ପୁରୀ: କୋରୋନା ଯୋଗୁଁ ଭକ୍ତ ଓ ଭଗବାନଙ୍କ ମଧ୍ୟରେ ବଢିଛି ଦୂରତା । ଲକଡାଉନ ନସରିବା ଯାଏଁ ମହାପ୍ରଭୁଙ୍କ ଦର୍ଶନରୁ ବଞ୍ଚିତ ହେବେ ଭକ୍ତ । ଏପ୍ରିଲ 14 ଯାଏଁ ଶ୍ରୀମନ୍ଦିରରେ ଭକ୍ତ ଦର୍ଶନ ଉପରେ ଲାଗିଛି କଟକଣା ।
ପୂର୍ବରୁ କୋରୋନା ସଂକ୍ରମଣକୁ ଦୃଷ୍ଟିରେ ରଖି ସରକାର ମାର୍ଚ୍ଚ 20ରୁ ଏପ୍ରିଲ 1 ଯାଏଁ ପ୍ରଥମ ପର୍ଯ୍ୟାୟରେ ଶ୍ରୀମନ୍ଦିରରେ ଭକ୍ତଙ୍କ ଦର୍ଶନ ବ୍ୟବସ୍ଥା ବନ୍ଦ ନେଇ ଘୋଷଣା କରିଥିଲେ । ତେବେ ସାରା ଦେଶରେ ଏବେ ଲକଡାଉନ ପ୍ରକ୍ରିୟା ଚାଲିଥିବାବେଳେ କୋରୋନା ସଂକ୍ରମଣ ବ୍ୟାପିବାର ଆଶଙ୍କା ରହିଛି । ଏହାକୁ ଦୃଷ୍ଟିରେ ରଖି ସରକାର ପୁଣି ଶ୍ରୀମନ୍ଦିରରେ ଦର୍ଶନ କଟକଣା ବଢାଇ ଦେଇଛନ୍ତି ।
ଅନ୍ୟପଟେ ଶ୍ରୀମନ୍ଦିରରେ ମହାପ୍ରଭୁଙ୍କ ନୀତିକାନ୍ତି ସବୁ ଦିନ ଭଳି ଚାଲୁ ରହିଛି । ମହାପ୍ରଭୁଙ୍କ ସେବାୟତ ଥିବା ପାଳିଆ ସେବକଙ୍କୁ କେଵଳ ଶ୍ରୀମନ୍ଦିରକୁ ପ୍ରବେଶ ଅନୁମତି ରହିଛି । ପ୍ରତିଟି ସେବକଙ୍କୁ ସ୍କ୍ରିନିଂ କରାଯାଇ ଶ୍ରୀମନ୍ଦିରରେ ପ୍ରବେଶ ଅନୁମତି ଦିଆଯାଉଛି ।
ସେହିପରି ଭକ୍ତଙ୍କ ଦର୍ଶନ ବନ୍ଦ ଥିବାରୁ ମହାପ୍ରଭୁଙ୍କ କେଵଳ କୋଠ ଭୋଗ ପ୍ରତିଦିନ ପ୍ରସ୍ତୁତ କରାଯାଇ ଲାଗି ହେଉଛି । ଆନନ୍ଦ ବଜ଼ାର ମଧ୍ୟ ବନ୍ଦ ରହିଛି । ଭକ୍ତ ଓ ସେବାୟତଙ୍କ ସୁରକ୍ଷାକୁ ଦେଖି ଏହି ଦର୍ଶନ କଟକଣା ଭକ୍ତଙ୍କ ପାଇଁ କରାଯାଇଥିବା ସରକାର ପୂର୍ବରୁ ଘୋଷଣା କରିଥିଲେ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
