ପୁରୀ: ପୁରୀର ଚକ୍ରତୀର୍ଥ ରୋଡ଼ ବେଳାଭୂମିରେ ବ୍ଲୁ ଫ୍ଲାଗ ବିଚ ନିର୍ମାଣକୁ ମତ୍ସ୍ୟଜୀବୀ, ଉଠା ଦୋକାନୀ ମାନେ ଦୃଢ଼ ବିରୋଧ କରିବା ସହ ଏନେଇ ଚାଲିଥିବା କାର୍ଯ୍ୟକୁ ବନ୍ଦ କରିଛନ୍ତି । ବ୍ଲୁ ଫ୍ଲାଗ ବିଚ ହେଲେ ତାଙ୍କୁ ପ୍ରବେଶ ଅନୁମତି ମିଳିବ ନାହିଁ ଏବଂ ସେମାନେ ଜୀବିକା ହରାଇ ଅସୁବିଧାରେ ପଡିବେ ବୋଲି ଅଭିଯୋଗ ହୋଇଛି ।
ତେବେ କାର୍ଯ୍ୟ ନେଇ ବିବାଦ ଓ ଉତ୍ତେଜନା ସୃଷ୍ଟି ହୋଇଥିବା ବେଳେ ଏନେଇ ପ୍ରତିକ୍ରିୟା ରଖିଛନ୍ତି ପୁରୀ ଜିଲ୍ଲାପାଳ ସମର୍ଥ ବର୍ମା । ପୁରୀ ଜିଲ୍ଲାପାଳଙ୍କ ସୂଚନା ଅନୁଯାୟୀ ଚକ୍ରତୀର୍ଥ ବେଳାଭୂମିରେ ଚାଲିଥିବା କାର୍ଯ୍ୟ ବ୍ଲୁ ଫ୍ଲାଗ ବିଚ ପାଇଁ ନୁହେଁ । ବେଳାଭୂମିର ସୌନ୍ଦର୍ଯ୍ୟକରଣ କାର୍ଯ୍ୟ ଆରମ୍ଭ ହୋଇଛି । ଉଭୟ ପର୍ଯ୍ୟଟକ ଓ ଉଠା ଦୋକାନୀଙ୍କ ସୁବିଧା ପାଇଁ କାର୍ଯ୍ୟ କରାଯାଉଛି । ସେଠାରେ ଟଏଲେଟ, ପୋଷାକ ବଦଲାଇବା ଗୃହ, ପାନୀୟ ଜଳ ବ୍ୟବସ୍ଥା, ଆଲୋକ ବ୍ୟବସ୍ଥା ସମେତ ଫୁଟପାଥ ନିର୍ମାଣ ହେବ । ଏନେଇ ସବୁ ବର୍ଗର ଲୋକଙ୍କ ସହ ଆଲୋଚନା ହୋଇଛି । ଯେଉଁମାନେ ବିରୋଧ କରୁଛନ୍ତି ପ୍ରକୃତ ଘଟଣା ବୁଝିନାହାନ୍ତି ।
ତେବେ ଆପତ୍ତି ଅଭିଯୋଗ ଥିବା ବ୍ୟକ୍ତି ବିଶେଷଙ୍କ ସହ ପ୍ରଶାସନ ପୁଣି ଆଲୋଚନା କରି ବିଚ ସୌନ୍ଦର୍ଯ୍ୟକରଣ କାର୍ଯ୍ୟ କରାଯିବ ବୋଲି ଜିଲ୍ଲାପାଳ କହିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
