ରାୟଗଡା: ମହିଳାଙ୍କୁ ଗଳାକାଟି ହତ୍ୟା । ଏମିତି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ରାୟଗଡା ଜିଲ୍ଲା କୁମ୍ବିକଟା ପଞ୍ଚାୟତ ଅନ୍ତର୍ଗତ ହୁଲୁକା ତୁଣ୍ଡା ଗ୍ରାମରେ । ଗାଁର ବିଜୟ ହୁଲୁକାଙ୍କ ସ୍ତ୍ରୀ କାସାଇ ହୁଲୁକା (୩୨) ଙ୍କୁ କେହି ଦୁର୍ବୃତ୍ତ ଗଳାକାଟି ହତ୍ୟା କରିଥିବା ଜଣାପଡିଛି ।
ଗତକାଲି ତାଙ୍କ ସ୍ବାମୀ କୌଣସି କାମରେ ରାୟଗଡା ଯାଇଥିଲେ । ସେ ବିଳମ୍ବିତ ରାତିରେ ଫେରିବା ପରେ ଘରଟା ସାରା ରକ୍ତରେ ଜୁଡୁବୁଡୁ ହୋଇଥିବା ବେଳେ ମଝି ଘରେ ତାଙ୍କ ସ୍ତ୍ରୀ ଶୋଇଥିବା ଦେଖିବାକୁ ପାଇଥିଲେ । ପରେ ଗାଁ ଲୋକଙ୍କୁ ଖବର ଦେବା ପରେ କାସାଇକୁ ଗଳା କାଟି ହତ୍ୟା କରାଯାଇଥିବା ଜଣାପଡିଥିଲା । ତେବେ ସ୍ତ୍ରୀ ବେକରେ ଥିବା ଗହଣା, କାନରେ ଥିବା କାନଫୁଲ ଏବଂ ତାଙ୍କ ଘରେ ଥିବା ଟଙ୍କା ବାକ୍ସ ଚୋରି ହୋଇଥିବା ଜଣାପଡିଛି । ସ୍ବାମୀ ବିଜୟ ହୁଲୁକା କୁମ୍ବିକଟା ଥାନାରେ ଏନେଇ ଏକ ଲିଖିତ ଅଭିଯୋଗ ପରେ ଘଟଣା ସ୍ଥଳରେ ଆଜି ସନ୍ଧ୍ୟାରେ ପୋଲିସ ପହଞ୍ଚି ମୃତଦେହ ଉଦ୍ଧାର କରି ଅଧିକ ତଦନ୍ତ କରୁଥିବା ଜଣାପଡିଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
