ପୁରୀ: ପିପିଲି ନୂଆ ଶାସନ ପଞ୍ଚାୟତର ସରପଞ୍ଚ ଉପ ନିର୍ବାଚନ ଆଳରେ ବିଜେଡି ଅଗାମୀ ପିପିଲି ବିଧାନସଭା ଆସନର ଉପନିର୍ବାଚନ ପାଇଁ ପ୍ରସ୍ତୁତି ଆଗମ୍ଭ କରିଛି । ଆଜି ନୂଆ ଶାସନ ପଞ୍ଚାୟତରେ ଦଳ ସମର୍ଥିତ ପ୍ରାର୍ଥୀ ପାଇଁ ବିଜେଡି ଜୋରଦାର ପ୍ରଚାର କରିବା ସହ ବିଶାଳ ବାଇକ ରାଲି ଓ ଦଳୀୟ ସଭା ଆୟୋଜନ କରିଥିଲା । ଏଥିରେ ପିପିଲି ଉପନିର୍ବାଚନ ପାଇଁ ବିଜେଡିର ପର୍ଯ୍ୟବେକ୍ଷକ ଥିବା ପ୍ରତାପ ଦେବ ଯୋଗ ଦେଇ ନିଜ କର୍ମୀଙ୍କୁ ଅଗାମୀ ପିପିଲି ଉପ ନିର୍ବାଚନ ନେଇ ପ୍ରସ୍ତୁତ ରହିବା ସହ ଦଳକୁ ବିଜୟ କରାଇବା ପାଇଁ ସମସ୍ତେ ଏକଜୁଟ ହେବାକୁ ଆହ୍ୱାନ ଦେଇଥିଲେ । ତେବେ କିଏ ପିପିଲିରୁ ପ୍ରାର୍ଥୀ ହେବ ସେନେଇ ପ୍ରତାପ ଦେବ କିଛି ସ୍ପଷ୍ଟ ସଂକେତ ଦେଇ ନଥିବା ବେଳେ ବିଜେଡି ସୁପ୍ରିମୋ ଠିକ ସମୟରେ ସଠିକ ପ୍ରାର୍ଥୀ ନାଁ ଘୋଷଣା କରିବେ ବୋଲି ସେ କହିଛନ୍ତି ।
ତେବେ ପିପିଲି ଯିଏ ବି ବିଜେଡିର ପ୍ରାର୍ଥୀ ହେବ ତାହାର ବିଜୟ ସୁନିଶ୍ଚିତ ବୋଲି ପ୍ରତାପ ଦେବ କହିଛନ୍ତି । ସେହିପରି ପିପିଲିବାସୀ ସ୍ବର୍ଗତ ପ୍ରଦୀପ ମହରଥୀଙ୍କ ବିୟୋଗ ଦୁଃଖରେ ଥିବା ବେଳେ ତାଙ୍କର ବିକାଶ କାର୍ଯ୍ୟକୁ ମନେ ରଖିଛନ୍ତି । ତେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯାହାକୁ ଏଠାରେ ପ୍ରାର୍ଥୀ କରିବେ ତାକୁ ଜିତାଇବା ପାଇଁ ବିଜେଡି କର୍ମୀ ପରିଶ୍ରମ କରିବେ ବୋଲି କହିଛନ୍ତି ବିଧାୟକ ଉମାକାନ୍ତ ସାମନ୍ତ ରାୟ । ସେହିପରି ପିପିଲି ଉପ ନିର୍ବାଚନକୁ ଭୋଟର ମାନେ ଚାହିଁ ରହିଥିବା ବେଳେ ପୁଣି ପିପିଲି ଡେଲାଙ୍ଗ ନିର୍ବାଚନ ମଣ୍ଡଳୀରେ ବିଜେଡି ନିଶ୍ଚିତ ଜିତିବ ବୋଲି ଗଣଶିକ୍ଷା ମନ୍ତ୍ରୀ ସମୀର ଦାଶ କହିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
