ରାୟଗଡା: ଗତ ଡିସେମ୍ବର 23 ତାରିଖରେ ଚନ୍ଦ୍ରପୁରର ଜଣେ ଅଷ୍ଟମ ଶ୍ରେଣୀ ଛାତ୍ରୀକୁ ଦୁଷ୍କର୍ମ ପରେ ହତ୍ୟା କରାଯାଇଥିବା ବେଳେ ଏନେଇ ସ୍ଥାନୀୟ ଅଞ୍ଚଳରେ ଦାନା ବାନ୍ଧିବାରେ ଲାଗିଛି ଆଦିବାସୀ ମେଳି । ଏହି ଘଟଣାକୁ ନେଇ ସମ୍ପୃକ୍ତ ଅଞ୍ଚଳରେ ଅଶାନ୍ତି ତେଜିବାରେ ଲାଗିଛି । ଶନିବାର ଏନେଇ ଚନ୍ଦ୍ରପୁରଠାରେ ଶତାଧିକ ଆଦିବାସୀ ଏକାଠି ହୋଇ ଅନିର୍ଦ୍ଧିଷ୍ଟ କାଳ ପାଇଁ ରାସ୍ତାରୋକ ପାଇଁ ଯୋଜନା କରୁଥିବା ବେଳେ ମୁନିଗୁଡା ଏସଡିପିଓ ପହଞ୍ଚି ଲୋକଙ୍କୁ ବୁଝାସୁଝା କରିଛନ୍ତି ।
ସୂଚନା ଅନୁୟାୟୀ ଗତ ଡିସେମ୍ବର 21 ତାରିଖରେ ବନ୍ଦରୀ ଗ୍ରାମର ଅଭିଯୁକ୍ତ ସେବା ବାଗସିଂ ଚନ୍ଦ୍ରପୁର ଗ୍ରାମ ଆଦିବାସୀ ସାହିର ଜଣେ ଅଷ୍ଟମ ଶ୍ରେଣୀ ଛାତ୍ରୀକୁ ଘରେ ପହଞ୍ଚାଇବା ବାହାନାରେ ବାଇକରେ ଅପହରଣ କରି ନେଇଥିଲା । ପରେ 24 ତାରିଖରେ ଚନ୍ଦ୍ରପୁର ଗ୍ରାମଠାରୁ କିଛି ଦୂରରେ ଜଙ୍ଗଲ ଭିତରୁ ନାବାଳିକାଟିର କ୍ଷତବିକ୍ଷତ ଉଲଗ୍ନ ମୃତଦେହ ଉଦ୍ଧାର ହୋଇଥିଲା । ତେବେ ପୋଲିସର ପ୍ରାଥମିକ ତଦନ୍ତ ସମୟରେ ଦୁଷ୍କର୍ମ ପରେ ହତ୍ୟା କରାଯାଇଥିବା ଜଣାପଡିଥିଲା ।
ଏନେଇ ଦୋଷୀକୁ ଫାଶୀ ଦେବା ପର୍ଯ୍ୟନ୍ତ ଏହି ଆନ୍ଦୋଳନ ଜାରି ରହିବ ବୋଲି କହିଛନ୍ତି ସ୍ଥାନୀୟ ଲୋକେ । ଏଠାରେ ସୂଚନା ଯୋଗ୍ୟ କି ଏହି ମାମଲାରେ ପୋଲିସ ଏବେ ସେବା ବାଗସିଂକୁ ଗିରଫ କରି କୋର୍ଟ ଚାଲାଣ କରିଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
