ବ୍ରହ୍ମଗିରି: ବ୍ଲକରେ ଦୁର୍ନୀତି ଚରମ ସୀମାରେ ପହଞ୍ଚିଛି । ଏନେଇ ଆଜି ବ୍ରାହାମୁନିଆ ପଞ୍ଚାୟତର ସମିତି ସଭ୍ୟା ନିରୂପମା ଦାଶ , କାଣ୍ଡଗଦା ପଞ୍ଚାୟତର ସମିତି ସଭ୍ୟା ବିଷ୍ଣୁ ପ୍ରିୟା ବରାଳ ,ପୂର୍ବତନ ବ୍ରହ୍ମଗିରି ବ୍ଲକ ଅଧକ୍ଷ କୃଷ୍ଣଚନ୍ଦ୍ର ରାୟ ଓ ପୂର୍ବତନ ସମିତି ସଭ୍ୟ ପ୍ରସନ୍ନ ବରାଳ ସାମ୍ବାଦିକ ସମ୍ମିଳନୀ କରିଥିଲେ ।
ଆଜିକୁ ପ୍ରାୟ ଦେଢ଼ ବର୍ଷ ହେବ ବ୍ଲକରେ ପଞ୍ଚାୟତ ସମିତି ବୈଠକ ଡକାଯାଇନାହିଁ। ବ୍ଲକରେ ଯେ କୌଣସି ଉନ୍ନତିମୂଳକ କାର୍ଯ୍ୟ କରାଯାଉଛି ତାହା ବ୍ଲକ ବିଡ଼ିଓ ଓ ବ୍ଲକ ଅଧକ୍ଷାଙ୍କ ଛଡା ଅନ୍ୟ ସମସ୍ତଙ୍କ ଅଗୋଚରରେ ରଖାଯାଉଛି। ଜନ ପ୍ରତିନିଧିମାନେ କୌଣସି କାର୍ଯ୍ୟର ତଦାରଖ କରିବା ପାଇଁ ଗଲେ ବ୍ଲକରେ କୌଣସି କର୍ମଚାରୀ ସେମାନଙ୍କୁ ସହଯୋଗ କରୁନାହାନ୍ତି। ବ୍ରହ୍ମଗିରି ବ୍ଲକର ଅଧକ୍ଷା ଓ ବିଡ଼ିଓ ମିଳିତ ହୋଇ ବ୍ଲକ କଯ୍ୟାଳୟକୁ ଏକ ବ୍ୟକ୍ତିଗତ କମ୍ପାନୀ ଭାବେ ଚଳାଇବା ଏବଂ ଫନି ଭଳି ଏକ ପ୍ରଳୟଙ୍କାରୀ ମହାବାତ୍ୟାରେ ବ୍ଲକ ଅଧିକାରୀ ଲୋକପ୍ରତିନିଧି ମାନଙ୍କୁ ଡକାଇ ଏକ ସମୀକ୍ଷା ବୈଠକ ନ କରିବା ନେଇ ଦୁଇ ଜଣ ସମିତି ସଭ୍ୟା କ୍ଷୋଭପ୍ରକାଶ କରିଛନ୍ତି।
ଏହିସବୁ ଅଭିଯୋଗ ନେଇ ପୁରୀ ଜିଲ୍ଲାପାଳଙ୍କୁ ଗତ ଜୁଲାଇ 15ରେ ଲିଖିତ ଅଭିଯୋଗ କରିଥିଲେ । କଟକ ହାଇକୋର୍ଟରେ ଏକ କେସ ଦାୟର କରିଥିଲେ । ତେବେ ଯଥାଶୀଘ୍ର ଏହାର ଉତ୍ତର ଦେବା ପାଇଁ ପଞ୍ଚାୟତରାଜ ବିଭାଗ, ପୁରୀ ଜିଲ୍ଲାପାଳ, ବିଡ଼ିଓ ବ୍ରହ୍ମଗିରି ଏବଂ ବ୍ଲକ ଅଧକ୍ଷା ବ୍ରହ୍ମଗିରିଙ୍କୁ ନୋଟିସ କରିଛନ୍ତି ହାଇକୋର୍ଟ ।
ବ୍ରହ୍ମଗିରିରୁ ଦେବାଶିଷ ଦାସ, ଇଟିଭି ଭାରତ
