ରାୟଗଡା: ରାୟଗଡା ଜିଲ୍ଲାରେ ବେଆଇନ ଭାବେ ଚାଲିଥିବା ଦେଶୀ ମଦ ଚାଲାଣକୁ ରୋକିବା ପାଇଁ ରାୟଗଡା ଜିଲ୍ଲା ପୋଲିସ ପକ୍ଷରୁ ଆରମ୍ଭ ହୋଇଛି ଅଭିଯାନ । ଜିଲ୍ଲା ଆରକ୍ଷୀ ଅଧିକ୍ଷକ ଶର୍ବଣ ବିବେକ ଏମଙ୍କ ପ୍ରତ୍ୟେକ୍ଷ ତତ୍ବାବଧାନରେ ଜିଲ୍ଲାର ତିନୋଟି ପୋଲିସ ସବଡ଼ିଭିଜନର ଏସଡ଼ିପିଓଙ୍କ ନେତୃତ୍ବରେ ଅବକାରୀ ଏବଂ ପୋଲିସକୁ ନେଇ ତିନୋଟି ଟିମ ଗଠନ କରାଯାଇ ବିଭିନ୍ନ ଅଞ୍ଚଳରେ ଚଢାଉ ଜାରି ରହିଛି ।
ଏହି ଟିମ ଚୋରା ମଦ ଆଡ୍ଡାସ୍ଥଳୀ ଉପରେ ଚଢାଉ ଆରମ୍ଭ କରିଛି । ଏହି କ୍ରମରେ ରାୟଗଡା ଜିଲ୍ଲା ଅନ୍ତର୍ଗତ କଲ୍ୟାଣସିଂହପୁର ଥାନା ଅଧିନସ୍ଥ ବିଭିନ୍ନ ସ୍ଥାନରେ ଚଢାଉ କରି ବ୍ୟାପକ ଦେଶୀ ମଦ ଜବତ କରିଥିବା ବେଳେ ଚୋରା କାରବାରରେ ସଂପୃକ୍ତ ୨ ଜଣ ବେପାରୀଙ୍କୁ ମଧ୍ୟ ଗରିଫ କରିଛି କଲ୍ୟାଣସିଂହପୁର ପୋଲିସ ।
ସେହିପରି ଗୁଣପୁର ଉପଖଣ୍ଡ ପଦ୍ମପୁର ଥାନା ଅଧିନରେ ଥିବା ମରମା ପଞ୍ଚୟତର ମହିଳା ସ୍ବୟଂ ସହାୟକ ଗୋଷ୍ଠୀ ସହାୟତାରେ ମଙ୍ଗଳଗୁଡ଼ା ଗାଁରେ ଚଢ଼ାଉ କରି ୩୦୦୦ ଲିଟର ମଦ ସହ ୨୧୦ ଲିଟର ମହୁଲି ମଦ ନଷ୍ଟ କରିଛନ୍ତି ।
ଏହି ଚଢାଉ ସମୟରେ ସେହି ଗାଁର ଗୋପାଳ ବିଡ଼ିକା ଏବଂ କଣ୍ଡାଗରି ବଡ଼ମାକୁ ଚୋରା ମଦ କାରବାରରେ ଗିରଫ କରି କୋର୍ଟ ଚାଲାଣ କରିଥିବା କହିଛନ୍ତି ରାୟଗଡ଼ା ଏସପି । ଏପଟେ କଲ୍ୟାଣସିଂହପୁର ବ୍ଲକରେ ବିଷାକ୍ତ ମଦ ପିଇ ଜଣେ ମୃତ୍ୟୁବରଣ କରିଥିବା ବେଳେ ୨୦ରୁ ଊର୍ଦ୍ଧ୍ବ ଅସୁସ୍ଥ ହୋଇଥିଲେ । ଏହାପରେ ରାଜ୍ୟ ସରକାରଙ୍କ ନିର୍ଦ୍ଦେଶ ମୁତାବକ ଏହି ଚଢ଼ାଉ ଜାରି ରହିଥିବା କହିଛନ୍ତି ଏସପି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
