ପୁରୀ: ଓଡିଶାର ପୁରାତନ ରଘୁନନ୍ଦନ ଲାଇବ୍ରେରୀକୁ ଅନ୍ତର୍ଜାତୀୟ ସ୍ତରର ପାଠାଗାର କରାଯିବ । ରାଜ୍ୟ ସରକାର ଏଥିପାଇଁ 5 କୋଟି ଟଙ୍କା ଘୋଷଣା କରିଛନ୍ତି । ଏହି ଅର୍ଥରେ ରଘୁନନ୍ଦନ ଲାଇବ୍ରେରୀକୁ ବିଶ୍ବସ୍ତରୀୟ କରାଯିବ । ଜଗନ୍ନାଥ ସଂସ୍କୃତି ଗବେଷଣାର ଏକ ଉତ୍କର୍ଷ କେନ୍ଦ୍ର ଭାବେ ଏହି ଲାଇବ୍ରେରୀକୁ ଗଠନ କରାଯିବ । ଏମାର ମଠକୁ ନୂଆ ଜାଗାରେ ସ୍ଥାପନ କରିବା ପରେ ସେଠାରେ ଏହି ଲାଇବ୍ରେରୀ ପ୍ରତିଷ୍ଠା କରାଯିବ ।
ଶ୍ରୀମନ୍ଦିର ଚାରିପଟେ ସୁରକ୍ଷା ଦୃଷ୍ଟିକୋଣରୁ ଏମାର ମଠର ଏହି ପୁରାତନ ଲାଇବ୍ରେରୀକୁ ଉଚ୍ଛେଦ କରାଯାଇଥିଲା । ପରବର୍ତ୍ତୀ ସମୟରେ ଜିଲ୍ଲା ପ୍ରଶାସନ ପାଠାଗାରର ବହି ଗୁଡିକୁ ସଂଗ୍ରହ କରି ସେଗୁଡିକର ସଂରକ୍ଷଣ ଓ ଡିଜିଟାଇଜେସନ କରିବା ନେଇ ବିଭିନ୍ନ ଏକ୍ସପର୍ଟଙ୍କୁ ନେଇ କାର୍ଯ୍ୟ ଆରମ୍ଭ କରିଛି । 1921 ମସିହାରେ ଏମାର ମଠର ମହନ୍ତ ଏହାକୁ ପ୍ରତିଷ୍ଠା କରିଥିଲେ ।
ପାଠାଗାରରେ 5 ହଜାରରୁ ଅଧିକ ବିଶ୍ବସ୍ତରୀୟ ଇତିହାସ ବହି, ସାହିତ୍ୟ, ଜଗନ୍ନାଥ ସଂସ୍କୃତି ପୁସ୍ତକ, ତାଳପତ୍ର ପୋଥି ଆଦି ରହିଥିଲା । ସେଥିପାଇଁ ରଘୁନନ୍ଦନ ଲାଇବ୍ରେରୀର ଏକ ସ୍ବତନ୍ତ୍ର ପରିଚୟ ରହିଥିଲା । ଅନ୍ୟପଟେ ରଘୁନନ୍ଦନ ଲାଇବ୍ରେରୀର ଅନେକ ପୁସ୍ତକ ନଷ୍ଟ ହୋଇ ଯାଇଥିବା ବହି ସଂରକ୍ଷକ କରୁଥିବା ଜଣେ ଏକ୍ସପର୍ଟ କହିଛନ୍ତି । ଯାହାକୁ କେମିକାଲ ଦ୍ବାରା ସଂରକ୍ଷଣ କରାଯିବ । ପରେ ଡିଜିଟାଇଜେସନ କରାଯିବ । ଏସବୁ ପାଇଁ 3 ମାସ ସମୟ ଲାଗିବ ବୋଲି ଏକ୍ସପର୍ଟ ଉଲ୍ଲେଖ କରିଛନ୍ତି ।
ପୁରୀରୁ ଶକ୍ତିପ୍ରସାଦ ମିଶ୍ର, ଇଟିଭି ଭାରତ
