ପୁରୀ: ଆଜି ଜୁନ ମାସ 3 ତାରିଖ, ଏହି ଦିନକୁ ୱାର୍ଲଡ଼ ସାଇକେଲ ଡେ ଭାବେ ପାଳନ କରାଯାଏ । ସାଇକେଲ ଚଳାଇବା ଦ୍ୱାରା ସ୍ୱାସ୍ଥ୍ୟ ଠିକ ରହିବା ସହ ପରିବେଶ ପ୍ରଦୂଷିତ ମଧ୍ୟ ହୋଇନଥାଏ । ଏଣୁ ପରିବେଶ ପ୍ରଦୂଷଣ ରୋକିବା ଏବଂ ସାଇକେଲ ଚଳାଇବା ନେଇ ଲୋକଙ୍କୁ ଉତ୍ସାହିତ କରିବା ହେଉଛି ଏହି ଦିବସର ପରିକଳ୍ପନା ।
ଏହି ଅବସରରେ ଲୋକଙ୍କୁ ସାଇକେଲ ଚଳାଇବା ପାଇଁ ସଚେତନ କରିବା ଉଦ୍ଦେଶ୍ୟରେ ନିଆରା ଉଦ୍ୟମ କରିଛନ୍ତି ପୁରୀ ଯୁବ ଚିତ୍ରଶିଳ୍ପୀ ଶାଶ୍ବତ ରଞ୍ଜନ ସାହୁ । ବିଶ୍ବ ସାଇକେଲ ଦିବସରେ ସେ 3 ହଜାର 6 ଶହ 53 ଟି ଦିଆସିଲି କାଠିରେ ଏକ ସାଇକେଲର ସୁନ୍ଦର ପ୍ରତିକୃତି ତିଆରି କରିଛନ୍ତି । ଏହି ନିଆରା କଳାକୃତି ତିଆରି ପାଇଁ ତାଙ୍କୁ 7 ଦିନ ସମୟ ଲାଗିଥିଲା । ଦିଆସିଲି କାଠିରେ ତିଆରି ହୋଇଥିବା ସାଇକେଲ ପ୍ରତିକୃତିର ଉଚ୍ଚତା 50 ଇଞ୍ଚ ଏବଂ ଲମ୍ବ 25 ଇଞ୍ଚ ରହିଛି । ବିଶ୍ୱ ସାଇକେଲ ଦିବସ ଅବସରରେ ସାଶ୍ବତଙ୍କ ନିଆରା କଳାକୃତିକୁ ବେଶ ଚର୍ଚ୍ଚା କରାଯାଉଛି । ପୂର୍ବରୁ ଶାଶ୍ବତ ଦିଆସିଲି କାଠିରେ ମହାପ୍ରଭୁଙ୍କ ଚନ୍ଦନ ଯାତ୍ରାରେ ଚାପ ଖେଳ ଚିତ୍ର ଅଙ୍କନ କରି ବେଶ୍ ପ୍ରଶଂସା ସାଉଁଟିଥିଲେ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
