ରାୟଗଡ଼ା: ଦୀର୍ଘ ବର୍ଷ ଧରି ବେଆଇନ ଭାବେ ରାୟଗଡ଼ା ସହର ଭିତରେ ବେଆଇନ ଭାବେ ଚାଲିଥିବା ଘରୋଇ କ୍ଲିନିକ ସିଲ୍ ହୋଇଛି । ସ୍ଵାସ୍ଥ୍ୟ ବିଭାଗ ଓ ଜିଲ୍ଲା ପ୍ରଶାସନ ପକ୍ଷରୁ ମିଳିତ ଭାବେ ଚଢ଼ାଉ କରି ଏହି କ୍ଲିନିକକୁ ସିଲ୍ କରାଯାଇଛି । ବେଆଇନ ଭାବେ କ୍ଲିନିକ୍ ଚଲାଇଥିବା ସତୀଶ କୁମାର ନାମକ ଯୁବକ ନାମରେ ମାମଲା ରୁଜୁ ପାଇଁ ସ୍ଵାସ୍ଥ୍ୟ ବିଭାଗ ବିଚାର ବିମର୍ଶ ଚଲାଇଥିବା ଜଣାପଡ଼ିଛି ।
ଘଟଣାରୁ ପ୍ରକାଶ ଯେ, ରାୟଗଡ଼ା ସହରର ମେନ୍ ରୋଡରେ ଏକ ଭଡ଼ା ଘରେ ଦୀର୍ଘ ଦିନ ହେବ ବେଆଇନ ଭାବରେ ଏକ କ୍ଲିନିକ୍ ଚାଲିଥିବା ଜିଲ୍ଲାପାଳଙ୍କୁ ସୂଚନା ମିଳିଥିଲା । ସୂଚନା ମିଳିବା ପରେ ଚଢ଼ାଉ କରିବା ପାଇଁ ସ୍ଵାସ୍ଥ୍ୟ ବିଭାଗକୁ ନିର୍ଦ୍ଦେଶ ଦେଇଥିଲେ ଜିଲ୍ଲାପାଳ ସ୍ଵଧାଦେବ ସିଂହ । ଏହାପରେ ରାୟଗଡ଼ା ସ୍ଵାସ୍ଥ୍ୟ ବିଭାଗ ଏବଂ ଜିଲ୍ଲା ପ୍ରଶାସନ ପକ୍ଷରୁ ଏକ ଟିମ୍ ଗଠନ କରାଯାଇ ଆଜି (ସୋମବାର) ସନ୍ଧ୍ୟାରେ ଚଢ଼ାଉ କରାଯାଇଥିଲା । ଏହି ଚଢ଼ାଉରେ ତହସିଲଦାର ତାପସ ରାଉତ, ଅତିରିକ୍ତ ତହସିଲଦାର ସୁନୀଲ ଖରା, ଅତିରିକ୍ତ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡାକ୍ତର ବରଦାକାନ୍ତ ମିଶ୍ର ପ୍ରମୁଖ ସାମିଲ ଥିଲେ ।
ତେବେ ଏହି ବେଆଇନ ଘରୋଇ କ୍ଲିନିକରେ ଚଢ଼ାଉ ବେଳେ ପ୍ରାୟ ୮ ଜଣ ରୋଗୀ ଚିକିତ୍ସିତ ହେଉଥିବା ଦେଖିବାକୁ ମିଳିଥିଲା । ତୁରନ୍ତ ସମସ୍ତ ରୋଗୀଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଯିବା ପାଇଁ ପରାମର୍ଶ ଦିଆଯାଇଛି । ଏହାପରେ କ୍ଲିନିକ ସିଲ୍ କରାଯାଇଥିଲା । ଏହି ବେଆଇନ କ୍ଲିନିକ୍ ପରିସରରେ ଗୋଟିଏ ମେଡିକାଲ ଚଳାଇବା ଭଳି ସରଞ୍ଜାମ ରହିଥିବା ଦେଖିବାକୁ ମିଳିଛି।
ଇଟିଭି ଭାରତ, ରାୟଗଡ଼ା
