ପୁରୀ: ଗ୍ରାମ୍ୟ ଜଙ୍ଗଲ ସୁରକ୍ଷା ନେଇ ତାତିଲେ ଗ୍ରାମବାସୀ। ପ୍ରଭାବଶାଳୀ ବ୍ୟକ୍ତିଙ୍କ କବଜାରେ ଗ୍ରାମ୍ୟ ଜଙ୍ଗଲ ଥିବାରୁ ମନଇଚ୍ଛା ଲୁଟ ହେଉଥିବା ଅଭିଯୋଗ ହୋଇଛି। ଏ ଦିଗରେ ପ୍ରଶାସନ କୌଣସି ପଦକ୍ଷେପ ନ ନେଲେ ଆନ୍ଦୋଳନ ହେବ ବୋଲି ପୁରୀ ଜିଲ୍ଲା ଲିଆଖିଆ ଗ୍ରାମବାସୀ ଚେତାବନୀ ଦେଇଛନ୍ତି।
ପୁରୀ ଜିଲ୍ଲା ଗୋପ ବ୍ଳକ ଲିଆଖିଆ ଗ୍ରାମ୍ୟ ଜଙ୍ଗଲ କିଛି ପ୍ରଭାବଶାଳୀ ବ୍ୟକ୍ତିଙ୍କ ଅଧିନରେ ଥିବାରୁ ଜଙ୍ଗଲରୁ ଲୁଟ ହେଉଛି ଅନେକ ଜଙ୍ଗଲ ଜାତ ଦ୍ରବ୍ୟ । ହେଲେ ପୁରୀ ଜିଲ୍ଲା ବନ ଖଣ୍ଡ ଅଧିକାରୀ ଏହାର ସୁରକ୍ଷା ଦିଗରେ କୌଣସି ପଦକ୍ଷେପ ନେଉ ନ ଥିବା ଅଭିଯୋଗ କରିଛନ୍ତି ଲିଆଖିଆ ଗ୍ରାମବାସୀ । ଜଙ୍ଗଲର ସୁରକ୍ଷା ପାଇଁ ବନ ସୁରକ୍ଷା ସମିତି ଗଠନ ଦାବି ନେଇ ବାରମ୍ବାର ପୁରୀ ଜିଲ୍ଲା ଡିଏଫଓଙ୍କୁ ଅବଗତ କରାଯାଇ ଥିଲା। ମାତ୍ର ଡିଏଫଓ କୌଣସି ପଦକ୍ଷେପ ନେଉ ନାହାଁନ୍ତି ।
ଗ୍ରାମ୍ୟ ଜଙ୍ଗଲର ସୁରକ୍ଷା ପାଇଁ ଗ୍ରାମ୍ୟ ବନ ସୁରକ୍ଷା ସମିତି ଗଠନ ନିୟମ ଥିବା ବେଳେ ଏହି ନିୟମ ଉଲଘଂନ ହୋଇଥିବା କହିଛନ୍ତି ଗ୍ରାମବାସୀ। ତେବେ ତୁରନ୍ତ ପୁରୀ ଜିଲ୍ଲା ବନଖଣ୍ଡ ଅଧିକାରୀ ଏ ଦିଗରେ ପଦକ୍ଷେପ ନ ନେଲେ ଆଗାମୀ ଦିନରେ ଲିଆଖିଆ ଗ୍ରାମବାସୀ ଆନ୍ଦୋଳନକୁ ଓହ୍ଲାଇବାକୁ ଏକ ସାମ୍ବାଦିକ ସମିଳନୀ ଜରିଆରେ ଚେତାବନୀ ଦେଇଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
