ରାୟଗଡା: 5 ଦିନଧରି ସିଆରପିଏଫ ଯବାନ ଧରମ ଦେବ ନିଖୋଜ । ରାୟଗଡା ସ୍ଥିତ ସିଆରପିଏଫର 4 ର୍ଥ ବାଟାଲିଅନରେ କାମ କରୁଥିଲେ ଯବାନ ଧରମ ଦେବ । ତାଙ୍କୁ ଶେଷଖାଲ ଥାନାରେ ଡ୍ୟୁଟି ଦିଆଯାଇଥିବାବେଳେ ସେ 5 ଦିନ ହେବ କେଉଁଆଡେ ନିଖୋଜ ଅଛନ୍ତି ।
5 ଦିନ ହେବ ସିଆରପିଏଫ ଯବାନ ନିଖୋଜ
ସେ ଥାନାରୁ ଗତ 29 ତାରିଖରେ 4 ର୍ଥ ବାଟାଲିଅନ ଆସିବା ପାଇଁ ବାହାରିଥିବାବେଳେ ଏଠାରେ ପହଞ୍ଚି ନଥିଲେ । ଥାନାରୁ 4 ର୍ଥ ବାଟାଲିଅନ ମାତ୍ର 18 କିଲୋମିଟର ହୋଇଥିବାବେଳେ ସେ ପହଞ୍ଚିନଥିବାରୁ ତାଙ୍କୁ ବହୁତ ଖୋଜାଖୋଜି କରାଯାଇଥିଲା । ପରେ ତାଙ୍କର କୌଣସି ପତ୍ତା ନମିଳିବାରୁ ଉତ୍ତରପ୍ରଦେଶରେ ରହୁଥିବା ପରିବାରକୁ ଖବର ଦିଆଯାଇଥିଲା ।
ତେବେ ଆଜି(ଗୁରୁବାର) ପରିବାର ଲୋକେ ପହଞ୍ଚି ରାୟଗଡା ଥାନାରେ ଲିଖିତ ଏତଲା ଦେଇଛନ୍ତି । ବର୍ତ୍ତମାନ ସୁଦ୍ଧା ଧରମ ଦେବଙ୍କର କୌଣସି ଖବର ମିଳିନଥିବାବେଳେ ତଦନ୍ତ ଜାରି ରହିଥିବା ଜଣାପଡିଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
