ରାୟଗଡ଼ା: ରାୟଗଡ଼ା ଜିଲ୍ଲା କାଶୀପୁର ବ୍ଲକରେ ଆତଙ୍କ ସୃଷ୍ଟି କରିଥିବା ଡାଇରିଆ ହଇଜା ବୋଲି ସ୍ପଷ୍ଟ ହୋଇଛି । ଦୂଷିତ ପାଣି ପିଇ ଲୋକ ଝାଡ଼ାବାନ୍ତିରେ ଆକ୍ରାନ୍ତ ହୋଇଛନ୍ତି । ବର୍ତ୍ତମାନ ଏହା ହଇଜା ଆଡ଼କୁ ମୁଁହାଇଥିବା ନେଇ ଗତକାଲି ଜିଲ୍ଲାପାଳ ସ୍ପଷ୍ଟ କରିଥିଲେ । ଏହାପରେ ଉକ୍ତ ନଦୀ, ନାଳ ଓ ଅନ୍ୟ ଜଳ ଉତ୍ସ ବିଶୋଧନ କରିବା ପାଇଁ ନିଷ୍ପତ୍ତି ହୋଇଛି ।
କୋରାପୁଟ ଜିଲ୍ଲା ଦଶମନ୍ତପୁର ଠାରୁ ବାହାରିଥିବା ନଦୀ ହଇଜା ଉତ୍ପତ୍ତିସ୍ଥଳୀ ବୋଲି ସ୍ବାସ୍ଥ୍ୟ ବିଭାଗ ସୂଚନା ପ୍ରଦାନ କରିଛି । ତେଣୁ ସେଗୁଡିକ ବିଶୋଧନ ପାଇଁ ଉଦ୍ୟମ ଆରମ୍ଭ ହୋଇଛି । ଦଶମନ୍ତପୁର ଠାରୁ ବାହାରି କାଶୀପୁର ବ୍ଲକର ବିଭିନ୍ନ ଗାଁ ଦେଇ ପ୍ରବାହିତ ହେଉଥିବା ନଦୀ ନାଳ ସମେତ ଅନ୍ୟ ଜଳ ଉତ୍ସ ଗୁଡ଼ିକ ନିଷିଦ୍ଧାଞ୍ଚଳ ଭାବେ ଘୋଷଣା କରାଯାଇଛି ।
ସ୍ଥିତି ନିୟନ୍ତ୍ରଣକୁ ଆସିବା ଓ ଜଳ ବିଶୋଧନ ହେବା ପର୍ଯ୍ୟନ୍ତ ସେ ସ୍ଥାନର ଜଳ ବ୍ୟବହାର ଅନୁପଯୋଗୀ ବୋଲି ଘୋଷଣା କରାଯାଇଛି । ଅପରପକ୍ଷରେ ଝାଡ଼ାବାନ୍ତିରେ ୫୦ଜଣ ବର୍ତ୍ତମାନ ଆକ୍ରାନ୍ତ ହୋଇଥିବା ବେଳେ ୪ଜଣଙ୍କ ଅବସ୍ଥା ଗୁରୁତର ରହିଛି । ଏଯାଏଁ ମୃତ୍ୟୁ ସଂଖ୍ୟା 8ରେ ପହଞ୍ଚିଛି ।
ଦୂଷିତ ପାଣି ପାଇଁ ଏହିଭଳି ଘଟୁଥିବା ସ୍ପଷ୍ଟ କରିଛନ୍ତି ଜିଲ୍ଲାପାଳ । ସ୍ଥିତି ନିୟନ୍ତ୍ରଣ ପାଇଁ ସ୍ଵତନ୍ତ୍ର ମେଡିକାଲ ଟିମ୍ ସେହି ଅଞ୍ଚଳ ଗାଁ ମାନଙ୍କରେ କ୍ୟାମ୍ପ କରିଛନ୍ତି । ଆରଏମଆରସି ତରଫରୁ ଏକ ଟିମ୍ ପ୍ରଭାବିତ ଗ୍ରାମ ଗୁଡିକରେ ଜଳ ଓ ମଳ ନମୁନା ସଂଗ୍ରହ କରିବା ପରେ ହଇଜା ଜୀବାଣୁ ଜଳରେ ଥିବା ଜଣାପଡିଛି । ଏଥିସହ ଜିଲ୍ଲା ଜନସ୍ବାସ୍ଥ୍ୟ ଲ୍ୟାବ ରିପୋର୍ଟ ମଧ୍ୟ ସେହି ଆଡ଼କୁ ପୂର୍ବରୁ ଇଙ୍ଗିତ କରିଥିଲେ । ତେବେ ପରୀକ୍ଷା ସମ୍ପୂର୍ଣ୍ଣ ହେବା ପରେ ସ୍ପଷ୍ଟ କରିଛନ୍ତି ଆରଏମଆରସି ଟିମ୍ ମୁଖ୍ୟ।
ପ୍ରକାଶ ଯେ ଆଜି ମଧ୍ୟ କାଶୀପୁର, ଟିକିରି, ମାଣ୍ଡିବିସି, ଉଷାପଡା ଓ ରାୟଗଡ଼ା ଜିଲ୍ଲା ମୁଖ୍ୟ ଚିକିତ୍ସାଳୟରେ ଅନେକ ଆକ୍ରାନ୍ତଙ୍କୁ ଭର୍ତ୍ତି କରାଯାଇଛି । ଖୁରିଗାଁ, ସୁରୁଗୁଞ୍ଜା, ଟିକିରି, ଗୋବରିଘାଟି, ଜଲାକୁରା, ଦୁଡୁକାବାହାଲ, ବଡମାରିଭଟ୍ଟା, କାକୁଡିପଦର, ରାଉତଘାଟି ଭଳି ବିଭିନ୍ନ ଗାଁ ମାନଙ୍କରେ ଆକ୍ରାନ୍ତଙ୍କ ସଂଖ୍ୟା ରହିଛି । ଦୂଷିତ ପାଣି ବ୍ୟବହାର କରିବା ଯୋଗୁଁ ଝାଡ଼ାବାନ୍ତି ବ୍ୟାପୁଥିବା ପୂର୍ବରୁ ଅଭିଯୋଗ ହୋଇଛି ।
ଇଟିଭି ଭାରତ, ରାୟଗଡ଼ା
