ପୁରୀ: ଦେବସ୍ନାନ ପୂର୍ଣ୍ଣିମାରେ ବିଶୃଙ୍ଖଳା ପ୍ରସଙ୍ଗ । କାର୍ଯ୍ୟାନୁଷ୍ଠାନ ନେଇ ମୁହଁ ଖୋଲିଛନ୍ତି ନିଲମ୍ବିତ ସେବାୟତ ସୋମନାଥ ଖୁଣ୍ଟିଆ। ପୁରୀ ବିଧାୟକ ବିଜେପିର ହୋଇଥିବାରୁ ରାଜ୍ୟ ସରକାରଙ୍କ ପ୍ରରୋଚନାରେ ଏସବୁ କାର୍ଯ୍ୟାନୁଷ୍ଠାନ ବୋଲି ଅଭିଯୋଗ କରିଛନ୍ତି ସୋମନାଥ ।
ସେ କହିଛନ୍ତି, ପୂର୍ବରୁ ଅନେକ ବିଧାୟକ ଦେବସ୍ନାନ ମଣ୍ଡପକୁ ଯାଇ ଦର୍ଶନ କରିଥିଲେ । ବିଧାୟକ ଅରୁଣ ସାହୁ ମଧ୍ୟ ଏହା ମଧ୍ୟରୁ ଜଣେ । ହେଲେ ସେତେବେଳେ ପ୍ରଶାସନ କୌଣସି କାର୍ଯ୍ୟାନୁଷ୍ଠାନ ନେଇନଥିଲା । ଆଉ ଏବେ ଆକ୍ରୋଶମୂଳକ ଭାବରେ ଏପରି କାର୍ଯ୍ୟାନୁଷ୍ଠାନ ବୋଲି କହିଛନ୍ତି ସେବାୟତ ସୋମନାଥ ଖୁଣ୍ଟିଆ ।
ସେ ଆହୁରି ମଧ୍ୟ କହିଛନ୍ତି, ପୁରୀ ବିଧାୟକ ଜଣେ ମୁକ୍ତି ମଣ୍ଡପର ବ୍ରାହ୍ମଣ । ସେ ପ୍ରତିବର୍ଷ ମହାପ୍ରଭୁଙ୍କ ଦର୍ଶନ ଦେବସ୍ନାନ ପୂର୍ଣ୍ଣିମା ଅବସରରେ କରିଥାନ୍ତି । କିନ୍ତୁ ଚଳିତ ସ୍ନାନଯାତ୍ରାରେ ସେ କେବଳ ଦେବସ୍ନାନ ମଣ୍ଡପ ପାହାଚକୁ ସ୍ପର୍ଶ କରିଥିଲେ । ତାଙ୍କୁ କେଉଁ ଆଧାରରେ ପ୍ରଶାସନ ନୋଟିସ କରିଛି ବୋଲି ପ୍ରଶ୍ନ କରିଛନ୍ତି ନିଲମ୍ବିତ ସେବାୟତ । ସେହିପରି ସେ ବିଧାୟକଙ୍କୁ ନେଇ ଯାଇଥିବା ଘଟଣା ମଧ୍ୟ ମିଥ୍ୟା ବୋଲି କହିଛନ୍ତି ସୋମନାଥ । ସେ କେବଳ ଦର୍ଶନ ବେଳେ ବିଧାୟକଙ୍କ ପାଖରେ ଥିବା କହିଛନ୍ତି ।
ସୋମନାଥ କହିଛନ୍ତି ଯେ ଯଦି ସ୍ନାନ ମଣ୍ଡପକୁ ଅନ୍ୟ କୌଣସି ବ୍ୟକ୍ତି ଆସିବାର କଟକଣା ରହିଛି, ତେବେ ସେହି ଦାୟିତ୍ୱରେ ଥିବା ପୋଲିସ କର୍ମଚାରୀ ଓ ସେବକ ବିଧାୟକଙ୍କୁ ଅଟକାଇବା କଥା । ହେଲେ କାହିଁକି ସେମାନେ ଅଟକାଇ ନଥିଲେ ବୋଲି ସେ ପ୍ରଶ୍ନ କରିଛନ୍ତି । ଶ୍ରୀମନ୍ଦିର ପ୍ରଶାସନ କେବଳ ରାଜନିତୀକରଣ କରି ତାଙ୍କୁ ନିଲମ୍ବିତ କରିଥିବା ଅଭିଯୋଗ କରିଛନ୍ତି ସୋମନାଥ ଖୁଣ୍ଟିଆ । ଏନେଇ ପରବର୍ତ୍ତୀ ସମୟରେ ସେ ଆଇନର ଆଶ୍ରୟ ନେବାକୁ ମଧ୍ୟ ସୂଚନା ଦେଇଛନ୍ତି ।
ଅନ୍ୟପଟେ ଏହି ପ୍ରସଙ୍ଗ ନେଇ ସେବାୟତ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ସ୍ନାନ ପୂର୍ଣ୍ଣିମା ଶୃଙ୍ଖଳିତ ଭାବରେ ସରିଥିବା ବେଳେ ସେବାୟତଙ୍କୁ ନୋଟିସ ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ବରିଷ୍ଠ ଦଇତାପତି ବିନାୟକ ଦାସ ମହାପାତ୍ର କହିଛନ୍ତି। ଯଦି କେହି ଅତିଥି ଆସନ୍ତି, ସେବାୟତମାନେ ମହାପ୍ରଭୁଙ୍କ ତୁଳସୀ ଓ କର୍ପୁର ପ୍ରଦାନ କରିଥାନ୍ତି। ତେବେ ଏହି ପ୍ରସଙ୍ଗକୁ ନେଇ ସେବାୟତଙ୍କୁ ଟାର୍ଗେଟ କରିବା ନିନ୍ଦନୀୟ ବୋଲି ବିନାୟକ ଦାସ ମହାପାତ୍ର ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
