ରାୟଗଡା: ଡ୍ରୋନ ଦେଇପାରୁନି ରେଳ ଧାରଣାରେ ସୁରକ୍ଷା । ନାକେଦମ ହେଉଛନ୍ତି ରେଳ ସୁରକ୍ଷା ବଳ । କେତେବେଳେ ଡ୍ରୋନ ତ କେତେବେଳେ ପୁଣି ସ୍ବତନ୍ତ୍ର ଟ୍ରେନରେ ପହରା ଦେଉଛନ୍ତି ରେଳ ସୁରକ୍ଷା ବଳ । ହେଲେ ଖୋଲା ମେଲାରେ ଅବାଧରେ ରେଳଧାରଣା ସାଜିଛି ଶ୍ରମିକଙ୍କ ଘରବାହୁଡାର ଗଳାବାଟ । ଏମିତିରେ ଆନ୍ଧ୍ରପ୍ରଦେଶ ବିଜୟନଗରରୁ ଓଡ଼ିଶାର ବରଗଡ଼, ସମ୍ବଲପୁରକୁ ରେଳ ଧାରଣାରେ ଚାଲି ଚାଲି ଯାଉଥିବା 47 ଜଣ ଶ୍ରମିକଙ୍କୁ ଉଦ୍ଧାର କରିଛି ରାୟଗଡା ରେଳବାଇ ପୋଲିସ । ଯାହା ପ୍ରମାଣ କରୁଛି ଆନ୍ଧ୍ରପ୍ରଦେଶର ସୁରକ୍ଷା ବ୍ୟବସ୍ଥାକୁ ।
ଏହି ଶ୍ରମିକମାନେ ଟ୍ରେନ ଲାଇନରେ ଚାଲି ଚାଲି ଆସୁଥିବା ଖବର ପାଇ ରେଳବାଇ ପୋଲିସ ରାୟଗଡା-ଆନ୍ଧ୍ର ସୀମାନ୍ତ ଜେମାଦେଈପେଣ୍ଠ ନିକଟରେ ଏମାନଙ୍କୁ ଅଟକାଇଥିଲା । ତଦନ୍ତ ବେଳେ ଏମାନେ ଆନ୍ଧ୍ରପ୍ରଦେଶ ବିଜୟନଗରରେ ଏକ ପ୍ଲାଇଉଡ କାରଖାନାରେ କାମ କରୁଥିବା ଜଣାପଡିଛି । ଲକଡାଉନ ପରେ ଏହି କାରଖାନା ବନ୍ଦ ହୋଇ ଯିବାରୁ ଏହାର ମାଲିକ ଶ୍ରମିକମାନଙ୍କୁ ମଜୁରୀ ଦେଲା ନାହିଁ । ଖାଦ୍ୟପେୟ ଅଭାବରୁ ଏହି ଶ୍ରମିକମାନେ ବାଧ୍ୟ ହୋଇ ଟ୍ରେନ ଲାଇନରେ ଚାଲି ଚାଲି ନିଜ ଘରକୁ ଯାଉଥିବା ବେଳେ ପୋଲିସ ଦ୍ବାରା ଧରା ପଡିଛନ୍ତି ।
ତେବେ ଧରା ପଡିଥିବା ଏହି 47 ଜଣ ଶ୍ରମିକଙ୍କୁ ଅଟକ ରଖାଯାଇ ଶେଷଖାଲ ଥାନାକୁ ହସ୍ତାନ୍ତର କରାଯାଇଛି । ଅଟକ ରହିଥିବା ଶ୍ରମିକମାନଙ୍କ ସ୍ବାସ୍ଥ୍ୟ ପରୀକ୍ଷା କରାଯିବା ପରେ ସରକାରୀ କ୍ବାରେଣ୍ଟାଇନ ହୋମକୁ ପଠାଯିବ ବୋଲି କହିଛି ରେଳବାଇ ପୋଲିସ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
