ରାୟଗଡ଼ା: ରୋଷେଇ କରୁଥିବା ବେଳେ ଅଚାନକ ନିଆଁ ଲାଗି ଜଳିଗଲା ୧୫ ଘର । ପାଉଁଶ ହୋଇଯାଇଛି ଲକ୍ଷାଧିକ ଟଙ୍କାର ସମ୍ପତ୍ତି ନଷ୍ଟ । ଏଭଳି ଅଭାବନୀୟ ଘଟଣା ଘଟିଛି ରାୟଗଡ଼ା ଜିଲ୍ଲା ଗୁଣୁପୁର ଥାନା ରେଗେଡ଼ା ଗ୍ରାମପଞ୍ଚାୟତର ଚିନାରୀଗୁଡ଼ା ଗ୍ରାମରେ । ବୁଧବାର ସନ୍ଧ୍ୟାରେ ଘରେ ରୋଷଇ ଚାଲୁଥିବା ବେଳେ ହଠାତ ନିଆଁ ଲାଗିଯାଇଥିଲା ।
ଆଉ ଏହି ନିଆଁ ରୋଷେଇ ଘରୁ ଲାଗି ଗୋଟିଏ ପରେ ଗୋଟିଏ ଘରକୁ ବ୍ୟାପିଯାଇଥିଲା । ଫଳରେ ନିଆଁର ପ୍ରକୋପରେ ୧୫ଟି ଘର ଭସ୍ମୀଭୂତ ହୋଇଯାଇଛି । ଘଟଣାରେ ସାନବିସିଙ୍ଗ ଶବର, ପିଠା ଶବର, ଅଜୟ ଶବର, ଏସ୍ ଶବରଙ୍କ ଘର ଜଳିଯିବା ସହ ସମସ୍ତ ଆସବାବାପତ୍ର, ଫସଲ ଓ ଧନସମ୍ପତ୍ତି ନଷ୍ଟ ହୋଇଯାଇଛି । ଖବରପାଇ ଗୁଣୁପୁର ଅଗ୍ନିଶମ ବିଭାଗ ପହଁଞ୍ଚି ନିଆଁକୁ ଆୟତ୍ତ କରିଥିଲେ । ପରେ ଗୁଣପୁର ବିଡିଓ ଶାନ୍ତିପ୍ରଭା ପ୍ରଧାନ, ତହସିଲଦାର ଶରତ କୁମାର ନାୟକଙ୍କ ନିର୍ଦ୍ଦେଶକ୍ରମେ ଅତିରିକ୍ତ ତହସିଲଦାର ଘଟଣାସ୍ଥଳରେ ପହଞ୍ଚି କ୍ଷତିଗ୍ରସ୍ତ ପରିବାକୁ ରନ୍ଧାଖାଦ୍ୟ, ପୋଷାକ ଓ ଅତ୍ୟାବଶ୍ୟକୀୟ ସାମଗ୍ରୀ ପ୍ରଦାନ କରିଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
