ପୁରୀ: ଆଜି ବିଶ୍ବ ପର୍ଯ୍ୟଟନ ଦିବସ । ପ୍ରତି ବର୍ଷ ସେପ୍ଟେମ୍ବର 27 ତାରିଖକୁ ପର୍ଯ୍ୟଟନ ଦିବସ ଭାବେ ପାଳନ କରାଯାଏ । ବିଶ୍ବର କୋଣ ଅନୁକୋଣରେ ଥିବା ପର୍ଯ୍ୟଟନସ୍ଥଳୀ ଗୁଡିକ ବିଷୟରେ ଲୋକଙ୍କୁ ଅବଗତ କରିବା ସହ ପର୍ଯ୍ୟଟନ ଶିଳ୍ପକୁ ପ୍ରୋତ୍ସାହିତ କରିବା ଏହି ଦିବସ ପାଳନର ମୁଖ୍ୟ ଲକ୍ଷ୍ୟ । ପ୍ରତ୍ୟେକ ଦେଶର ପର୍ଯ୍ୟଟନ ସ୍ଥଳୀ ହିଁ ତାର ସୌନ୍ଦର୍ଯ୍ୟକୁ ଦ୍ବିଗୁଣିତ କରିଥାଏ । ପର୍ଯ୍ୟଟନ ସ୍ଥଳୀ ହିଁ ଏହାର ପରିଚୟ ହୋଇଥାଏ । ବିଶ୍ବର ପ୍ରତ୍ୟେକ ଦେଶର ଆର୍ଥିକ ବିକାଶ ପାଇଁ ପର୍ଯ୍ୟଟନ ଏକ ଗୁରୁତ୍ବପୂର୍ଣ୍ଣ ଭୂମିକା ଗ୍ରହଣ କରିଥାଏ । ଏହାକୁ ଦୃଷ୍ଟିରେ ରଖି ବିଶ୍ବ ପର୍ଯ୍ୟଟନ ଦିବସ(world tourism day) ପ୍ରତିବର୍ଷ ପାଳନ କରାଯାଏ ।
ତେବେ ଏହି ବିଶ୍ବ ପର୍ଯ୍ୟଟନ ଦିବସ ଉପଲକ୍ଷେ ପର୍ଯ୍ୟଟନ ଶିଳ୍ପ କୁ ଲୋକାଭିମୁଖୀ କରିବା ଉଦ୍ଦେଶ୍ୟରେ ପର୍ଯ୍ୟଟନ ବିଭାଗ ପକ୍ଷରୁ ସ୍ଵାଗତ ସମ୍ବର୍ଦ୍ଧନା କରାଯାଇଛି । ଏହି ଅବସରରେ ବିଶ୍ବ କୋଣାର୍କ ସୂର୍ଯ୍ୟ ମନ୍ଦିର ପରିସରରେ ପର୍ଯ୍ୟଟନ ବିଭାଗ ପକ୍ଷରୁ ପର୍ଯ୍ୟଟକ ମାନଙ୍କୁ ଚନ୍ଦନ ଲଗାଇ ଫୁଲ ପୁଷ୍ପ ପକାଇ ଗୋଲାପ ଫୁଲ ଦେଇ ଘୋଡ଼ା ନାଚ ମାଧ୍ୟମରେ ସ୍ବାଗତ କରାଯାଇଥିଲା । ଏଥି ସହ ବିଶ୍ବ ପ୍ରସିଦ୍ଧ କୋଣାର୍କ ସୂର୍ଯ୍ୟମନ୍ଦିର ସମ୍ମୁଖରେ ଝୋଟି ଓ ସୁନ୍ଦର ବାଲୁକା ଚିତ୍ରକଳା ମାଧ୍ୟମରେ ଓଡିଶା ପ୍ରସିଦ୍ଧ ସୂର୍ଯ୍ୟମନ୍ଦିର ପର୍ଯ୍ୟଟନ ସ୍ଥଳୀକୁ ବାଲୁକା ଚିତ୍ରକଳାରେ ସ୍ଥାନ ଦିଆଯାଇ ଥିଲା ।
ଏହା ମଧ୍ୟ ପଢନ୍ତୁ- World Tourism Day 2022: ବାଲୁକା କଳାରେ ବିଶ୍ବ ପର୍ଯ୍ୟଟନ ଦିବସର ଶୁଭେଚ୍ଛା
ଏନେଇ ପର୍ଯ୍ୟଟନ ଅଧିକାରୀ ଅମିୟ କୁମାର ସେଠୀ କହିଛନ୍ତି, "ଆଜିର ପର୍ଯ୍ୟଟନ ଦିବସରେ ସମସ୍ତଙ୍କୁ ଶୁଭେଚ୍ଛା ଜଣାଉଛି । ଆଜି ଏଠାରେ ଆମେ ବିଭିନ୍ନ କାର୍ଯ୍ୟକ୍ରମ ରଖିଥିଲୁ । ସେଥି ମଧ୍ରୁ ଝୋଟି ଅଙ୍କନ ଏବଂ ବାଲୁକା କଳା ତଥା ପର୍ଯ୍ୟଟକ ମାନଙ୍କୁ ପୁଷ୍ପ ଦେଇ ସ୍ବାଗତ କରିଥିଲୁ । ଦୀର୍ଘ ଦୁଇ ବର୍ଷ ହେଲା କରୋନା ପ୍ରଭାବରୁ ଆମ ରାଜ୍ୟକୁ ପର୍ଯ୍ୟଟକ କମିଯାଇଥିଲେ । କିନ୍ତୁ ଏବେ କୋରନା ପ୍ରଭାବ କମିଥିବାରୁ ପର୍ଯ୍ୟଟକଙ୍କ ସୁଅ ଛୁଟୁଛି ରାଜ୍ୟ ତଥା ଦେଶ ବାହାରରୁ । ତେବେ ଏହି ବିଶ୍ବ ଏୈତିହ୍ୟ କୋଣାର୍କକୁ ଅଧିକରୁ ଅଧିକ ପର୍ଯ୍ୟଟକ ଆସନ୍ତୁ। ଏବଂ ଏହାର ମନୋରମ କାରୁକାର୍ଯ୍ୟକୁ ଦେଖନ୍ତୁ ।"
ଇଟିଭି ଭାରତ, ପୁରୀ
