ରାୟଗଡ଼ା : ପରକୀୟାପ୍ରୀତି ସନ୍ଦେହରେ ଜଘନ୍ୟ ହତ୍ୟାକାଣ୍ଡ । ପତ୍ନୀକୁ ଛୁରୀଭୂଷି ହତ୍ୟା କଲା ସ୍ୱାମୀ (Husband killed wife in Rayagada)। ରାୟଗଡ଼ା ଜିଲ୍ଲା କଲ୍ୟାଣସିଂହପୁର ଥାନା ଅନ୍ତର୍ଗତ କତାଗୁଡା ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି । ମୃତ ମହିଳା ଜଣକ କତାଗୁଡା ଗ୍ରାମର ରାଧା କୌଶଲ୍ୟା ବୋଲି ଜଣା ପଡ଼ିଛି ।
ସୂଚନାନୁସାରେ ରାଧାଙ୍କ ଚରିତ୍ରକୁ ନେଇ ସ୍ଵାମୀ ନୀଳକଣ୍ଠ ସବୁବେଳେ ସନ୍ଦେହ କରୁଥିଲା । ଏନେଇ ଅନେକ ସମୟରେ ପତ୍ନୀ ରାଧାଙ୍କୁ ମାରପିଟ କରୁଥିଲା । ଏହାକୁ ସହି ନପାରି ରାଧା ନିଜ ପିଲାଙ୍କୁ ନେଇ ବାପଘରକୁ ଚାଲି ଆସିଥିଲେ ରାଧା । ହେଲେ ବାପଘରେ କିଛିଦିନ ରହିବା ପରେ ନୀଳକଣ୍ଠ ଯାଇ ରାଧାଙ୍କୁ ପୁଣି ଘରକୁ ନେଇ ଆସିଥିଲା ।
ତେବେ ଘରକୁ ଆସିବାର କିଛିଦିନ ପରେ ପୁଣିଥରେ ନୀଳକଣ୍ଠ ରାଧାଙ୍କ ସହ ପାଟିତୁଣ୍ଡ କରିଥିଲା । ଏପରିକି ରାଧାଙ୍କ ଚରିତ୍ରକୁ ସନ୍ଦେହ କରି ଅନେକ ଅଶ୍ରାବ୍ୟ ଭାଷାରେ ଗାଳିଗୁଲଜ କରୁଥିଲା । ହେଲେ ଆଜି(ମଙ୍ଗଳବାର) ସକାଳେ ପୁଣିଥରେ ରାଧାଙ୍କର ଅନ୍ୟ ପୁରୁଷ ସହ ସମ୍ପର୍କ ଥିବା ନେଇ ନୀଳକଣ୍ଠ ସନ୍ଦେହ କରିଥିଲା।
ଏହାକୁ ନେଇ ଉଭୟଙ୍କ ମଧ୍ୟରେ ବଚସା ଆରମ୍ଭ ହୋଇଥିଲା । ଏଥିରେ ନୀଳକଣ୍ଠ ଉତକ୍ଷୀପ୍ତ ହୋଇ ଏକ ଧାରୁଆ ଅସ୍ତ୍ର ସାହାଯ୍ୟରେ ରାଧାଙ୍କୁ ଆକ୍ରମଣ କରିଥିଲା । ରାଧାଙ୍କର ଘଟଣାସ୍ଥଳରେ ମୃତ୍ୟୁ ହେବାର ଦେଖି ନୀଳକଣ୍ଠ ସେଠାରୁ ଫେରାର ହୋଇଯାଇଥିଲା ।
ଗ୍ରାମବାସୀ ଏହା ଜାଣିବା ପରେ ପୋଲିସକୁ ସୂଚନା ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଉଦ୍ଧାର କରିଥିଲା । ପରେ ଅଭିଯୁକ୍ତ ନୀଳକଣ୍ଠକୁ ଅଟକ ରଖିଛି ପୋଲିସ । ତେବେ ଏହି ଘଟଣାକୁ ନେଇ ମୃତ ରାଧାଙ୍କ ପରିବାର ଲୋକ ପୋଲିସର କାର୍ଯ୍ୟାନୁଷ୍ଠାନକୁ ନେଇ ପ୍ରଶ୍ନ କରିଛନ୍ତି ।
ରାଧାଙ୍କ ପରିବାରକୁ ନଜଣାଇ ପୋଲିସ ମୃତଦେହ ଜବତ କରିଥିବା ଅଭିଯୋଗ ହୋଇଛି । ଏହାସହ ଅଭିଯୁକ୍ତ ନୀଳକଣ୍ଠ ନାଁରେ ଏଯାଏଁ ମାମଲା ରୁଜୁ କରିନି ପୋଲିସ। ତେବେ ପୋଲିସର କାର୍ଯ୍ୟାନୁଷ୍ଠାନକୁ ନେଇ ସ୍ଥାନୀୟ ଲୋକେ ଅସନ୍ତୋଷ ଜାହିର କରିଛନ୍ତି । ଅନ୍ୟପକ୍ଷରେ ରାଧାଙ୍କ ମୃତ୍ୟୁପରେ ତାଙ୍କ ପରିବାରରେ ଶୋକର ଛାୟା ଖେଳିଯାଇଛି ।
ଇଟିଭି ଭାରତ, ରାୟଗଡ଼ା
