି । ସେମାନଙ୍କୁ ଏଠାରେ ସର୍ବନିମ୍ନ ସୁବିଧା ମଧ୍ୟ ମିଳୁନଥିବା ଅଭିଯୋଗ ହେଉଛି । ଠିକ ଭାବେ ଲୋକଙ୍କୁ ଖାଦ୍ୟପେୟ ଦିଆ ଯାଉ ନଥିବା ବେଳେ ମହିଳାଙ୍କ ନିମନ୍ତେ ସ୍ନାନ କିମ୍ବା ଶୌଚ ପାଇଁ ଆଶ୍ରୟ ସ୍ଥଳୀରେ ବନ୍ଦୋବସ୍ତ କରିନଥିବା ଅଭିଯୋଗ ହୋଇଛି ।
କୋଭିଡ ଆଶ୍ରୟ ସ୍ଥଳୀରେ 4 ରୁ 5 ଦିନ ରହିବା ପରେ ଶ୍ରମିକ ମାନଙ୍କୁ ଘରକୁ ପଠାଯିବା ପାଇଁ କୌଣସି ବ୍ୟବସ୍ଥା କରାଯାଉ ନାହିଁ । ଯାହାକୁ ନେଇ ଅନ୍ତେବାସୀ ଶ୍ରମିକଙ୍କ ମଧ୍ୟରେ ପ୍ରବଳ କ୍ଷୋଭ ଦେଖା ଦେଇଛି । ଅବ୍ୟବସ୍ଥା ପାଇଁ ପିଲା ଛୁଆଙ୍କ ସହ ଆଶ୍ରୟସ୍ଥଳୀ ଛାଡିଥିବା ବରଗଡ ଜିଲ୍ଳାର କିଛି ଶ୍ରମିକଙ୍କୁ ଭେଟିଥିଲୁ ଆମେ । ତାଙ୍କ ସହିତ କଥା ହୋଇଥିଲେ ଆମ ରାୟଗଡା ପ୍ରତିନିଧି ରଞ୍ଜନ ରଥ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
