ପୁରୀ: ଆଜି ଉତ୍କଳମଣି ପଣ୍ତିତ ଗୋପବନ୍ଧୁ ଦାସଙ୍କର ୧୪୪ତମ ଜନ୍ମ ତିଥି । ଏହି ଅଵସରରେ ପଣ୍ଡିତ ଗୋପବନ୍ଧୁ ଦାସଙ୍କ ଜନ୍ମସ୍ଥାନ ସୁଆଣ୍ଡୋ ଗ୍ରାମରେ ବିଭିନ୍ନ ବ୍ୟକ୍ତିମାନେ ପଣ୍ଡିତ ଗୋପବନ୍ଧୁଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ତାଙ୍କର ସ୍ମୃତି ଚାରଣ କରିଛନ୍ତି ।
ତେବେ ସତ୍ୟବାଦୀ ବିଧାୟକ ଉମାକାନ୍ତ ସାମନ୍ତରାୟ ମଧ୍ୟ ସୁଆଣ୍ଡୋ ଯାଇ ଉତ୍କଳମଣି ପଣ୍ଡିତ ଗୋପବନ୍ଧୁଙ୍କ ପ୍ରତିମୂର୍ତିରେ ମାଲ୍ୟାର୍ପଣ କରିବା ସହ ତାଙ୍କର ନୀତି ଆଦର୍ଶକୁ ଯୁବପୀଢ଼ୀ ଅନୁକରଣ କରିବାକୁ ଆହ୍ବାନ ଦେଇଥିଲେ ।
ଆଉ ଏହି ଅବସରରେ ଗୋପବନ୍ଧୁଙ୍କ ଜନ୍ମସ୍ଥଳୀ ଷଠିଘରର ଉନ୍ନତିକରଣ କାର୍ଯ୍ୟ ଆସନ୍ତା 2022 ଅକ୍ଟୋବର ପୂର୍ବରୁ ସରିବ ବୋଲି ସତ୍ୟବାଦୀ ବିଧାୟକ କହିଛନ୍ତି । କୋଭିଡ ମହାମାରୀ ଆଦି ଯୋଗୁଁ ଏହି କାର୍ଯ୍ୟ ଆଗେଇ ପାରି ନାହିଁ । ଏଥିପାଇଁ ସରକାର 15 କୋଟି ଟଙ୍କା ମଞ୍ଜୁର କରିଛନ୍ତି ।
ତେବେ ଆସନ୍ତା ବର୍ଷ ପଣ୍ଡିତ ଗୋପବନ୍ଧୁଙ୍କ ଜନ୍ମ ବାର୍ଷିକୀରେ ମୁଖ୍ୟମନ୍ତ୍ରୀ ନିଜେ ଆସି ଉନ୍ନତିକରଣ କାର୍ଯ୍ୟର ଶୁଭ ଉଦଘାଟନ କରିବେ ବୋଲି ସତ୍ୟବାଦୀ ବିଧାୟକ ସୂଚନା ଦେଇଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
