ରାୟଗଡା: ଲକଡାଉନରେ ରାୟଗଡା ସପୁରୀ ଚାଷୀଙ୍କ ଅଭାବୀ ବିକ୍ରି । ଉତ୍ପାଦନର ଉଚିତ ମୂଲ୍ୟ ନପାଇ ହତାଶ ହୋଇ ପଡିଛନ୍ତି ଚାଷୀ । ବିଷମ କଟକ ବ୍ଲକ ନିୟମଗିରି ପାହାଡି ଅଞ୍ଚଳରେ ସପୁରୀ ଚାଷ କରୁଥିବା ଡଙ୍ଗର ଜନଜାତିଙ୍କୁ ଏଥର ସହିବାକୁ ପଡିଛି ଲକ୍ଷାଧିକ ଟଙ୍କାର କ୍ଷତି। ବଜାରର ସୁବିଧା ଓ ଗୋଦାମ ଅଭାବରୁ ଶାଗ ମାଛ ଦରରେ ବିକ୍ରି ହେଉଛି ସୁଆଦିଆ ସପୁରୀ ।
ସପୁରୀ ଚାଷ ପାଇଁ ବେଶ ଅନୁକୂଳ ନିୟମଗିରି ପାର୍ବତ୍ୟାଞ୍ଚଳ । ଏଠାରେ ବାର୍ଷିକ 18 ହଜାରରୁ ଅଧିକ ମେଟ୍ରିକ ଟନ ସପୁର ଉତ୍ପାଦନ ହୋଇଥାଏ। ଚଳିତ ବର୍ଷ ଭଲ ଚାଷ ହୋଇଥିଲା। ଡଙ୍ଗରିଆ ଆଶା କରୁଥିଲେ ଏଥର ଦୁଇ ପଇସା ଲାଭ କରିବେ । ହେଲେ ଫସଲ ବେଳକୁ ଜମିରେ ପଡିରହିଛି ଫଳ । କୋରୋନା ଲକଡାଉନ କାରଣରୁ ବନ୍ଦ ରହିଲା ଗାଡିମୋଟର, ଦୋକାନବଜାର । ଫଳରେ ବଜାରକୁ ଫଳ ଆସି ନ ପାରି ସଢୁଛି ସପୁରୀ । ଅନ୍ୟପଟେ, ସୁସ୍ବାଦ ସପୁରୀକୁ ଶାଗମାଛ ଦରରେ ବାହାର ରାଜ୍ୟର ବ୍ୟବସାୟୀଙ୍କୁ ବିକ୍ରି କରି କ୍ଷତି ସହୁଛନ୍ତି ଡଙ୍ଗରିଆ ଜନଜାତି ।
ବିଷମ କଟକ ଓ ମୁନିଗୁଡା ବ୍ଲକର 5ଟି ପଞ୍ଚାୟତର 62 ଟି ଗାଁରେ ବସବାସ କରୁଥିବା ଡଙ୍ଗରିଆ ଜନଜାତି ସପୁରୀ ଚାଷ କରିଥାନ୍ତି । 1 ହଜାରରୁ ଊର୍ଦ୍ଧ୍ବ ହେକ୍ଟର ଜମିରେ କରାଯାଏ ପାହାଡି ସପୁରୀ ଚାଷ । କହିବାକୁ ଗଲେ 90 ପ୍ରତିଶତ ଡଙ୍ଗରିଆ ସମ୍ପ୍ରଦାୟ ନିଜର ଭରଣପୋଷଣ ଏଥିରୁ ହିଁ କରିଥାନ୍ତି । ତେଣୁ ଏମାନଙ୍କୁ ଆର୍ଥିକ କ୍ଷେତ୍ରରେ ସଶକ୍ତିକରଣ କରିବାକୁ ପ୍ରତିବର୍ଷ ଡଙ୍ଗରିଆ କନ୍ଧ ଉନ୍ନୟନ ସଂସ୍ଥା ପକ୍ଷରୁ ଯୋଗାଇ ଦିଆଯାଏ ସପୁରୀର ଚାରା । ହେଲେ ଅମଳ ବେଳକୁ ମିଳୁନି ପ୍ରକୃତ ମୂଲ୍ୟ । 35 ଟଙ୍କା ବଦଳରେ ବାଧ୍ୟ ହୋଇ 5 ଓ 10 ଟଙ୍କା ବିକ୍ରି କରୁଛନ୍ତି । ଏଥିରେ ପରିବାର ପ୍ରତିପୋଷଣ କଷ୍ଟକର ହୋଇପଡିବା ସହ ଓ ଆଗାମୀ ଫସଲ ବାବଦକୁ ସଞ୍ଚୟ କରିପାରିନଥିବା ଡଙ୍ଗରିଆ କହିଛନ୍ତି । ସେପଟେ ଚଳିତ ବର୍ଷ କୋରୋନା ଯୋଗୁଁ ସପୁରି ବଜାରରେ ପ୍ରଭାବ ପଡିଥିବା ସ୍ଵୀକାର କରିଛନ୍ତି ଓରମାସର ଅଧିକାରୀ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
