ପୁରୀ: ପୁରୀରେ ବୃଦ୍ଧି ପାଉଛି ଅପରାଧିକ କାର୍ଯ୍ୟକଳାପ । ଅନେକ ସମୟରେ ଚୋରି ଡକାୟତି ଓ ବେଆଇନ ନିଶା କାରବାର ଭଳି ଘଟଣା ସାମ୍ନାକୁ ଆସୁଥିବା ବେଳେ ଜିଲ୍ଲାରେ ଖୁଲାମଖୁଲା ଚାଲିଛି ଜୁଆ ଖେଳ । ପୁରୀ ଚନ୍ଦନ ଥାନା ପୋଲିସ ସୋମବାର ଉଆସ ସାହିରେ ଚାଲିଥିବା ଏକ ଜୁଆ ଆଡ୍ଡା ଉପରେ ଚଢାଉ କରି 19 ଜଣଙ୍କୁ ଗିରଫ କରିଛି । ଗିରଫ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି ।
ଜୁଆ ଆଡା ଉପରେ ଚଢ଼ାଉ , 19 ଗିରଫ
ସୂଚନା ମୁତାବକ, ଉଆସ ସାହିରେ ଜୁଆ ଆଡ୍ଡା ଚାଲିଥିବା ନେଇ ପୋଲିସ ଖବର ପାଇ ଅତର୍କିତ ଚଢାଉ କରିଥିଲା । ଘଟଣାସ୍ଥଳରୁ 19 ଜଣ ଜୁଆଡି ଧରା ପଡିବା ସହ କିଛି ଟଙ୍କା ମଧ୍ୟ ଜବତ କରାଯାଇଛି । ସେହିପରି ଗତ ରବିବାର ସଦର ଥାନା ଓ ବଳିଆ ପଣ୍ଡା ଥାନା ଅଞ୍ଚଳରେ ଏକ ଜୁଆ ଆଡ୍ଡା ଉପରେ ପୋଲିସ ଚଢାଉ କରି 15 ଜଣଙ୍କୁ ଗିରଫ କରିଥିଲା । ଗତ ଦୁଇ ଦିନ ଭିତରେ ପୋଲିସ ବିଭିନ୍ନ ସ୍ଥାନରେ ଚଢାଉ କରି 34 ଜଣଙ୍କୁ ଗିରଫ କରିଛି । ଜିଲ୍ଲାରେ ଜୁଆ ଖେଳ ରୋକିବା ଦିଗରେ ପୋଲିସ କଡା ନଜର ରଖିଥିବା କୁହାଯାଉଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
